~~~~~~~~⊰❂ unicode ❂⊱~~~~~~~~

မကွေးတွင် ရဲတပ်ဖွဲ့ဝင်များကို ရိုက်နှက်ခဲ့သည့်အဖွဲ့မှ လူငယ်(၁)ဦးကို နေအိမ်တွင် အရပ်ဝတ်ဖြင့် လူ(၁၅)ဦး လာရောက်ရိုက်နှက်ခြင်းကို ရဲစခန်းက အမှုဖွင့်မပေး
******************
မကွေးမြို့တွင် စားသောက်ဆိုင်ရှေ့၌ ရဲတပ်ဖွဲ့ဝင်များကို ရိုက်နှက်ခဲ့သည့်လူငယ်(၅)ဦးအဖွဲ့တွင် ပါဝင်သည့် လူငယ်(၁)ဦးကို သြဂုတ်လ(၁၇)ရက်နေ့က ၎င်းနေထိုင်ရာအိမ်သို့ လူ(၁၅)ဦးခန့် လာရောက်ရိုက်နှက်မှုအား မကွေးမြို့မရဲစခန်းသို့ တိုင်ကြားသည်ကို သြဂုတ်လ(၁၈)ရက်နေ့အထိ အမှုဖွင့်ပေးထားခြင်းမရှိသေးကြောင်း သိရသည်။

“သူတို့က ဝန်ထမ်းမလို့ တန်းလုပ်လို့မရဘူးတဲ့။ အဆင့်ဆင့်တက်ပြီးကာမှ ဆောင်ရွက်ပေးမှာ။ အခုလောလောဆယ် ဆောင်ရွက်မပေးနိုင်သေးဘူးတဲ့ အဲဒီလိုပြောတယ်"ဟု ရဲစခန်းသို့ အမှုဖွင့်တိုင်ကြားရာတွင် လိုက်ပါသွားခဲ့သည့် ကိုဆန်းလင်းထွန်း၏ အဒေါ်ဖြစ်သူ ဒေါ်ခင်ဌေးက ပြောသည်။

မကွေးတိုင်းပြည်သူ့ဆေးရုံတွင် သြဂုတ်လ(၁၇)ရက်နေ့က ဒဏ်ရာရထားသည့် ရဲတပ်ဖွဲ့ဝင် (၃)ဦးအပြင် လူငယ်(၅)ဦးအဖွဲ့မှ (၁)ဦးမှာလည်း ဒဏ်ရာများဖြင့် ဆေးရုံတက်နေရာ အဆိုပါလူငယ်မှာ ထွက်ပြေးသဖြင့် ရဲတပ်ဖွဲ့က လိုက်လံဖမ်းဆီးစဉ် ဒဏ်ရာရသွားခဲ့ခြင်းဖြစ်သည်ဟု မကွေးမြို့မရဲတပ်ဖွဲ့က သြဂုတ်လ(၁၇)ရက်နေ့ နံနက်ပိုင်းတွင် သတင်းထုတ်ပြန်ခဲ့သော်လည်း အဆိုပါဒဏ်ရာရလူငယ်မှာ နေအိမ်တွင် လူ(၁၅)ဦး လာရောက်ရိုက်နှက်ခံရသည့် အတွက် ဒဏ်ရာရသွားသည့် ကိုဆန်းလင်းထွန်းဖြစ်ကြောင်း ကိုဆန်းလင်းထွန်း၏ မိသားစုဝင်များက သြဂုတ်လ(၁၈)ရက်နေ့တွင် အတည်ပြုပြောကြားသည်။

လူငယ်(၅)ဦးအနက် (၂)ဦးကို ရဲတပ်ဖွဲ့ကဖမ်းဆီးထားပြီး ကျန်(၃)ဦးအနက် သာယာကုန်းရွာနေ ကိုဆန်းလင်းထွန်းအား သြဂုတ်လ(၁၇)ရက်နေ့ နံနက်(၃)နာရီဝန်းကျင်၌ ၎င်းနေထိုင်ရာနေအိမ်သို့ ကား(၂)စီးဖြင့် အရပ်ဝတ် လူ(၁၅)ဦးရောက်လာကာ ဝိုင်းဝန်းရိုက်နှက်ခဲ့ခြင်းဖြစ်ကြောင်း သိရသည်။

