~~~~~~~~⊰❂ Unicode Version ❂⊱~~~~~~~~

ကယ်လီဖိုးနီးယားတွင် သားသမီးများကို ညှင်းပန်းနှိပ်စက်သည့်မိဘများအား ထောင်ဒဏ် (၂၅)နှစ် ချမှတ်
***********
အမေရိကန်ပြည်ထောင်စု၊ ကယ်လီဖိုးနီးယားတွင် သားသမီးများကို ညှင်းပန်းနှိပ်စက်သည့်မိဘများအကြောင်း တာဝန်ရှိသူများထံ ကလေးတစ်ဦးက သတင်းပို့နိုင်ခဲ့သည့်အတွက် တရားရင်ဆိုင်နေရသည့် မိဘနှစ်ဦးကို ၂၀၁၉ ခုနှစ်၊ ဧပြီလ (၁၉)ရက်နေ့က ထောင်ဒဏ် (၂၅)နှစ်ချမှတ်လိုက်ကြောင်း သိရသည်။

အဆိုပါဇနီးမောင်နှံတွင် ကလေး (၁၃)ဦးရှိသည့်အနက် (၁၂)ဦးမှာ ညှင်းပန်းနှိပ်စက်ခံခဲ့ရခြင်းဖြစ်ပြီး မိဘများအား အမိန့်ချမှတ်ရာ တရားရုံးချိန်းသို့ ကလေးများလည်း လာရောက်ခဲ့ကြပြီး ၎င်းတို့မိဘများ ကျခံရမည့်ပြစ်ဒဏ်နှင့်ပတ်သက်၍ ပြောကြားခဲ့ကြကာ ကလေးများအား ဓါတ်ပုံ၊ ဗီဒီယိုရိုက်ကူးခွင့်ကို တရားရုံးက တားမြစ်ပေးခဲ့ကြောင်း သိရသည်။

 “အခုချိန်ထိ အရိုက်ခံရတာကို အိပ်မက်ဆိုးတွေမက်နေတုန်းပါပဲ”ဟု ကလေးတစ်ဦးက တရားရုံးတွင် ပြောကြားသွားသည်။

ဆိုးဆိုးဝါးဝါးဖြတ်သန်းခဲ့ရသည့်နေ့ရက်များကြောင့် ပိုမိုသန်မာလာခဲ့ရသည်ဟု နံပါတ်(၄)သမီးဖြစ်သူက ပြောကြားသည်။

“ကျွန်မ မိဘတွေက ဘဝတစ်ခုလုံးကို ယူဆောင်သွားခဲ့ပါတယ်။ ဒါပေမဲ့ အခုတော့ ကျွန်မဘဝကို ပြန်ရပါပြီ”ဟု သမီးဖြစ်သူက ပြောကြားသွားသည်။

ကလေးများက မိဘများအား ချစ်နေဆဲဖြစ်ကြောင်းနှင့် မိဘများအပေါ် ချမှတ်ထားသည့် ပြစ်ဒဏ်ကို လျှော့ပေါ့ပေးစေလိုကြောင်း ကလေးတစ်ဦးက ပြောကြားခဲ့သည်။

“ကျွန်တော်တို့မိဘတွေက ကျွန်တော်တို့ (၁၃) ယောက်ကို သူတို့တတ်နိုင်သမျှ ပြုစုစောင့်ရှောက်ခဲ့ကြတာပါ။ ထောင်ဒဏ် (၂၅) နှစ်က ကြာလွန်းတယ်လို့ ကျွန်တော်ထင်ပါတယ်”ဟု ကလေးတစ်ဦးက ပြောကြားခဲ့ကြောင်း သိရသည်။

ဒေးဗစ်တာပင်နှင့် လူးဝစ်တာပင်တို့၏ သမီးနှစ်ဦးမှာ ကလေးမယူနိုင်တော့သည့် အခြေအနေ ရောက်နေသည့်အပြင် ကလေးအချို့မှာ ကြွက်သားများ ပြင်းပြင်းထန်ထန် ဒဏ်ရာရထားသည့် အခြေအနေရောက်သည်အထိ ညှင်းပန်းနှိပ်စက်ခံထားရသဖြင့် ကလေးများ ပြုစုစောင့်ရှောက်ရန် လစ်ဟင်းမှုဖြင့် ၎င်းတို့ဇနီးမောင်နှံကို တရားစွဲဆိုခံရခြင်းဖြစ်ကြောင်း သိရသည်။

ကလေးများအား ညှင်းပန်းနှိပ်စက်လေ့ရှိရာ ၂၀၁၈ ခုနှစ်၊ ဇန်နဝါရီလက အသက် (၁၇)နှစ်အရွယ် သမီးဖြစ်သူက နေအိမ်ပြတင်းပေါက်မှခုန်ချထွက်ပြေးလွတ်မြောက်သွားပြီးနောက် ဆဲလ်ဖုန်းဖြင့် တာဝန်ရှိသူများအား ဆက်သွယ်ပြီး ထိတ်လန့်စရာကောင်းလှသည့် မိသားစု၏အခြေအနေကို အကြောင်းကြားနိုင်ခဲ့ခြင်းဖြစ်ကြောင်း သိရသည်။

“ကျွန်တော့်ကြောင့် သူတို့တွေ ဘေးဖြစ်စေခဲ့ရတဲ့အတွက် တောင်းပန်ပါတယ်။ မိဘတွေဖြစ်တဲ့ ကျွန်တော်တို့တစ်တွေ သူတို့အနားမှာ မရှိတော့ချိန်မှာ ကလေးတွေ စည်းစည်းလုံးလုံးနေခဲ့ကြမယ်လို့ မျှော်လင့်ပါတယ်။ သူတို့တစ်ဦးဆီတိုင်းအတွက် ကျွန်တော် ဂုဏ်ယူပါတယ်။ ကျွန်တော့် ကလေးတွေအားလုံးကို လွမ်းနေမှာပါ။ သူတို့အတွက် ဆုတောင်းပေးနေမှာပါ”ဟု ဖခင်ဖြစ်သူ ဒေးဗစ်တာပင်က ပြောကြားသည်။

မိခင်ဖြစ်သူ လူးဝစ်တာပင်၏ စာကို တရားရုံးတွင် ဖတ်ကြားခဲ့သည်။

“ကျွန်မတို့က သူတို့အားလုံးကို အကောင်းဆုံးဖြစ်စေချင်တာပါ။ သူတို့ ပျော်ရွှင်မှုက ကျွန်မအတွက် အရေးအကြီးဆုံးပါပဲ”ဟု မိခင်ဖြစ်သူက ဆိုသည်။

အသက် (၅၇)နှစ်အရွယ် ဒေးဗစ်တာပင်မှာ အင်ဂျင်နီယာတစ်ဦးဖြစ်ပြီး အသက် (၅၀)အရွယ် ဇနီးဖြစ်သူ လူးဝစ်တာပင်မှာ ၂၀၁၁ ခုနှစ်ကတည်းက ဘဏ်ကိုအကြွေးမဆပ်နိုင်တော့ကြောင်း ဒေဝါလီခံထားသည့် အိမ်ရှင်မတစ်ဦးဖြစ်ကြောင်း သိရသည်။

Tachileik News Agency
Ref: Fox News