~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံတွင် စိတ်ကြွဆေးပြားနှစ်သိန်းခွဲသယ်ဆောင်လာသူ (၃)ဦးကိုဖမ်းမိပြီးနောက် ဘဏ်စာရင်း (၁၇)ခုအပါအဝင် ပိုင်ဆိုင်မှုများကို သိမ်းဆည်း
**********
စိတ်ကြွဆေးပြား (၂)သိန်းခွဲနှင့် အိုက်စ် (၁.၂)ကီလိုဂရမ်သယ်လာသည့် ထိုင်းနိုင်ငံသား (၃)ဦးကို ထိုင်းနိုင်ငံမြောက်ပိုင်း နွန်ခွန်းကျေးရွာတွင် ၂၀၁၉ ခုနှစ်၊ ဧပြီလ (၂၀)ရက်နေ့ နံနက်အစောပိုင်းက ပစ်ခတ်ဖမ်းဆီးရမိပြီးနောက် ဘဏ်စာရင်း (၁၇)ခုအပါအဝင် ၎င်းတို့၏ပိုင်ဆိုင်မှုများကို သိမ်းဆည်းလိုက်ကြောင်း သိရသည်။

ရဲနှင့်စစ်တပ်တို့ပူးပေါင်းပါဝင်သည့် ပူးပေါင်းအဖွဲ့က နွန်ခွန်းကျေးရွာအနီး လမ်းမတွင် နံနက်(၄)နာရီအချိန်က မောင်းနှင်လာသည့် မော်တော်ယာဉ်တစ်စီးအား စစ်ဆေးရန် တားမြစ်သည်ကို မရပ်ဘဲမောင်းနှင်ထွက်ပြေးသဖြင့် မော်တော်ယာဉ်၏ရှေ့ဘီးကို ပစ်ခတ်တားဆီးခဲ့ရကြောင်း သိရသည်။

ကျေးရွာတံတားတွင် ရပ်တန့်သွားသည့်ကားအတွင်းမှ ထိုင်းနိုင်ငံသား (၃)ဦးနှင့်အတူ စိတ်ကြွဆေးပြားများ၊ အိုက်စ်များကို စစ်ဆေးတွေ့ရှိရသဖြင့် တရားမဝင် မူးယစ်ဆေးဝါးများ လက်ဝယ်ထားရှိမှု၊ ရောင်းချမှုနှင့် တာဝန်ထမ်းဆောင်နေသည့် ဝန်ထမ်းများကို ခုခံမှု၊ သတ်ရန်ကြံစည်မှုတို့ဖြင့် အရေးယူထားကြောင်း သိရသည်။

ဖမ်းဆီရမိသူ (၃)ဦး၏နေအိမ်များကို ဆက်လက်ရှာဖွေရာ ဘဏ်စာရင်း (၁၇)ခု၊ ကား၊ ဆိုင်ကယ်၊ ရွှေလက်ဝတ်ရတနာများနှင့် အခြားတန်ဖိုးရှိပစ္စည်းများကို ရှာဖွေတွေ့ရှိ သိမ်းဆည်းထားကြောင်း သိရသည်။

အဆိုပါ (၃)ဦးမှာ အိမ်နီးချင်းနိုင်ငံတစ်ခုမှ မူးယစ်ဆေးသယ်ဆောင်ရောင်းဝယ်နေသူများဖြစ်သည်ဟု ရဲတပ်ဖွဲ့က ပြောကြားထားသည်။

Tachileik News Agency
Ref:Bangkok Post