~~~~~~~~⊰❂ unicode ❂⊱~~~~~~~~

မယ်ဆိုင်မြို့တွင် ကျင်းပမည့် လူမျိုးစုများ၏ ရိုးရာယဉ်ကျေးဓလေ့ထုံးစံဆိုင်ရာနှီးနှောဖလှယ်ပွဲတွင် ရှမ်း၊ အာခါနှင့် ဗမာပြခန်းများ ပါဝင်မည်
*************
ထိုင်းနိုင်ငံ၊ မယ်ဆိုင်မြို့တွင် ၂၀၁၈ ခုနှစ်၊ ဒီဇင်ဘာလအတွင်းကျင်းပမည့် မယ်ဆိုင်မြို့တွင်နေထိုင်ကြသော လူမျိုးစုများ၏ လူနေမှုဘဝနှင့် ရိုးရာယဉ်ကျေးမှုဓလေ့ထုံးစံဆိုင်ရာနှီးနှောဖလှယ်ပွဲတွင် ရှမ်း၊ အာခါနှင့် ဗမာ ပြခန်းများ ပါဝင်ပြသသွားမည်ဖြစ်ကြောင်း သိရသည်။

မယ်ဆိုင်မြို့တွင် နေထိုင်ကြသည့် လူမျိုးစုများအလိုက် လူနေမှုဘဝနှင့် ရိုးရာယဉ်ကျေးမှု ဓလေ့ထုံးစံဆိုင်ရာ နှီးနှောဖလှယ်ပွဲကို နှစ်စဉ်ကျင်းပနေရာတွင် ရှမ်းနှင့်အာခါလူမျိုးစုများ၏ပြခန်းများကို နှစ်စဉ်ထည့်သွင်းခဲ့ပြီး (၆)နှစ်မြောက်ဖြစ်သည့် ၂၀၁၈ ခုနှစ်တွင် ဗမာလူမျိုးစုပြခန်းကို ပထမဆုံးအဖြစ် ထည့်သွင်းလာခြင်းဖြစ်ကြောင်း သိရသည်။

“မယ်ဆိုင်မှာ နေထိုင်ကြတဲ့ လူမျိုးစုတွေရဲ့ နေ့စဉ်ဘဝနေထိုင်မှုပုံစံ၊ ရိုးရာယဉ်ကျေးမှုတွေကို ပြသမှာပေါ့။ အရင်နှစ်တွေကတော့ မယ်ဆိုင်မှာ နေထိုင်ကြတဲ့ လူမျိုးစုတွေအဖြစ် ရှမ်း၊ အာခါတွေ ပါဝင်ပြသတယ်။ ဗမာတွေလည်း ဒီဘက်မှာ နေထိုင်တာတွေများလာတော့ ပါဝင်ပြသဖို့ ဖြစ်လာတာပါ။ ဒီပြပွဲအတွက်ကို သူတို့ကပဲ စပွန်ဆာပေးမှာပေါ့။ ဗမာပြခန်းအတွက်ဆိုလည်း အိမ်ဆောက်ဖို့ ခြံဝန်းတစ်ခုပေးထားတယ်။ အိမ်ကလည်း တကယ့်ဗမာတွေနေတဲ့အိမ်ပုံစံဖြစ်ရမယ်။ အိမ်ထဲကပစ္စည်းတွေဆိုရင်လည်း ရိုးရာအတိုင်း အသုံးပြုတဲ့ပစ္စည်းတွေဖြစ်ရမယ်။ အသစ်တွေမဖြစ်ရဘူး။ အိမ်ထဲဝင်လိုက်တာနဲ့ တကယ့်လူနေမှုပုံစံအတိုင်း ခံစားရအောင် လုပ်ရမှာပေါ့”ဟု တာချီလိတ်ခရိုင် အုပ်ချုပ်ရေးမှူးရုံးမှ မြန်မာ - ထိုင်း ဆက်ဆံရေးတာဝန်ခံ ဦးထွန်း(မယ်ဆိုင်)က တာချီလိတ်သတင်းအေဂျင်စီသို့ ပြောသည်။

