~~~~~~~~⊰❂ unicode ❂⊱~~~~~~~~

လူကုန်ကူးသူများက အင်တာနက်အသုံးပြုကာ လိမ်လည်ခေါ်ယူခြင်းနှင့် နိုင်ငံရပ်ခြားသို့ လိမ်လည်လက်ထပ်ခေါ်ဆောင်ခြင်း အဖြစ်များနေ
**********
လူကုန်ကူးသူများက We Chat၊ Facebook တို့အသုံးပြု၍ နိုင်ငံရပ်ခြား အလုပ်အကိုင်လိမ်လည်ခေါ်ယူခြင်း၊ မြန်မာအမျိုးသမီးများကို နိုင်ငံခြားသားများက လက်ထပ်ထိမ်းမြားခေါ်ဆောင်သွားပြီး လူကုန်ကူးခြင်းများကို သတိထားမိစေရန် မြန်မာ-ထိုင်းနယ်စပ် ရှမ်းပြည်နယ်အရှေ့ပိုင်း၊ တာချီလိတ်တွင် ၂၀၁၉ ခုနှစ်၊ ဇန်နဝါရီလဆန်းမှစ၍ လုပ်ဆောင်မည်ဖြစ်ကြောင်း သိရသည်။

“ကျွန်မတို့ လတ်တလောမှာတော့ လေဆိပ်နဲ့ မြို့အဝင်ဂိတ်တွေမှာ ပုံမှန်စောင့်ကြည့်ပြီး စစ်ဆေးဖို့ လိုတယ်ဆိုရင် ရုံးကိုခေါ် အသိပညာပေးဆွေးနွေးတာတွေလုပ်နေပါတယ်။ အသိပညာပေးလုပ်ငန်းတွေကိုတော့ လာမယ့် ဇန်နဝါရီလဆန်းမှာ လုပ်သွားမှာပါ။ ဒီဘက်မှာက ထိုင်းနိုင်ငံဘက်ကလည်း လူကုန်တားနဲ့ပတ်သက်ရင် ထဲထဲဝင်ဝင် လုပ်ဆောင်တဲ့အတွက် တရုတ်နယ်စပ်ဘက်ထက်စာရင် အလုပ်လုပ်ရတာ ပိုအဆင်ပြေပါတယ်” ဟု လူကုန်ကူးမှုတားဆီးနှိမ်နင်းရေးရဲတပ်ဖွဲ့၊ တပ်ဖွဲ့စိတ်(၁)တာချီလိတ်မှ တပ်ဖွဲ့စိတ်မှူး ရဲမှူးရင်ရင်အေးက တာချီလိတ်သတင်းအေဂျင်စီသို့ ပြောသည်။

လက်ရှိတွင် ဖိလစ်ပိုင်နိုင်ငံ၊ မနီလာမြို့တွင်နေထိုင်ကြသည့် တရုတ်လူမျိုးများက လူမှုကွန်ယက် We Chat မှ တစ်ဆင့် တရုတ်ဘာသာစကားပြောတတ်သည့် မြန်မာနိုင်ငံသားများအား ဝင်ငွေကောင်းသည့် အလုပ်ရရှိမည်ဖြစ်ပြီး လာရောက်မည့်စရိတ်များကို ကျခံပေးမည်ဟု စည်းရုံးကာ လောင်းကစားဒိုင်များတွင် ခိုင်းစေကာ လုပ်အားခေါင်းပုံဖြတ်ခြင်း၊ အနိုင်အထက်ပြုခြင်းနှင့် လစာနည်းနည်းသာပေး၍ ခိုင်းစေမှုများ ရှိနေခြင်း၊ မြန်မာအမျိုးသမီးများအား နိုင်ငံခြားသားများက တရားဝင်လက်ထပ်ထိမ်းမြား ခေါ်ဆောင်သွားပြီး လူကုန်ကူးမှု ကျူးလွန်နေခြင်း၊ ဂျပန်နိုင်ငံရှိ International Cultural Exchange One of Myanmar ကုမ္ပဏီ၏ Facebook စာမျက်နှာတွင် ဂျပန်အမျိုးသားများနှင့်လက်ထပ်ပါက လက်ထပ်လက်စွပ်နှင့် ငွေကျပ်သိန်း (၃၀)ပေးမည်ဖြစ်ကြောင်းနှင့် မိတ်ဆက်ပေးသူအား ဂျပန်ယန်း (၁)သိန်းပေးမည်ဟု ရေးသားဖော်ပြစည်းရုံးနေခြင်းများရှိနေသဖြင့် ရှမ်းပြည်နယ် အမှတ်(၁၅) လူကုန်ကူးမှုတားဆီးနှိမ်နင်းရေး ရဲတပ်ဖွဲ့စု (တောင်ကြီး)မှ တပ်ဖွဲ့ဝင်များက ရှမ်းပြည်နယ်တောင်ပိုင်းရှိ ဟဲဟိုးလေဆိပ်နှင့် တောင်ကြီးမြို့၊ လွိုင်လင်မြို့၊ နမ့်စန်မြို့များရှိကားဂိတ်များတွင် နယ်စပ်သွားမည့်သူများအား အသိပညာပေးခြင်းများကို ၂၀၁၈ ခုနှစ် ဒီဇင်ဘာလအတွင်း ဆောင်ရွက်နေခြင်းဖြစ်ကြောင်း သိရသည်။