"သူတို့ ကားနှစ်စီးနဲ့ ရောက်လာကြတာပါ။ အားလုံး (၁၅) ယောက်လောက်ရှိပြီး အရပ်ဝတ်တွေနဲ့မို့ အစကရဲတွေမှန်း မသိပါဘူး။ ဆန်းလင်းထွန်းကလည်း ညက ပြဿနာဖြစ်ခဲ့လို့ မနက်ကျရင် ရဲလာဖမ်းနိုင်တယ်လို့ ပြောပါသေးတယ်။ အိပ်နေတဲ့ ဆန်းလင်းထွန်းကို မင်းကိုစခန်းက လာဖမ်းတာဆိုပြီး နှိုးလို့ ထအလာမှာ သူတို့ကပါလာတဲ့တုတ်တွေနဲ့ တန်းပြီး ရိုက်ကြနှက်ကြပါတယ်။ ကလေးက ကန်ကျောက်ခုခံပြီး ရွာထဲထွက်ပြေးတော့ သူတို့က သူခိုးလို့ အော်ပြီး လိုက်ဖမ်းကြတာကြောင့် ရွာထဲကတစ်ယောက်က ရိုက်လိုက်ပါသေးတယ်။ နောက်မှ ကိုလင်းမှန်း သိ သွားတာပါ။ ကိုလင်းအမေ့အိမ်မှာ မိသွားကြလို့ ထပ်ရိုက်နှက်ကြပြီး လူတွေဝိုင်းလာပြီ ပြန်ရအောင်လို့ပြောပြီး ပြန်သွားကြပါတယ်။ သူတို့ဝိုင်းလုပ်ပြီး ထားရစ်ခဲ့တဲ့ကိုလင်းကို ဆွေမျိုးသားချင်းတွေက ဆေးရုံပို့လိုက်ကြရပါတယ်"ဟု ကိုဆန်းလင်းထွန်း၏ အိမ်နီးချင်းဖြစ်သူ မမျိုးမျိုးဦးက တာချီလိတ်သတင်းအေဂျင်စီသို့ ပြောသည်။

သြဂုတ်လ(၁၆)ရက် ညပိုင်းက ဖြစ်ပွားခဲ့သည့်ဖြစ်စဉ်နှင့်ပတ်သက်၍ လူငယ်(၅)ဦးကို မကွေးမြို့မရဲစခန်းတွင် (ပ)၉၁၂/ ၂၀၁၈၊ရာဇသတ်ကြီးပုဒ်မ ၃၃၃ဖြင့် အမှုဖွင့်ထားခြင်းဖြစ်ပြီး ကိုဆန်းလင်းထွန်း ရိုက်နှက်ခံရသည့်ဖြစ်စဉ်နှင့် ပတ်သက်၍ မြို့မရဲတပ်ဖွဲ့သို့ အမှုဖွင့်ထားသည့်ကိစ္စကိုမူ မြို့နယ်ရဲတပ်ဖွဲ့အနေဖြင့် ရှင်းလင်းစွာ မသိရသေးကြောင်း ဖြေကြားသည်။

"ဒါကတော့ ပြစ်မှုကျူးလွန်သူကို ရဲကလိုက်ဖမ်းတဲ့သဘောပဲ ရှိပါတယ်။ တကယ်သာ သူတို့ပြောသလို ရိုက်နှက်တာမှန်ရင် သူ့ကိုမိပြီပေါ့။ ရဲကဖမ်းတာကို ထွက်ပြေးတော့ အုတ်နံရံတွေဘာတွေနဲ့တိုးတိုက်ပြီး ဒဏ်ရာရသွားတာပဲ ဖြစ်မှာပါ"ဟု  အဆိုဖြစ်စဉ်နှင့်ပတ်သက်၍ မကွေးမြို့နယ်ရဲတပ်ဖွဲ့မှူး ရဲမှူးငွေတင်က တာချီလိတ်သတင်းအေဂျင်စီသို့ ပြောသည်။

မကွေးမြို့၊ သိင်္ဂါဂီရိရပ်၊ မြို့ရှောင်လမ်းရှိ MD စားသောက်ဆိုင်ရှေ့၌ ၂၀၁၈ ခုနှစ်၊ သြဂုတ်လ (၁၆) ရက်နေ့ ညပိုင်းက မူးယစ်ရမ်းကားနေသည့်လူရွယ်(၅)ဦးအား ရဲတပ်ဖွဲ့ဝင်(၅)ဦးက သွားရောက်တားမြစ်ရာမှ ထိုးကြိတ်မှုများ ဖြစ်ပွားခဲ့သဖြင့် ရဲတပ်ဖွဲ့ဝင် (၃)ဦး ဒဏ်ရာရသွားခြင်းဖြစ်ကြောင်း ရဲတပ်ဖွဲ့၏ ထုတ်ပြန်ချက်အရ သိရသည်။

သတင်း၊ဓါတ်ပုံ #ဖီးနစ်