~~~~~~~~⊰❂Unicode Version ❂⊱~~~~~~~~

အမြန်လမ်းမကြီးတွင် ဆိုင်ကယ်ဖြင့်ဖြတ်ကူးစဉ် ခရီးသည်တင်ယာဉ်နှင့်တိုက်မိ၍ သေဆုံးသွားသည့် ဆိုင်ကယ်မောင်းသူအား အမှုဖွင့်ထား
***********
အမြန်လမ်းမကြီးတွင် ဆိုင်ကယ်မောင်းနှင်ခွင့်မရှိသော်လည်း မန္တလေးတိုင်းဒေသကြီး၊ တံတားဦးမြို့နယ် အတွင်းရှိ ရန်ကုန် - မန္တလေးအမြန်လမ်းတွင် ဆိုင်ကယ်နှင့် ခရီးသည်တင်မှန်လုံယာဉ်တို့ တိုက်မိ၍ ဆိုင်ကယ်မောင်းနှင်သူ အခင်းဖြစ်နေရာတွင် သေဆုံးသွားကြောင်း သိရသည်။

မန္တလေးတိုင်းဒေသကြီး၊ တံတားဦးမြို့နယ်၊ ရန်ကုန်- မန္တလေးအမြန်လမ်း မိုင်တိုင်အမှတ်(၃၃၂/ဝ)အနီးတွင်  ၂၀၁၉ ခုနှစ်၊ ဇန်နဝါရီလ (၁)ရက်နေ့  နေ့လယ်(၁)နာရီခွဲဝန်းကျင်တွင်  ယာဉ်တိုက်မှုဖြစ်ပွားကြောင်း သတင်းအရ တံတားဦးအမြန်လမ်းမကြီးရဲစခန်းမှတပ်ဖွဲ့ဝင်များ၊ အမြန်လမ်းမီးသတ်တပ်ဖွဲ့ဝင်များ ပါဝင်သော ပူးပေါင်းအဖွဲ့က သက်သေများနှင့်အတူ သွားရောက်စစ်ဆေးခဲ့ခြင်းဖြစ်ကြောင်း သိရသည်။

အခင်းဖြစ်နေရာတွင် လမ်းဖြတ်ကူးသည့်ဆိုင်ကယ်အား ခရီးသည်တင်မီနီဘတ်စ်ယာဉ်က ဝင်တိုက်မိပြီး ဆိုင်ကယ်မောင်းနှင်သူ အသက် (၄၈)နှစ်အရွယ် ဘိုကျော်မှာ နေရာတွင် သေဆုံးနေသည်ကို စစ်ဆေးတွေ့ရှိရကြောင်းသိရသည်။

အမြန်လမ်းတွင် ဆိုင်ကယ်မောင်းနှင်ခဲ့သည့် သေဆုံးသူ ဘိုကျော်အား စကားအင်းအမြန်လမ်းမကြီး ရဲစခန်းတွင် ယာဉ်(ပ)၃/၂၀၁၈၊ အမြန်လမ်းမကြီးများဥပဒေပုဒ်မ (၁၈) ဖြင့် အမှုဖွင့်အရေးယူထားကြောင်း သိရသည်။

အမြန်လမ်းမကြီးများတွင် သုံးဘီး၊ ဆိုင်ကယ်နှင့် အနှေးယာဉ်များ တက်ရောက်မောင်းနှင်ခွင့်မရှိဘဲ တက်ရောက်မောင်းနှင်ပါက အမြန်လမ်းမကြီးများဥပဒေဖြင့် အရေးယူခံရမည်ဖြစ်ကြောင်း သိရသည်။

Tachileik News Agency
ဓါတ်ပုံ -Police