~~~~~~~~⊰❂ unicode ❂⊱~~~~~~~~

အစိုးရဌာနက ဦးဆောင်ကျင်းပသည့် ပထမဆုံးအပြည်ပြည်ဆိုင်ရာကုန်စည်ပြပွဲတွင် ရှမ်းပြည်နယ်မှ ပြခန်း (၁၂)ခန်း ပါဝင်ပြသမည်
*******************
အစိုးရဌာနက ဦးဆောင်ကျင်းပသည့် ပထမဆုံး အပြည်ပြည်ဆိုင်ရာကုန်စည်ပြပွဲကို ရှမ်းပြည်နယ်အစိုးရ၏ ပံ့ပိုးမှုဖြင့် တောင်ကြီးမြို့တွင် ၂၀၁၈ ခုနှစ် အောက်တိုဘာလ(၅)ရက်နေ့မှစ၍ (၄)ရက်ကြာကျင်းပမည်ဖြစ်ပြီး မြန်မာအပါအဝင် နိုင်ငံပေါင်း (၇)နိုင်ငံမှ ပြခန်းပေါင်း (၉၀)ကျော်ပါဝင်ပြသမည်ဖြစ်ကြောင်း သိရသည်။

“ဒါက စီးပွားကူးသန်းကဦးဆောင်ပြီး ရှမ်းပြည်နယ်အစိုးရက ပံ့ပိုးပေးတယ်။ အစိုးရဌာနက ဦးဆောင်ပြီးလုပ်တဲ့ အပြည်အပြည်ဆိုင်ရာကုန်စည်ပြပွဲဆိုရင် ဒါက တစ်နိုင်ငံလုံးမှာ ပထမဆုံးအကြိမ်ပါပဲ။ ပြပွဲမှာ ရှမ်းပြည်နယ်အတွက်ကတော့ ပြခန်း(၁၂)ခန်းကို အခမဲ့ပေးထားပါတယ်။ ရှမ်းပြည်နယ်က အဓိက ထွက်ကုန်တွေဖြစ်တဲ့ စားသောက်ကုန်၊ အင်းထဲက ထွက်ကုန်တွေ၊ သစ်သီးဝလံအသင်းက ပြခန်းတွေ ပါပါမယ်။ ကျန်တဲ့ဒေသတွေကပြခန်းတွေစာရင်းကတော့ စီးပွားကူးသန်းရုံးချုပ်က တိုက်ရိုက်ကိုင်တွယ်ပါတယ်”ဟု မြန်မာ့ကုန်သွယ်မှုမြှင့်တင်ရေးအဖွဲ့ တာဝန်ခံ၊ ကမ္ဘောဇကုန်သွယ်မှုဗဟိုဌာနမှ ဦးစောဝင်းကျော်က တာချီလိတ်သတင်းအေဂျင်စီသို့ ပြောသည်။

အဆိုပါကုန်စည်ပြပွဲအား ရှမ်းပြည်နယ်အစိုးရအဖွဲ့၊ မြန်မာ့ကုန်သွယ်မှုမြှင့်တင်ရေးအဖွဲ့၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနနှင့် Fenix Hub Exhibition Co.,Ltd တို့ ပူးပေါင်းစီစဉ်ခြင်းဖြစ်ကြောင်း သိရပြီး တောင်ကြီးမြို့ မိုးလုံလေလုံအားကစားကွင်းတွင် အောက်တိုဘာလ (၅) ရက်နေ့မှ (၈)ရက်နေ့အထိကျင်းပမည့်ပြပွဲတွင် ထိုင်းနိုင်ငံ၊ မလေးရှားနိုင်ငံ၊ ထိုင်ဝမ်၊ ဗီယက်နမ်နိုင်ငံ၊ တရုတ်နိုင်ငံ၊ ကိုရီးယားနိုင်ငံ၊ ဂျပန်နိုင်ငံနှင့် မြန်မာနိုင်ငံတို့မှ ထုတ်ကုန်များ ဝင်ရောက်ပြသကြမည်ဖြစ်ကြောင်း သိရသည်။

ပြပွဲကာလအတွင်း အောက်တိုဘာလ (၆)ရက်နေ့တွင် တောင်ကြီးပို့ကုန်များမြှင့်တင်ရေးဖိုရမ်ကို ထည့်သွင်းကျင်းပမည်ဖြစ်ပြီး အဆိုပါဖိုရမ်တွင် မြန်မာ့ကုန်သွယ်မှုမြှင့်တင်ရေးအဖွဲ့မှ ဒုတိယညွှန်ကြားရေးမှူး ဒေါက်တာသက်လွင်ဦး၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနနှင့် MOU ထိုးထားသည့်  PSI သင်တန်းကျောင်းမှ ဒေါက်တာမျိုးမင်း၊ ကော်ဖီအသင်းနှင့် သီဟိုအသင်းတို့မှ ဦးဆောင်ဆွေးနွေးကြမည် ဖြစ်ကြောင်း သိရသည်။

အဆိုပါပြပွဲတွင် လယ်ယာထွက်ကုန်ပစ္စည်းများ၊ စားသောက်ကုန်နှင့် အဖျော်ယာမကာများ၊ ကော်ဖီ၊ အဝတ်အထည်၊ အမှတ်တရလက်ဆောင်ပစ္စည်းအရောင်းဆိုင်များ၊ ကျောက်မျက်ရတနာနှင့် အလှဆင်ပစ္စည်းများ၊ တိုင်းရင်းဆေးဝါး၊ စက္ကူနှင့် စာရေးကိရိယာများ၊ ကျောင်းသုံးသင်ထောက်ကူပစ္စည်းများ၊ အိမ်သုံးလျှပ်စစ်ပစ္စည်းများ၊ ကားအလှဆင်ပစ္စည်းများ၊ လူသုံးကုန်ပစ္စည်းများ၊ အခြောက်ခံစက်များ၊ ရေသန့်ပစ္စည်းများ၊ GPS နှင့် Mobile Phone ဆက်စပ်ပစ္စည်းများ၊ အပူပေးအိပ်ရာခင်းများ၊ ဝန်ဆောင်မှုလုပ်ငန်းများနှင့် ရှမ်းပြည်နယ်ထွက်ကုန်ပစ္စည်းများအပါအဝင် ပြခန်းပေါင်း (၉၀) ခန့်ဖြင့် ပါဝင်ပြသသွားမည်ဖြစ်ကြောင်း သိရသည်။

Tachileik News Agency