~~~~~~~~⊰❂ Unicode Version ❂⊱~~~~~~~~

ထိုင်း - မြန်မာ နယ်စပ်တစ်လျှောက်တွင် တောမီးရှို့မှုများကြောင့် မီးခိုးများနှင့် ပြာစများမှာ မြို့တွင်းသို့ လေနှင့်အတူ ပါလာမှုကြောင့် ကျန်းမာရေးထိခိုက်မှုများ ဆိုးရွားစွာ မဖြစ်ပေါ်စေရေးအတွက် လူသူ သွားလာမှုများသည့် နေရာများတွင် မယ်ဆိုင်မြို့နယ်စည်ပင်သာယာရေးဌာန အပါအဝင် သက်ဆိုင်ရာများမှ ရေမှုန်ရေမွှားဖြန်းပက်ပေးမှုအဖြစ် မတ်လ(၁၃)ရက်နေ့က ရေလီတာပေါင်း (၃၆,ဝဝဝ)အသုံးပြုကာ နေရာ(၃)ခုတွင် ရေပက်ဖြန်းပေးခဲ့ကြောင်း မယ်ဆိုင်မြို့နယ်စည်ပင်သာယာရေးဌာန၏ သတင်းထုတ်ပြန်ထားချက်အရ သိရသည်။

မယ်ဆိုင်မြို့နယ်စည်ပင်သာယာရေးဌာန နှင့် သက်ဆိုင်ရာဌာများဖြင့် ပူးပေါင်းကာ ၂၀၁၉ခုနှစ် မတ်လ(၁၃)ရက်နေ့တွင် အဓိက နေရာ(၃)ခုဖြစ်သည့် မြန်မာ - ထိုင်းချစ်ကြည်ရေးအမှတ်(၁)တံတားထိပ်၊ မယ်ဆိုင်ရဲစခန်းရှေ့ နှင့် မယ်ဆိုင်မြို့နယ်ရုံးရှေ့တို့တွင် ယာဉ်အမှတ် ဆခွန်(၄) ဆခွန်(၅)ယာဉ်တို့ဖြင့် ရေလီတာပေါင်း (၃၆,ဝဝဝ)ကို သုံးစွဲကာ လေထုမှ မီးခိုးငွေ့များကို ရေ၏အရှိန်နှင့်အတူ အနည်းငယ်ပပျောက်နိုင်ရန် လုပ်ဆောင်ခြင်းဖြစ်ကြောင်း သိရသည်။

မတ်လ(၁၃)ရက်နေ့၏ အခြေအနေမှာ မယ်ဆိုင်မြို့ နှင့် တာချီလိတ်မြို့တွင် မီးခိုးများမှာ သိသိသာသာဖုံးလွှမ်းလာသည့် နည်းတူ ပြာစများလည်း လွှင့်ပါလာသည့်အတွက် မျက်ခမ်းစပ်မှုများ၊ လည်ပင်းယားမှုများနှင့် နှာမွန်ပြီး နှာစေးချောင်းဆိုးသူများ၊ နှာခေါင်းသွေးယိုသူများ တိုးလာကြောင်းလည်း သိရသည်။

"မယ်ဆိုင်မှာလည်း အတူတူပါပဲ အိမ်ထဲမှာလည်း မီးခိုးနံ့ရလို့ တံခါးတွေ အလုံပိတ်ထားရတယ်၊ ကျွန်တော်တောင် နေ့လည်က နှာခေါင်းသွေးတောင်ယိုတယ်၊"ဟု မယ်ဆိုင်မြို့နေ ဦးထွန်း(မယ်ဆိုင်)က တာချီလိတ်သတင်းအေဂျင်စီသို့ ပြောသည်။

ထိုင်းနိုင်ငံ၊ မယ်ဆိုင်မြို့တွင် နှစ်စဉ်နှစ်တိုင်း တောမီးခိုးများကြောင့် အများပြည်သူများ အနှောက်အယှက်ဖြစ်စေရပြီး ကျန်းမာရေးထိခို်က်မှုအထိပါ ဖြစ်ပေါ်သည့်အတွက် မီးခိုးများ ပပျောက်ရေးအတွက် ရေမှုန်ရေမွှားဖြန်းပက်ပေးမှုကို ပြုလုပ်လေ့ရှိရာတွင် ၂၀၁၉ခုနှစ် မတ်လ(၁၁)ရက်နေ့က စတင်ကာ မြို့တွင်း လူသူအသွားအလာအများဆုံး နေရာများဖြစ်သည့် ထိုင်း - မြန်မာ ချစ်ကြည်ရေး အမှတ်(၁)တံတားထိပ်၊ မယ်ဆိုင်ရဲစခန်းရှေ့၊ တောင်သူလယ်သမားဘဏ်ရှေ့၊ တရုတ်ဘုံကျောင်းရှေ့၊ မြို့နယ်ရုံးရှေ့တို့တွင်၂၀၁၉ခုနှစ် မတ်လ(၁၅)ရက်နေ့အထိ ဖြန်းပက်ပေးသွားရန် သတ်မှတ်ထားပြီး သတ်မှတ်ရက်အတွင်း မပျောက်ပါက ဆက်လက်လုပ်သွားရန် အစီအစဉ်ရှိကြောင်း သိရှိရသည်။

Tachileik News Agency
Photo: Tessaban Maesai