~~~~~~~~⊰❂ unicode ❂⊱~~~~~~~~

ကျွဲနွားတင်ပို့ရောင်းချခြင်းအတွက် မွေးမြူရေးနှင့်ကုသရေးဦးစီးဌာနက ရရှိသည့်အခွန်ငွေကို ပြည်ထောင်စုအစိုးရအဖွဲ့နှင့် တိုင်းဒေသကြီး/ပြည်နယ်ရန်ပုံငွေနှစ်ခုလုံးသို့ ပေးသွင်းနေ
*********
ပြည်တွင်းပြည်ပသို့ ကျွဲ၊ နွားများတင်ပို့ရောင်းချရန် ကျန်းမာရေးစစ်ဆေးခြင်း၊ မွေးမြူရေးခြံလုပ်ငန်း မှတ်ပုံတင်ထုတ်ပေးခြင်းလုပ်ငန်းများမှရရှိသည့်အခွန်ငွေများကို တိုင်းဒေသကြီး/ ပြည်နယ်အစိုးရအဖွဲ့ ရန်ပုံငွေနှင့် ပြည်ထောင်စုအစိုးရအဖွဲ့ ရန်ပုံငွေများသို့ ပေးသွင်းနေကြောင်း သိရသည်။

ကျွဲနွားများကို ပြည်တွင်း၊ ပြည်ပသယ်ယူရောင်းချခြင်းများအတွက် စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာန၊ မွေးမြူရေးနှင့်ကုသရေးဦးစီးဌာနအနေဖြင့် ကျွဲ၊ နွားများကို ကာကွယ်ဆေးထိုးပြီးကြောင်း ထောက်ခံချက်လက်မှတ်ထုတ်ပေးခြင်း၊ တိရစ္ဆာန်ကျန်းမာရေးထောက်ခံချက်ထုတ်ပေးခြင်း၊ မွေးမြူရေးခြံလုပ်ငန်း မှတ်ပုံတင်လက်မှတ်ထုတ်ပေးခြင်းစသည်တို့အတွက်ရရှိသည့် အခကြေးငွေများကို တိုင်းဒေသကြီး/ ပြည်နယ် အစိုးရအဖွဲ့၏ ရန်ပုံငွေကို ပေးသွင်းနေခြင်းဖြစ်ပြီး ပြည်ပသို့တင်ပို့မည့် ကျွဲ၊ နွားများ အတွက် ကျန်းမာရေးစစ်ဆေးသည့်အခကြေးငွေ(Animal Quarantine Fees) ကို ပြည်ထောင်စုအစိုးရအဖွဲ့ ရန်ပုံငွေသို့ ပေးသွင်းနေခြင်းဖြစ်ကြောင်း သိရသည်။

ကျွဲနွားများကို တရုတ်နိုင်ငံသို့ နယ်စပ်လမ်းကြောင်းများမှနေ၍ တရားမဝင်တင်ပို့နေခြင်းများကြောင့် ပြည်တွင်း၌ ကျွဲ၊နွားကောင်ရေ မထိန်းသိမ်းနိုင်ခြင်း၊ အခွန်အခဆုံးရှုံးခြင်းနှင့် ရောင်းဝယ်သူများဈေးနှိမ်ခံရခြင်းများကြောင့် စိစစ်ပြီးတရားဝင်တင်ပို့ခွင့်ကို ၂၀၁၇ ခုနှစ်၊ အောက်တိုဘာလ(၉)ရက်နေ့က စတင်ခွင့်ပြုခဲ့ခြင်းဖြစ်သည်။

အဆိုပါခွင့်ပြုချက်အရ ပြည်ပတင်ပို့မည့်သူများအနေဖြင့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ပို့ကုန်လိုင်စင်ခွင့်ပြုချက်လိုအပ်မည်ဖြစ်ပြီး အသက်(၅)နှစ်နှင့်အထက်ကျွဲနွားများ၊ အထီးဖြစ်ပါက သင်းကွပ်ပြီးကို တင်ပို့ခွင့်ပြုထားခြင်းဖြစ်ကြောင်း သိရသည်။

ကျွဲနွားများကို ပြည်တွင်း၌သယ်ယူရောင်းချခွင့်အတွက်ကိုလည်း မွေးမြူရေးနှင့်ကုသရေးဦးစီးဌာန၊ မြို့နယ်စည်ပင်သာယာရေးအဖွဲ့၊ ရပ်ကွက်/ကျေးရွာအုပ်ချုပ်ရေးမှူး၊ မြို့နယ်/ခရိုင်စီမံခန့်ခွဲမှုကော်မတီတို့၏ ထောက်ခံချက်များဖြင့် ခွင့်ပြုထားခြင်းဖြစ်ကြောင်း သိရသည်။

ပြည်တွင်းပြည်ပသို့ တင်ပို့ရောင်းချနေသော ကျွဲ၊ နွားများအား ပြည်ထောင်စုအစိုးရနှင့် တိုင်းဒေသကြီး ပြည်နယ်အစိုးရတို့မှ မည်ကဲ့သို့ စီမံခန့်ခွဲပြီး ခွင့်ပြုထားသည်ကို သိလိုခြင်းနှင့် စပ်လျဉ်း၍ ၂၀၁၈ ခုနှစ်၊ နိုဝင်ဘာလ (၂၈) ရက်နေ့တွင်ကျင်းပသော ပြည်သူ့လွှတ်တော်အစည်းအဝေး၌ ပွင့်ဖြူမဲဆန္ဒနယ်မှ ဦးထွန်းထွန်းက မေးမြန်းသည်ကို စီးပွားရေးနှင့်ကူးသန်းရောင်းဝယ်ရေး ဒုတိယဝန်ကြီး ဦးအောင်ထူးက ပြန်လည်ဖြေကြားခဲ့ခြင်းဖြစ်သည်။

Tachileik News Agency