~~~~~~~~⊰❂ Unicode Version ❂⊱~~~~~~~~

မယ်ဆိုင်ဂူအတွင်းမှ ကယ်ဆယ်ရေးသုံးပစ္စည်းများ သယ်ထုတ်နေ၍ လည်ပတ်ခွင့်ကို (၃)ရက်ကြာ ပိတ်ထား
**************
ထိုင်းနိုင်ငံ၊ မယ်ဆိုင်မြို့ ထမ့်လွမ်ဂူအတွင်း ကယ်ဆယ်ရေးလုပ်စဉ်က ကျန်ခဲ့သည့် ကယ်ဆယ်ရေးပစ္စည်းများကို ထိုင်းရေတပ်အထူးအဖွဲ့ဝင်များက သယ်ထုတ်နေကြ၍ ထမ့်လွမ်ဂူအား ၂၀၁၉ ခုနှစ်၊ မတ်လ (၁၈) ရက်နေ့မှစ၍ (၃) ရက်ကြာ ယာယီပိတ်ထားကြောင်း သိရသည်။

ဂူကိုပိတ်ထားသည့် (၃)ရက်တာအတွင်း ဥယျာဉ်အတွင်းရှိ အခြားနေရာများသို့ လည်ပတ်ခြင်းကို ခွင့်ပြုထားပြီး ကယ်ဆယ်ရေးပစ္စည်းများ ဒုတိယအကြိမ် သယ်ထုတ်မည့် မတ်လ (၂၆)ရက်နေ့မှ (၂၉)နေ့အထိကိုလည်း ထပ်မံပိတ်သွားမည်ဖြစ်ကြောင်း သိရသည်။

ဂူအတွင်း အောက်ဆီဂျင်ဗူး (၃၀၀)ထက်မနည်း၊ ရေပိုက်များ၊ လေပိုက်များ၊ လျှပ်စစ်မီးကြိုးများအပါအဝင် ကယ်ဆယ်ရေးသုံးပစ္စည်းများ ကျန်နေသဖြင့် ခြောက်သွေ့ရာသီအတွင်း သယ်ထုတ်ရန် တာဝန်ရှိသူများက ဆုံးဖြတ်လိုက်ပြီး တပ်ဘက်မှ အင်အား (၂၀၀)ခန့်၊ အရပ်ဖက်တာဝန်ရှိသူများနှင့် ကူညီသူများပါဝင်သည့်အဖွဲ့က ဆောင်ရွက်နေကြခြင်းဖြစ်သည်။

ရေတပ်အဖွဲ့က ပစ္စည်းများဝင်ရောက်မသယ်ဆောင်မီ ကယ်ဆယ်ရေးအတွင်း သေဆုံးခဲ့ရသည့် ရေတပ်အထူးအဖွဲ့မှ တပ်ကြပ်ဟောင်း ဆာမန်ခူနန်ကို အောက်မေ့ခြင်းနှင့် ဘာသာရေးထုံးစံအရ ဆုတောင်းခြင်းများကို ပြုလုပ်ခဲ့ကြကြောင်း သိရသည်။

ဂူအတွင်းပိတ်မိနေသည့် ကလေး(၁၂)ဦးနှင့် လူငယ်(၁)ဦးကို ၂၀၁၈ ခုနှစ်၊ ဇူလိုင်လ (၁၀)ရက်နေ့က ကယ်ဆယ်မှုအပြီးတွင် ကျန်ခဲ့သည့် ကယ်ဆယ်ရေးလုပ်ငန်းသုံးပစ္စည်းများကို ပထမဆုံးအကြိမ် ပြန်လည်သယ်ထုတ်ခြင်းဖြစ်ပြီး ရေမြုပ်နေသည့် ဂူအတွင်းပိတ်မိနေသူများကို ကယ်ဆယ်ရေးအတွက် နိုင်ငံတကာမှ ရေငုပ်သမားများစွာ ပူးပေါင်းပါဝင်ခဲ့ကာ ကမ္ဘာ့မီဒီယာများက ရေးသားဖေါ်ပြမှုများကြောင့် လူစိတ်မှုများလာသဖြင့် ကယ်ဆယ်ရေးလုပ်ငန်းပြီးသွားချိန်တွင် ပြည်တွင်း၊ ပြည်ပမှ လာရောက်လည်ပတ်သူ များလာနေကြောင်း သိရသည်။

လတ်တလောတွင် မယ်ဆိုင်မြို့အပါအဝင် ထိုင်းနိုင်ငံမြောက်ပိုင်းဒေသတွင် မီးခိုးမြူကြောင့် လေထုအရည်အသွေး ဆိုးရွားစွာကျဆင်းနေရာ လာရောက်လည်ပတ်သူ ပုံမှန်ထက်နည်းလာပြီး ထမ့်လွမ်ဂူသို့ လည်ပတ်သူအရေအတွက်လည်း လျော့ကျလာနေကြောင်း သိရသည်။

Tachileik News Agency
Ref: The Nation, Chiangrai Report