ဗမာလူမျိုးစုပြခန်းလုပ်ဆောင်မည့်နေရာတွင် ရိုးရာအိမ်တည်ဆောက်နေမှုအား တာချီလိတ်ခရိုင် အုပ်ချုပ်ရေးမှူးရုံးမှ မြန်မာ - ထိုင်း ဆက်ဆံရေးတာဝန်ခံ ဦးထွန်း(မယ်ဆိုင်)က ပြပွဲဖြစ်မြောက်ရေးကော်မတီ ဥက္ကဌဖြစ်သူ မယ်ဆိုင်မြို့ယဉ်ကျေးမှုကော်မတီနာယက လောင်းပထန် ဝပ်ထနထမ်း ခွမ်းမားနစ်၊ ယဉ်ကျေးမှုကော်မတီဥက္ကဌဖြစ်သူ မယ်ဆိုင်မြို့တော်ဝန်ကတော် အကျေ့ဖောင်းတို့နှင့်အတူ ၂၀၁၈ ခုနှစ်၊ နိုဝင်ဘာလ(၃၀)ရက်နေ့တွင် သွားရောက်ကြည့်ရှုညှိနှိုင်းမှုများ လုပ်ဆောင်ခဲ့ကြောင်း သိရသည်။

အဆိုပါပြပွဲတွင် တာချီလိတ်မြို့မှ ဗမာတိုင်းရင်းသားယဉ်ကျေးမှုအဖွဲ့ကလည်း ရိုးရာယဉ်ကျေးမှုအကများ ပါဝင်ပြသနိုင်ရန် တာဝန်ယူထားကြောင်း သိရသည်။

ဗမာလူမျိုးစုယဉ်ကျေးမှုပြခန်းတွင် ရိုးရာအိမ်ပုံစံတည်ဆောက်ပြီး အိမ်အတွင်း နေ့စဉ်နေထိုင်မှုပုံစံအတိုင်း အသုံးအဆောင်ပစ္စည်းများ ထားရှိမည်ဖြစ်ပြီး ခြံဝန်းအတွင်း ဗမာရိုးရာအစားအစာ၊ ရိုးရာအသုံးအဆောင် ပစ္စည်းများရောင်းချသည့် ဆိုင်ခန်းများကိုလည်း ရောင်းချခွင့်ပြုမည်ဖြစ်ကြောင်း သိရသည်။

အဆိုပါပြပွဲရက်အား လက်ရှိအချိန်တွင် အတည်ပြုသတ်မှတ်ထားခြင်းမရှိသေးဘဲ ပြပွဲဖွင့်ပွဲတွင် ထိုင်းဘုရင်၏ အထူးကိုယ်စားလှယ်လည်း တက်ရောက်မည်ဖြစ်ကြောင်း သိရသည်။

အဆိုပါပြပွဲတွင် လူမျိုးစုများအလိုက် ရိုးရာအိမ်များအတွင်း သက်ဆိုင်ရာ လူမျိုးအလိုက်ရိုးရာပစ္စည်း၊ အစားအသောက်ဆိုင်ခန်းများ ဖွင့်လှစ်မည့်အပြင် ပြပွဲကွင်းပြင်တွင်လည်း အစားအသောက်နှင့် ကုန်ပစ္စည်းမျိုးစုံရောင်းချမည့် ဆိုင်ခန်းများရှိမည်ဖြစ်ကြောင်း သိရသည်။

ဗမာရိုးရာအိမ်တွင် ရိုးရာအစားအသောက်၊ ပစ္စည်းများရောင်းချလိုသူများရှိပါက ဖုန်း 089 637 6367 သို့ ဆက်သွယ်နိုင်ကြောင်း သိရသည်။

Tachileik News Agency
ဓါတ်ပုံ - U Htun