~~~~~~~~⊰❂ unicode ❂⊱~~~~~~~~

ကျိုင်းတုံမြို့တွင်း အရောင်းဆိုင်များအား ကွင်းဆင်းစစ်ဆေးပြီး FDA တားမြစ်နှင့် သက်တမ်းလွန် စားသောက်ကုန်များ သိမ်းဆည်း
************
ရှမ်းပြည်နယ် (အရှေ့ပိုင်း) ကျိုင်းတုံမြို့ရှိ စတိုးဆိုင်၊ ကုန်စုံဆိုင်နှင့် အလှကုန်ဆိုင်များအား ခရိုင်စားသုံးသူ အငြင်းပွားမှုဖြေရှင်းရေးအဖွဲ့က ၂၀၁၈ ခုနှစ်၊ နိုဝင်ဘာလ(၆)ရက်နေ့ နေ့လယ်ပိုင်းက ကွင်းဆင်းစစ်ဆေးရာ FDA မှ တားမြစ်ထားသော စားသောက်ကုန်များနှင့် သက်တမ်းလွန်စားသောက်ကုန်များကို သိမ်းဆည်းရမိကြောင်း သိရသည်။

“ အဓိကကတော့ သက်တမ်းလွန်တဲ့ စားသောက်ကုန်တွေကို သိမ်းဆည်းရမိတာများပါတယ်။ ပစ္စည်းဖြန့်တဲ့ ဒိုင်တွေက ဆိုင်ကို တစ်လတစ်ခါလာပြီး ပစ္စည်းပို့ရင်းနဲ့ အဲဒီသက်တမ်းလွန်တဲ့ စားသောက်ကုန်တွေကို လဲပေးတယ်လို့တော့ ပြောတယ်။ ဒါပေမဲ့ ဒါကိုတော့ ကျွန်တော်တို့က လက်မခံဘူး”ဟု ကျိုင်းတုံခရိုင် စားသုံးသူအငြင်းပွားမှုဖြေရှင်းရေးအဖွဲ့မှ အတွင်းရေးမှူ း ဦးသန်းစိုးက တာချီလိတ်သတင်းအေဂျင်စီသို့ ပြောသည်။

ယနေ့ သိမ်းဆည်းရမိသော စားသောက်ကုန်ပစ္စည်းများတွင် စားသုံးရန်မသင့်ကြောင်း FDA က ကြေငြာထားသည့် ဘုတ်ဆုံမအမှတ်တံဆိပ် အရောင်တင်မှုန့်၊ ထောက်ခံချက်မရှိသော တရုတ်နိုင်ငံထုတ် စားသောက်ကုန်ပစ္စည်းများနှင့် သက်တမ်းလွန် စားသောက်ကုန်ပစ္စည်းများကို သိမ်းဆည်းခဲ့ခြင်း ဖြစ်ကြောင်း သိရသည်။

“ဒီတစ်ခေါက်သိမ်းထားတဲ့ ပစ္စည်းတွေ၊  ပြီးခဲ့တဲ့လက သိမ်းဆည်းထားတဲ့ ကျပ်(၈)သိန်းကျော်တန်ဖိုးရှိတဲ့ စားသုံးရန်မသင့်တဲ့ ပစ္စည်းတွေနဲ့ စားသုံးသူကာကွယ်ရေးဥပဒေအရ ကျွန်တော်တို့ဆီတိုင်ကြားလို့ သိမ်းထားတဲ့ ကျပ်(၁၅)သိန်းတန်ဖိုးရှိတဲ့ ယိုးဒယားကလာတဲ့ ဝက်ခေါက်တွေနဲ့ ခရိုင်FDA က သိမ်းထားတဲ့ ဆေးဝါးတွေကို ပေါင်းပြီးတော့ ဒီလ(၉)ရက်နေ့မှာ မီးရထားကွင်းထဲမှာ မီးရှို့ဖျက်ဆီးသွားမှာ ဖြစ်ပါတယ်”ဟု ကျိုင်းတုံခရိုင် စားသုံးသူအငြင်းပွားမှုဖြေရှင်းရေးအဖွဲ့မှ အတွင်းရေးမှူ း ဦးသန်းစိုးက ပြောသည်။

ယင်းကဲ့သို့စစ်ဆေးမှုကို ကျိုင်းတုံခရိုင် စားသုံးသူအငြင်းပွားမှုဖြေရှင်းရေးအဖွဲ့မှ အတွင်းရေးမှူ း ဦးသန်းစိုးနှင့် ခရိုင်FDA မှ ခရိုင်ဦးစီးမှူး ဒေါက်တာ တေဇာဝင်း၊ ဒုတိယမြို့နယ်ပညာရေးမှူး ဦးဇော်လင်း၊ ခရိုင်ကျန်းမာရေး ဝန်ထမ်းများ၊ မြို့နယ် ရဲတပ်ဖွဲ့၊ စည်ပင်နှင့် တိမွေးကုမှ တာဝန်ရှိသူများ ပူးပေါင်းအဖွဲ့ဖြင့် လုပ်ဆောင်ခြင်းဖြစ်ကြောင်း သိရသည်။

သတင်း #ဇွဲမြတ်
ဓါတ်ပုံ - စားသုံးရေးရာ