***********
ရှမ်းပြည်နယ်အရှေ့ပိုင်း၊ ကျိုင်းတုံမြို့တွင် အသားများကို ရေခဲသေတ္တာ၊ ရေခဲပုံး၊ ရေခဲအောက်ခံပါမှန်ဘောင် များဖြင့် ထည့်သွင်းရောင်းချခြင်းမရှိသည့် အသားကင်ဆိုင် (၁၇)ဆိုင်ကို ၂၀၁၉ ခုနှစ်၊ ဇန်နဝါရီလ (၁၁)ရက် နေ့က စစ်ဆေးတွေ့ရှိရ၍ အရေးယူထားပြီး ညွှန်ကြားချက်များနှင့် ညီညွတ်မှသာ ပြန်လည်ရောင်းချခွင့်ပြုမည် ဖြစ်ကြောင်း သိရသည်။
အဆိုပါ အကင်ဆိုင်များမှ အသားများကို စားသုံးသူအကာအကွယ်ပေးရေး ဥပဒေပုဒ်မ - ၁၉(င)နှင့်(စ)အရ သိမ်းဆည်းအရေးယူခဲ့ပြီး လုပ်ထုံးလုပ်နည်း ညွှန်ကြားချက်များနှင့်ညီညွတ်မှုရှိမှသာ ဆိုင်များအနေဖြင့် ပြန်လည်ဖွင့်လှစ် ရောင်းချခွင့်ရရှိကြမည်ဖြစ်ကြောင်း ကျိုင်းတုံခရိုင်စားသုံးသူအငြင်းပွားမှုဖြေရှင်းရေးအဖွဲ့ထံမှ သိရသည်။
အေးခဲအသားများသည် သတ်မှတ်အပူချိန်တွင် ထားရှိခြင်းမရှိပါက စားသုံးသူများကို ဘေးအန္တရာယ် ဖြစ်စေသဖြင့် အသားကင်ရောင်းချမည့် အသားများကို ရေခဲသေတ္တာ (သို့) ရေခဲပုံး (သို့) ရေခဲအောက်ခံပါမှန်ဘောင်များဖြင့် ရောင်းချရန် ၂၀၁၈ ခုနှစ်၊ သြဂုတ်လ (၃၁)ရက်နေ့မှစ၍ အသားကင်ဆိုင်များအား အသိပညာပေးခြင်းကို အကြိမ်ကြိမ် ဆောင်ရွက်ခဲ့ပြီးဖြစ်ကြောင်း သိရသည်။
ယင်းကဲ့သို့ အသိပညာပေးလုပ်ငန်းများ ဆောင်ရွက်ပြီးဖြစ်သဖြင့် ၂၀၁၉ ခုနှစ်၊ ဇန်နဝါရီလ(၉)ရက်နေ့၌ နောင်တုံကန်ပတ်လည်အပါအဝင် ရပ်ကွက်(၃)၊ ရပ်ကွက်(၄)နှင့် ရပ်ကွက်(၅)တို့ရှိ တောင်ကြီးလမ်း၊ နောင်ဖာလမ်းနှင့် လေယာဉ်ကွင်းလမ်းဘေးများရှိ အသားကင်ဆိုင်များကို ပူးပေါင်းအဖွဲ့ဖြင့် စစ်ဆေးခြင်းဖြစ်ကြောင်း သိရသည်။
ယင်းကဲ့သို့ စစ်ဆေးမှုကို ကျိုင်းတုံခရိုင်စားသုံးသူအငြင်းပွားမှုဖြေရှင်းရေးအဖွဲ့ အတွင်းရေးမှူး ဦးသန်းစိုးနှင့် စားသုံးသူရေးရာဦးစီးဌာန ဒုတိယပြည်နယ်ဦးစီးမှူးရုံးဝန်ထမ်းများ၊ ခရိုင်ကျန်းမာရေးဦးစီးဌာန၊ ခရိုင်စက်မှုကြီးကြပ်၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးဌာန၊ မြို့နယ်ရဲတပ်ဖွဲ့၊ ရပ်ကွက်အုပ်ချုပ်ရေးမှူးများနှင့် စာရေးများပါဝင်သည့် ပူးပေါင်းအဖွဲ့ဖြင့် ဆောင်ရွက်ခြင်းဖြစ်ကြောင်း သိရသည်။
Tachileik News Agency
ဓါတ်ပုံ-စားသုံးသူရေးရာဦးစီးဌာန
