~~~~~~~~⊰❂ unicode ❂⊱~~~~~~~~

“လွန်ခဲ့တဲ့ နှစ်ပတ်ကတည်းက မြို့နယ်အထွေထွေအုပ်ချုပ်ရေးဦးစီးဌာနကို တင်ပြထားပြီးတော့ ခရိုင်ကိုလည်း မိတ္တူတွဲထားပါတယ်။ အခုထိတော့ ဘာမှ မထူးခြားသေးဘူး။ ရပ်ကွက်ထဲမှာက သူ့ကလေး၊ ကိုယ့်ကလေး လူငယ်တွေ ဒီလောင်းကစားဂိမ်းခုံတွေကနေ ဆေးစွဲကြနဲ့ ကြာရင်လူငယ်တွေအတွက်က ရင်လေးစရာ ကောင်းနပြေီ။ ရပ်ကွက်ထဲကပဲ ဆေးစွဲပြီး ကိုယ့်မိသားစုကိုယ် ပြန်ရန်ရှာလို့ မိုင်းကိုး ဆေးဖြတ်စခန်း ပို့လိုက်ရတာကို (၃)ယောက်ရှိနပြေီ။ ဒီလိုမှ မတိုင်ရင်လည်း မရတော့ဘူးဆိုပြီး တိုင်ထားပေမဲ့ ဘာမှတော့ မလုပ်ပေးကြသေးဘူး။ ထပ်မထူးရင် ထပ်ပြီး လက်မှတ်ထိုးတိုင်ရမှာပဲ”ဟု မယ်ခေါင်ရပ်ကွက်မှ ဒေသခံတစ်ဦးက တာချီလိတ်သတင်းအေဂျင်စီသို့ ပြောသည်။

အဆိုပါရပ်ကွက်မှ လောင်းကစားဝိုင်းများ ပိတ်သိမ်းပေးရေး တင်ပြထားသည့်စာနှင့် ပတ်သက်၍ စက်တင်ဘာလ (၂၅)ရက်နေ့တွင် မြို့နယ်အုပ်ချုပ်ရေးမှူးအား တာချီလိတ်သတင်းအေဂျင်စီက ဖုန်းဖြင့်ဆက်သွယ်မေးမြန်းရာ အဆိုပါစာအား ပြန်လည်ကြည့်ရှုရဦးမည်ဖြစ်ကြောင်းသာ ဖြကြေားခဲ့သည်။

တာချီလိတ်မြို့ မယ်ခေါင်ရပ်ကွက်အတွင်း အိမ်ထောင်စုပေါင်း(၅၀၀)နီးပါး နေထိုင်ကြသည့်အနက် အိမ်ထောင်စု တစ်ခုစီကိုယ်စားပြုသည့် လူဦးရေ (၂၅၃)ဦးက လက်မှတ်ထိုးပြီး ရပ်ကွက်အတွင်းရှိ လောင်းကစားဂိမ်းခုံ(၁၀)ခုအား ပိတ်သိမ်းပေးရန် တောင်းဆိုထားကြခြင်းဖြစ်ကြောင်း သိရသည်။

“ဒီက အခြေအနေကို ဒီကပြည်သူလူထု၊ ဒီကအဖွဲ့တွေ အသိဆုံးပဲ။ သတင်းပေးလာတယ်ဆိုရင်တော့ ပြောလာပြီဆိုရင်တော့ ဥပဒေနဲ့အညီလုပ်ရမှာ ကျွန်တော်တို့ အပိုင်းပေါ့လေ။ သူတို့တင်ထားတယ် ဆိုတာတော့ လောလောဆယ်ထိတော့ ကျွန်တော်တို့ဆီ တင်ပြလာတာတွေ မရှိသေးပါဘူး။ ပြည်နယ်လွှတ်တော်မှာလည်း ဒီလောင်းကစားနဲ့ပတ်သက်လို့ ဆွေးနွေးအတည်ပြုထားတာတွေရှိတယ်။ စီမံချက်တွေလည်း ရှိလာနိုင်ပါတယ်”ဟု တာချီလိတ်ခရိုင်ရဲတပ်ဖွဲ့မှူး ဒုရဲမှူးကြီး ပေါ်ထွန်းက ပြောသည်။

တာချီလိတ်မြို့တွင်လည်း လောင်းကစားမျိုးစုံရှိသည့်အနက် လူငယ်အများစုကစားသည့် ငါးမန်းဂိမ်းခေါ် လောင်းကစားဂိမ်းခုံများမှာ ယခင်က (၄၀၀)ကျော်ခန့်ရှိနေရာမှ လွန်ခဲ့သည့် (၆)လခန့်မှစ၍ ကွန်ပျူတာဂိမ်းများ အသစ်ဝင်လာသဖြင့် ငါးမန်းဂိမ်းခုံ (၂၀၀)ဝန်းကျင်သာရှိတော့ကြောင်း တာချီလိတ်မြို့မှ ပြည်နယ်လွှတ်တော်ကိုယ်စားလှယ် ဦးခင်မောင်တင့်က ဆိုသည်။

