~~~~~~~~⊰❂ Unicode Version ❂⊱~~~~~~~~

ရှမ်းပြည်နယ်အရှေ့ပိုင်းနှင့်နယ်စပ် လာအိုနိုင်ငံမှ လျှပ်စစ်ဓါတ်အား ဝယ်ယူဖြန့်ဖြူးရေး မြန်မာကိုယ်စားလှယ်အဖွဲ့ သွားရောက်ဆွေးနွေးနေ
*****************
ရှမ်းပြည်နယ်အရှေ့ပိုင်းနှင့် နယ်နမိတ်ထိစပ်နေသည့် လာအိုနိုင်ငံမှ လျှပ်စစ်ဓါတ်အား ဝယ်ယူဖြန့်ဖြူးရေးအတွက် လျှပ်စစ်နှင့်စွမ်းအင်ဝန်ကြီးဌာန ပြည်ထောင်စုဝန်ကြီးဦးဆောင်သည့် မြန်မာကိုယ်စားလှယ်အဖွဲ့သည် လာအိုနိုင်ငံ၊ လန်ပရာဘန်မြို့သို့ သွားရောက်ဆွေးနွေးနေကြောင်း သိရသည်။

လျှပ်စစ်နှင့်စွမ်းအင်ဝန်ကြီးဌာန၊ ပြည်ထောင်စုဝန်ကြီး ဦးဝင်းခိုင် ဦးဆောင်သော မြန်မာကိုယ်စားလှယ်အဖွဲ့သည် လာအိုနိုင်ငံ၊ လန်ပရာဘန်မြို့တွင်ကျင်းပမည့် မြန်မာ-လာအို နှစ်နိုင်ငံ စွမ်းအင်နှင့်လျှပ်စစ်ကဏ္ဍ ပူးပေါင်းဆောင်ရွက်မှုဆိုင်ရာ ဝန်ကြီးအဆင့်ဆွေးနွေးပွဲနှင့် ဆက်စပ်လုပ်ငန်းညှိနှိုင်းအစည်းအဝေးတက်ရောက်ရန် ၂၀၁၉ ခုနှစ်၊ ဖေဖော်ဝါရီလ (၁၄) ရက်နေ့က ထွက်ခွာသွားခြင်းဖြစ်ကြောင်း သိရသည်။

မြန်မာ- လာအို လျှပ်စစ်နှင့်စွမ်းအင်ကဏ္ဍပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာအား ၂၀၁၈ ခုနှစ်၊ ဇန်နဝါရီလ (၁၅) ရက်နေ့တွင် လက်မှတ်ရေးထိုးခဲ့ခြင်းဖြစ်ပြီး အဆိုပါ နားလည်မှုဆိုင်ရာ စာချွန်လွှာအရ နှစ်ဖက်ကိုယ်စားလှယ်များပါဝင်သည့် ပူးပေါင်းဆောင်ရွက်ရေးကော်မတီနှင့် လုပ်ငန်းကော်မတီများဖွဲ့စည်းကာ နယ်စပ်ဖြတ်ကျော် ဓာတ်အားဝယ်ယူရောင်းချရေး၊ နည်းပညာဖလှယ်ရေးနှင့် ရင်းနှီးမြှုပ်နှံမှုဆိုင်ရာ အခွင့်အလမ်းများအား အပြန်အလှန် ဆွေးနွေးနေခြင်းဖြစ်ကာ လန်ပရာဘန်မြို့အစည်းအဝေးတွင် နှစ်နိုင်ငံရင်းနှီးမြှုပ်နှံမှုဆိုင်ရာ အချက်အလက်များဖလှယ်ရေးနှင့် ပူးပေါင်း ဆောင်ရွက်မှုတိုးမြှင့်ရေးဆိုင်ရာ အချက်အလက်များအား ဆွေးနွေးကြမည်ဖြစ်ကြောင်း သိရသည်။

ရှမ်းပြည်နယ်အရှေ့ပိုင်းနှင့် နယ်နမိတ်ချင်းထိစပ်နေသည့် လာအိုနိုင်ငံမှ လျှပ်စစ်ဓါတ်အား ဝယ်ယူဖြန့်ဖြူးနိုင်ရေးနှင့် လျှပ်စစ်ဓါတ်အားကဏ္ဍပူးပေါင်းဆောင်ရွက်ရေးအတွက် မြန်မာ - လာအို အစိုးရချင်းချိတ်ဆက်ဆောင်ရွက်နေခြင်းဖြစ်ပြီး ရှမ်းပြည်နယ်အရှေ့ပိုင်းအတွက် ထိုင်းနိုင်ငံမှ လျှပ်စစ်ဓါတ်အား ဝယ်ယူဖြန့်ဖြူးခြင်းကို မြို့ကော်မတီအနေဖြင့် ဆောင်ရွက်နေရသဖြင့် အစိုးရချင်း ချိတ်ဆက်ဆောင်ရွက်သည့် စနစ် ပြောင်းလဲကျင့်သုံးရန် ပြည်နယ်လွှတ်တော်တွင် အဆိုတင်ပြသွားရန် ကြိုးစားနေဆဲဖြစ်ကြောင်း သိရသည်။

Tachileik News Agency