~~~~~~~~⊰❂Unicode Version ❂⊱~~~~~~~~

တာချီလိတ် - မိုင်းဆတ်လမ်း ၂၀၁၉ ခုနှစ်အတွင်း စတင်ပြင်ဆင်မည်ဖြစ်ပြီး ခန့်မှန်း ကျပ်ဘီလီယံ (၆၀)ခန့် သုံးစွဲရမည်
*************
"ဝ"အထူးဒေသ(၂)မှ လွှဲပြောင်းပေးထားသည့် ရှမ်းပြည်နယ်အရှေ့ပိုင်း၊ တာချီလိတ်နှင့် မိုင်းဆတ် ခရိုင်ချင်းဆက်လမ်းကို (၁၈) ပေအကျယ် ကွန်ကရစ်လမ်းအဖြစ် ၂၀၁၉ ခုနှစ်အတွင်း စတင်ပြုပြင်မည်ဖြစ်ပြီး ခန့်မှန်းကုန်ကျစရိတ် ကျပ်ဘီလီယံ (၆၀) ခန့်သုံးစွဲရမည်ဖြစ်ကြောင်း သိရသည်။

အဆိုပါ ခရိုင်ချင်းဆက်လမ်းပိုင်းတွင် တံတား (၁၂၄)စင်းရှိနေပြီး လမ်းပိုင်းပြုပြင်မှုကုန်ကျစရိတ်တွင် အဆိုပါတံတားများပြုပြင်ခြင်းအပါအဝင် ရေနှုတ်မြောင်းတူးဖေါ်ခြင်းများလည်း ပါဝင်ကြောင်း သိရသည်။

“တာချီလိတ် - မိုင်းဆတ်လမ်း မိုင် (၆၀)နဲ့ (၄)ဖာလုံကို (၁၈)ပေအကျယ် ကွန်ကရစ်လမ်းခင်းရင် ခန့်မှန်း ဘီလီယံ (၆၀)ကုန်ကျမယ်လို့ ခန့်မှန်းထားတယ်။ အဲဒါကို ပြည်ထောင်စုနဲ့ ပြည်နယ်အစိုးရဘတ်ဂျက်နှစ်ခု ပေါင်းပြီး လုပ်မယ်။ လမ်းခင်းရင် (၃)နှစ်လောက်အချိန်ယူရမယ်။ ဒီနှစ်မှာ စခင်းမယ်”ဟု အဆိုပါလမ်းပိုင်း ကွင်းဆင်းစစ်ဆေးရေးလုပ်ဆောင်သည့်အဖွဲ့တွင် ပါဝင်သည့် တာချီလိတ်မြို့မှ အမျိုးသား လွှတ်တော်ကိုယ်စားလှယ် ဦးစိုင်းလုံစံခတ်က တာချီလိတ်သတင်းအေဂျင်စီသို့ ပြောသည်။

အဆိုပါ ခရိုင်ချင်းဆက်လမ်းအပါအဝင် ကျေးလက်လမ်းများကို “ဝ”အထူးဒေသ(၂)ထံမှ ၂၀၁၈ ခုနှစ်၊ နိုဝင်ဘာလ (၃၀) ရက်နေ့ နံနက် (၉) နာရီ၌ ပြည်နယ်အစိုးရဝန်ကြီးများဦးစီးသည့်အဖွဲ့က လွှဲပြောင်း လက်ခံခဲ့ခြင်းဖြစ်ပြီး ခရိုင်ချင်းဆက်လမ်းကို လမ်းတံတားဦးစီးဌာနအပိုင် ပြည်နယ်အစိုးရ၏ စီမံခန့်ခွဲမှု အောက်တွင် ထားရှိခြင်းဖြစ်ကြောင်း သိရသည်။

အဆိုပါလမ်းပိုင်းအား လွှဲပြောင်းလက်ခံရန်ညှိနှိုင်းဆဲကာကလတည်းက ပြုပြင်ရေးအတွက် ကွင်းဆင်းစစ်ဆေးမှုများ၊ တိုင်းတာတွက်ချက်မှုများကို လုပ်ဆောင်နေခြင်းဖြစ်ပြီး ၂၀၁၈ ခုနှစ်၊ ဒီဇင်ဘာလ (၃၀)ရက်နေ့မှစ၍ ပြည်ထောင်စု လမ်းပန်းဆက်သွယ်ရေးဝန်ကြီးဌာန လမ်းဦးစီး ညွန်ချုပ် ဦးအုန်းလွင် ဦးဆောင်သော လွှတ်တော်ကိုယ်စားလှယ်များ၊ လမ်းဦးစီးဌာန၊ ခရိုင်နှင့်မြို့နယ်အဆင့် သက်ဆိုင်ရာဌာန တာဝန်ရှိသူများပါဝင်သည့်အဖွဲ့က (၂)ရက်တာ ကွင်းဆင်းစစ်ဆေးကြကြောင်း သိရသည်။

 တာချီလိတ် - မိုင်းဆတ် ခရိုင်ချင်းဆက်လမ်းကို ၁၉၉၇ ခုနှစ်၊ အောက်တိုဘာလတွင် “ဝ”အထူးဒေသ(၂) စစ်ဒေသ (၁၇၁)မှ ဖောက်လုပ်ခဲ့ကာ လမ်း၏ အခက်ခဲအကြမ်းတမ်းဆုံးအပိုင်းဖြစ်သော လွယ်ဆမ်ဆုံတောင် အတက်အဆင်း (၆)မိုင်အား ၂၀၀၄ ခုနှစ်နှင့် ၂၀၀၅ ခုနှစ်များတွင် ကတ္တရာလမ်းခင်းခဲ့ပြီး ၂၀၀၄ ခုနှစ်မှ ၂၀၀၇ ခုနှစ်များအတွင်း (၃၅)မိုင် (၂)ဖာလုံအား ကျောက်စီလမ်းခင်းခြင်း၊ (၁၄)မိုင်အား အမာခံလမ်းခင်းခြင်းနှင့် (၄)မိုင် (၄)ဖာလုံအား မြေလမ်းခင်းခြင်းအဖြစ် တည်ဆောက်ခဲ့ခြင်းဖြစ်ကြောင်း သိရသည်။

Tachileik News Agency
ဓါတ်ပုံ - Tiger Wan, Sai Lonsan Khat