“ဂိမ်းကတော့ အရင်ကတော့ အတော်များများ ကျယ်ကျယ်ပြန့်ပြန့်ရှိရာကနေ အခု (၆)လလောက် အတွင်းမှာ တော်တော်လေး လျော့သွားတာ တွေ့နေရတယ်။ အရင်က ကျွန်တော်တို့ သိထားတဲ့ (၄၀၀)ကျော်ကနေ အခုဆိုရင် (၂၀၀)လောက်တောင် မရှိတော့ဘူးလို့ ပြောလို့ရတယ်။ ဒီမြို့မှာ လောင်းကစား နှိမ်နှင်းမှုကတော့ အားနည်းတယ်လို့တော့ ပြောရမယ်။ လက်ရှိမှာတော့ မြို့မှာက ဂိမ်းခုံက နည်းသွားပြီး ကွန်ပျူတာဂိမ်းတွေ ဝင်လာတယ်။ ကျွန်တော်တို့ ဒေသမှာ (၃၆)ကောင်လို၊ မခုတ်ခပ်(ဂုန်းဂင်း)လို ရိုးရာလောင်းကစားနည်းတွေလည်း ရှိတယ်။ ဒါကကျတော့ ရိုးရာလိုမျိုး ရာသီပွဲချိန်မှာပဲရှိတာ။ ကာစီနိုရှိတယ်။ ဂိမ်းခုံရှိတယ်။ ကွန်ပျူတာဂိမ်းရှိတယ်။ ချဲထီဆိုတဲ့ သုံးလုံးထီ ရှိတယ်။ ဂိမ်းခုံတွေရှိတဲ့ သက်ရောက်မှုကတော့ လူငယ်တွေအတော်များများ ပျက်စီးတယ်၊ လေလွင့်တယ်၊ မူးယစ်ဆေး သားကောင်ဖြစ်သွားကြတယ်”ဟု တာချီလိတ်မြို့မှ ပြည်နယ်လွှတ်တော်ကိုယ်စားလှယ် ဦးခင်မောင်တင့်က ဆိုသည်။

အဆိုပါ လောင်းကစားဂိမ်းခုံများ ပိတ်သိမ်းရေးနှင့် ပတ်သက်၍ ယခင်ကတည်းက တင်ပြမှုများ ရှိခဲ့သော်လည်း တာဝန်ရှိသည့်အဖွဲ့အစည်းများက ဂိမ်းခုံများ ပိတ်သိမ်းလိုက်ပါက အလုပ်အကိုင် အခွင့်အလမ်းမရှိဘဲ အလုပ်လက်မဲ့များလာနိုင်သည်ဟု အကြောင်းပြချက်ဖြင့် အရေးယူနိုင်ခဲ့ခြင်း မရှိကြောင်း ပြည်နယ်လွှတ်တော်ကိုယ်စားလှယ်က ဆိုသည်။

“ကျွန်တော် ဒီကိစ္စတွေကို ကျွန်တော် လွှတ်တော်ကိုယ်စားလှယ်ဖြစ်ချိန်မှာ ဒေသတာဝန်ရှိသူတွေကို တင်ပြဖူးပါတယ်။ အဲဒီတုန်းက တာဝန်ရှိတဲ့ အဖွဲ့အစည်းက ဒီဂိမ်းခုံပိတ်လိုက်ရင် ဒီလူတွေ သူတို့ရဲ့စားဝတ်နေရေးနဲ့ အလုပ်အကိုင်ကို တာဝန်ယူခိုင်းခဲ့ဖူးတာတောင်ရှိတယ်” ဟု ပြည်နယ်လွှတ်တော်ကိုယ်စားလှယ် ဦးခင်မောင်တင့်က ပြောသည်။

လက်ရှိတွင် နိုင်ငံခြားသားများကိုသာ သီးသန့်လောင်းကစားခွင့်ပြုမည့် လောင်းကစားရုံ(ကာစီနို) တရားဝင်ဖွင့်လှစ်ခွင့်ပြုမည့် လောင်းကစားဥပဒေမူကြမ်းကို ၂၀၁၈ ခုနှစ် သြဂုတ်လ (၂၁) ရက်နေ့က ပြည်သူ့လွှတ်တော်သို့ တင်သွင်းထားခြင်းဖြစ်သည်။

Tachileik News Agency