~~~~~~~~⊰❂ Unicode Version ❂⊱~~~~~~~~

လားရှိုးမြို့တွင် အရည်အသွေးမပြည့်မီသည့်စက်သုံးဆီများ ရောင်းချသည့်ဆိုင် (၃)ဆိုင်ကို ပထမအကြိမ်အဖြစ် အရေးယူထား
***********
ရှမ်းပြည်နယ်မြောက်ပိုင်း၊ လားရှိုးမြို့မှ လူသုံးများသော စက်သုံးဆီအရောင်းဆိုင်ကြီး (၅) ခုမှ စက်သုံးဆီများကို ဓါတ်ခွဲစမ်းသပ်စစ်ဆေးပြီးနောက် အရည်အသွေးမပြည့်မီသည့်ဆီများ ရောင်းချနေသည့် ဆိုင်(၃)ဆိုင်ကို ၂၀၁၉ ခုနှစ်၊ ဧပြီလ (၂၆)ရက်နေ့က ဒဏ်ငွေပေးဆောင်စေပြီး ပထမအကြိမ်သတိပေးမှုအဖြစ် အရေးယူထားကြောင်း သိရသည်။

အဆိုပါဆီဆိုင် (၅)ဆိုင်ကို အချိန်အတွယ်နှင့် အရည်အသွေး ပြည့်မီမှုရှိမရှိကို ၂၀၁၉ ခုနှစ်၊ ဖေဖေါ်ဝါရီလ (၁)ရက်နေ့က အဖွဲ့စုံဖြင့်စစ်ဆေးခဲ့ပြီး စက်သုံးဆီများကို နမူနာရယူ၍ သံလျင်ရေနံချက်ဌာနသို့ ပို့ဆောင် စစ်ဆေးစေခဲ့ခြင်းဖြစ်ကြောင်း သိရသည်။

"ဆိုင် (၃) ဆိုင်ရဲ့ ဓါတ်ဆီ( 92 RON ) နဲ့ ပရီမီယမ်ဒီဇယ်ဆီတွေက အရည်အသွေးမပြည့်မီဘူးဆိုတာကို စစ်ဆေးတဲ့ဌာနက အကြောင်းပြန်လာတယ်။ အဲဒီဆိုင်တွေကို စက်သုံးဆီတစ်မျိုးစီအတွက် ငွေကျပ်ငါးသိန်းစီ ဒဏ်ရိုက်လိုက်တယ်လို့ သိရတယ်။ အဲဒီလိုပဲ လားရှိုးမြို့မှာရှိတဲ့ စက်သုံးဆီဆိုင်ကြီးတွေကို အဖွဲ့စုံနဲ့ ထပ်ပြီးတော့ လိုက်လံစစ်ဆေးသွားဖို့လည်း ရှိပါတယ်။ ဒဏ်ငွေဆောင်ရတဲ့ဆိုင်တွေက အရည်အသွေးမပြည့်မီတဲ့ စက်သုံးဆီတွေကို ဆက်လက်ရောင်းချနေဦးမယ်ဆိုရင် အခုထက် ပိုပြီးပြင်းထန်တဲ့အရေးယူမှုမျိုး ဆက်လုပ်သွားမယ်လို့ သိရပါတယ် " ဟု စက်သုံးဆီဆိုင်များအား စစ်ဆေးရာတွင်ပါဝင်ခဲ့သည့် စားသုံးသူရေးရာဦးစီးဌာန ဒုတိယပြည်နယ်ဦးစီးမှူးရုံး ( လားရှိုး ) မှ ဒုတိယပြည်နယ်ဦးစီးမှူး ဦးဇော်မင်းသန်းက တာချီလိတ်သတင်းအေဂျင်စီသို့ ဧပြီလ (၂၆) ရက်နေ့တွင် ပြောသည်။

လားရှိုးမြို့ရှိ Lucky 7 ဆိုင်မှ အရည်အသွေးမပြည့်မီဘဲရောင်းချနေသည့် ဓါတ်ဆီ 92 RON နှင့် ပရီမီယမ်ဒီဇယ် အတွက် တစ်မျိုးလျှင် ကျပ် ငါးသိန်စီဖြင့် စုစုပေါင်းဒဏ်ကြေးငွေ ကျပ်ဆယ်သိန်း ၊ ဝင်းချယ်ရီ (၁) စက်သုံးဆီဆိုင်မှ အရည်အသွေးမပြည့်မီဘဲ ရောင်းချနေသည့် ဓါတ်ဆီ 95 RON နှင့် ပရီမီယမ်ဒီဇယ်ဆီ အတွက် တစ်မျိုးလျှင် ကျပ် ငါးသိန်းစီ စုစုပေါင်း ကျပ် ဆယ်သိန်းနှင့် ရတနာမိုး စက်သုံးဆီဆိုင်မှ အရည်အသွေးမပြည့်မီဘဲ ရောင်းချနေသည့် ပရီမီယမ်ဒီဇယ်ဆီအတွက် ကျပ်ငါးသိန်း တို့ကို မြန်မာ့ရေနံထွက်ပစ္စည်းရောင်းဝယ်ရေးလုပ်ငန်း (လားရှိုး) ၏ ဘဏ်စာရင်းအသွင်းပေးသွင်း၍ ဒဏ်ငွေဆောင်စေခဲ့ခြင်းဖြစ်ကြောင်း သိရသည်။

လားရှိုးမြို့ရှိ စက်သုံးဆီအရောင်းဆိုင်ကြီးများအား စစ်ဆေးသည့်အဖွဲ့တွင် မြန်မာ့ရေနံထွက်ကုန်ပစ္စည်း ရောင်းဝယ်ရေးဌာန၊ စားသုံးသူရေးရာဦးစီးဌာန၊ အထွေထွေအုပ်ချုပ်ရေး(ခရိုင်)၊ မြန်မာနိုင်ငံရဲတပ်ဖွဲ့( ခရိုင် )၊ လားရှိုးခရိုင်မီးသတ်တပ်ဖွဲ့၊ လားရှိုးခရိုင်စည်ပင်သာယာရေးဌာန တို့ပါဝင်သည့် ပူးပေါင်းအဖွဲ့က စစ်ဆေးခဲ့ခြင်း ဖြစ်သည်။

သတင်း #နေဖြိုးမြင့်
ဓါတ်ပုံ DOCA ( lashio )