~~~~~~~~⊰❂ Unicode Version ❂⊱~~~~~~~~

ကမ္ဘာကျော် Chanel ၏ဖန်တီးရှင် ကားလ်လာဂါဖဲ၏ ဗမာကြောင် ဒေါ်လာသန်း (၃၀၀) အမွေဆက်ခံခွင့်ရရှိ
*******
ဂျာမန်နာမည်ကျော်ဖက်ရှင်ဒီဇိုင်နာ ကားလ်လာဂါဖဲ ၂၀၁၉ ခုနှစ်၊ ဖေဖေါ်ဝါရီလ (၁၉)ရက်နေ့တွင် သေဆုံးသွားပြီးနောက် သူ၏ကြောင် ရှုးပက်က အမွေဆက်ခံသူအဖြစ် ဒေါ်လာသန်း (၃၀၀) လက်ခံရရှိသွားကြောင်း သိရသည်။

ပြင်သစ်အမည်မှည့်ခေါ်ထားသည့် ရှုးပက်သည် ငွေရောင် ဗမာကြောင်အမျိုးအစားဖြစ်ပြီး နေ့စဉ်အစားအသောက်အဖြစ် ကာဗီယာငါးနှင့် chicken pate တို့ကိုသာ စားသုံးရသည့်အပြင် ခရီးသွားရာတွင် ကိုယ်ပိုင်ဂျက်လေယာဉ်ဖြင့်သာ သွားလာရကြောင်း သိရသည်။

အမွေဆက်ခံသူ ရှုးပက်အနေဖြင့် အမွေဆက်ခံရခြင်းမရှိပါကလည်း တစ်နှစ်လျှင် ဝင်ငွေ အမေရိကန်ဒေါ်လာ (၃)သန်းခန့် ဝင်ငွေရှိနေသည့်ကြောင်ဖြစ်ပြီး အင်စတာဂရမ်တွင် follower ပေါင်း (၂၆)သိန်းကျော်ဖြင့် ကျော်ကြားလှသည့်ကြောင်ဖြစ်သည်။

ရှုးပက်သည် ဂျာမန်ကားအမှတ်တံဆိပ် Opel ၏ အမှတ်တံဆိပ်သံတမန်လည်းဖြစ်ပြီး Shu Uemura နှင့် အဆင့်မြင့် ကြောင်ပစ္စည်းထုတ်ကုန်ဖြစ်သည့် Cheshire & Wain တို့၏ ကြော်ငြာရှင်လည်းဖြစ်သည်။

ကားလ်လာဂါဖဲက သူမရှိချိန်တွင် ရှုးပက်အားထိန်းသိမ်းစောင့်ရှောက်ရသူအနေဖြင့် စိတ်ပူရန်မလိုဘဲ စောင့်ရှောက်နိုင်မည်ဖြစ်ကြောင်း ပြောကြားခဲ့သည်ဟု သိရသည်။

“သူက ချမ်းသာတဲ့ကောင်မလေးလေ”လို့ ကားလ်လာဂါဖဲက ပြောခဲ့ကြောင်း သိရသည်။

ကမ္ဘာကျော် Chanel ၏ ဖန်တီးရှင် ကားလ်လာဂါဖဲသည် ပြင်သစ်နိုင်ငံတွင် နေထိုင်သော်လည်း ဂျာမန်နိုင်ငံသားဖြစ်သည့်အတွက် ၎င်း၏ချစ်လှစွာသော အိမ်မွေးကြောင်အား အမွေဆက်ခံပိုင်ခွင့် ပေးနိုင်ခဲ့ခြင်းဖြစ်ကြောင်း သိရသည်။

ပြင်သစ်နိုင်ငံ ဥပဒေအရ အိမ်မွေးတိရိစ္ဆာန်များအား အမွေဆက်ခံခွင့်မပေးထားသော်လည်း ဂျာမန်နိုင်ငံသားဖြစ်သူ လာဂါဖဲက  ပိုင်ဆိုင်မှုများကို သူ၏အိမ်မွေးကြောင် ရှုးပက်အား အမွေဆက်ခံသူအဖြစ် သေတမ်းစာဖြင့် လွှဲပြောင်းပေးနိုင်ခဲ့ခြင်းဖြစ်သည်။

Tachileik News Agency
Ref:COS