ရှမ်းပြည်နယ်အရှေ့ပိုင်းဒေသတွင် မိန်းကလေးများကို လိင်ပိုင်းဆိုင်ရာအတွက် လူကုန်ကူးမှုအပြင် လုပ်အားခေါင်းပုံဖြတ်မှုများကို အများဆုံးတွေ့ရလေ့ရှိပြီး လူကုန်ကူးမှုတားဆီးနှိမ်နင်းရေးရဲတပ်ဖွဲ့၊ တပ်ဖွဲ့စိတ်(၁)တာချီလိတ်က တာချီလိတ်လေဆိပ်၊ မယ်ယန်းစစ်ဆေးရေးဂိတ်များတွင် စောင့်ကြည့်စစ်ဆေးမှုများကို လုပ်ဆောင်နေခြင်းဖြစ်ကြောင်း သိရသည်။

“ဒီဒေသကနေ တစ်ဖက်နိုင်ငံအလုပ်သွားလုပ်မယ့်သူတွေဆိုရင်လည်း သူတို့အနေနဲ့ နယ်စပ်ဖြတ်သန်းခွင့်စာအုပ်နဲ့ အလုပ်လုပ်ကိုင်ခွင့်ရှိကြောင်း ရှင်းလင်းပြောပြတယ်။ လိုအပ်တယ်ဆိုရင် သက်ဆိုင်ရာဌာနတွေနဲ့ချိတ်ဆက်ပြီး သူတို့တရားဝင်အလုပ်သွားလုပ်ကြဖို့ လုပ်ဆောင်ပေးပါတယ်” ဟု လူကုန်ကူးမှုတားဆီးနှိမ်နင်းရေးရဲတပ်ဖွဲ့၊ တပ်ဖွဲ့စိတ်(၁)တာချီလိတ်မှ တပ်ဖွဲ့စိတ်မှူး ရဲမှူးရင်ရင်အေးက ပြောသည်။

ထိုင်းနိုင်ငံသို့ အလုပ်သွားရောက်လုပ်ကိုင်မည့်သူများအနေဖြင့် လုပ်အားခေါင်းပုံဖြတ်ခံရခြင်းမရှိစေရန် တရားဝင်အလုပ်လုပ်ကိုင်ခွင့်ဖြင့် သွားရောက်ရန်နှင့် တာချီလိတ်မြို့ အိမ်ထောင်စုဇယားဖြင့် နေထိုင်သူများ အနေဖြင့် တစ်နှစ်သက်တမ်းပေးထားသည့် နယ်စပ်ဖြတ်သန်းခွင့်စာအုပ်ဖြင့် ထိုင်းနိုင်ငံ ချင်းရိုင်းခရိုင်အတွင်း ချင်းရိုင်း၊ မယ်စဲ့၊ ချင်းစဲန်မြို့များတွင်  (၃)လအလုပ်လုပ်ကိုင်ခွင့် ရယူလုပ်ဆောင်နိုင်ရန် ဆွေးနွေးမှုများလုပ်ဆောင်ပေးကြောင်း သိရသည်။

“နယ်စပ်ဖြတ်သန်းခွင့်တစ်နှစ်စာအုပ်နဲ့ သုံးလအလုပ်လုပ်ခွင့်စာအုပ်ကို ထိုင်းနိုင်ငံက လုပ်ပေးနေပါတယ်။ ဒါက တာချီလိတ်မြို့ခံတွေ၊ အိမ်ထောင်စုဇယားရှိသူတွေမှာ ပိုက်ဆံမကုန်ဘဲနဲ့ အလုပ်လုပ်ခွင့်လက်မှတ်ရတယ်။ ဒီက လဝက အထွက်တံဆိပ်ထုမယ်၊ ဟိုဘက်မှာအဝင်တံဆိပ်ထုမယ်၊ ပြီးရင် ထိုင်းဘက်က အလုပ်ရှင်နဲ့ အလုပ်သမားက ထိုင်းအလုပ်သမားရုံးကို သွားလိုက်ရင် (၃)လအလုပ်လုပ်ခွင့် စာအုပ်ရတယ်။ ဒါတွေကဆိုရင် ရွှေ့ပြောင်းလုပ်သားတွေအနေနဲ့ လုပ်အားခအပြည့်ရဖို့၊ လူကုန်ကူးခံရမှုကနေ လုံခြုံစိတ်ချရစေပါတယ်”ဟု လူကုန်ကူးမှုတားဆီးနှိမ်နင်းရေးရဲတပ်ဖွဲ့၊ တပ်ဖွဲ့စိတ်(၁)တာချီလိတ်မှ တပ်ဖွဲ့စိတ်မှူး ရဲမှူးရင်ရင်အေးက ပြောသည်။

ရှမ်းပြည်နယ်အရှေ့ပိုင်း၊ တာချီလိတ်ခရိုင်အတွင်း ထိုင်း၊ တရုတ်နှင့် လာအိုနိုင်ငံများဖြင့် နယ်နမိတ်ထိစပ်နေပြီး ထိုင်းနိုင်ငံနှင့် လာအိုနိုင်ငံတို့ဖြင့် အပြည်ပြည်ဆိုင်ရာနယ်စပ်ဝင်ထွက်ပေါက်များ ဖွင့်လှစ်ထားခြင်းဖြစ်သည်။

Tachileik News Agency