~~~~~~~~⊰❂ unicode ❂⊱~~~~~~~~

ကျိုင်းတုံမြို့နယ် စည်ပင်သာယာရေးကော်မတီကို ဌာနတာဝန်ရှိသူက လူမှုကွန်ယက်တွင် ဝေဖန်ရေးသားမှုနှင့်ပတ်သက်၍ အရေးယူပေးရန် သမ္မတထံ လိပ်မူတိုင်ကြား
************
ကျိုင်းတုံမြို့နယ် စည်ပင်သာယာရေးကော်မတီအနေဖြင့် ဌာန၏ လုပ်ထုံးလုပ်နည်းများကို နားလည်ခြင်း မရှိကြောင်း စည်ပင်သာယာရေးဌာန တာဝန်ရှိသူတစ်ဦးက လူမှုကွန်ရက်စာမျက်နှာတွင် ရေးသားခြင်းကို ကန့်ကွက်ကြောင်းနှင့် အရေးယူပေးရန် ကော်မတီက နိုင်ငံတော်သမ္မတထံ လိပ်မူတိုင်ကြားလိုက်ကြောင်း သိရသည်။

ပြည်နယ်စည်ပင်သာယာရေးဌာနခွဲ၊ ကျိုင်းတုံမြို့မှ ဒုတိယညွှန်ကြားရေးမှူး ဦးလုကာက သြဂုတ်လ (၂၅)ရက်နေ့တွင် လူမှုကွန်ယက်စာမျက်နှာ၌ ကော်မတီနှင့်ပတ်သက်၍ ဝေဖန်ရေးသားခြင်းကို စည်ပင်ကော်မတီက နိုင်ငံတော်သမ္မတထံလိပ်မူ၍ သြဂုတ်လ (၂၇)ရက်နေ့က တင်ပြထားသည့်စာတွင် ကော်မတီအနေဖြင့် စည်ပင်ဘတ်ဂျက်နှင့်ပတ်သက်၍ ရှင်းလင်းခြင်းမရှိသည့် အချက်(၃)ချက်ကို တင်ပြထားသည်။

“ ဦးလုကာက အဲဒီလိုတင်လာတော့ ပြည်သူတွေက ကျွန်တော်တို့ကို အထင်မှားလာမယ်ဆိုတော့ ကျွန်တော်တို့က ပြန်လည်တင်ပြခြင်း ဖြစ်ပါတယ်။ ပြန်လည်အရေးယူပါဆိုတာထက် လူကြီးမင်းများ သိရှိရန်ပဲ တင်ပြပေးတာပါ။ ဒါတွေက ဘာကြောင့်လဲဆိုတော့ သူက ကျွန်တော်တို့ကို အလုပ်မလုပ်ဘူးလို့ ပြောတာကိုး။ ဒါကြောင့် ကျွန်တော်တို့ လုပ်ခဲ့တာတွေ သတိပေးခဲ့တာတွေကို ပြန်တင်ပြခြင်းဖြစ်ပါတယ်”ဟု ကျိုင်းတုံမြို့နယ် စည်ပင်သာယာရေးကော်မတီဝင် ဦးစိုင်းလုံခမ်းက တာချီလိတ်သတင်းအေဂျင်စီသို့ ပြောသည်။

အဖွဲ့ဝင်(၄)ဦးပါဝင်သည့် ကျိုင်းတုံမြို့နယ် စည်ပင်ကော်မတီအနေဖြင့် လုပ်ပိုင်ခွင့်နည်းပါးပြီး စည်ပင်သာယာရေးဌာန၏ ဘတ်ဂျက်ကိစ္စများအပါအဝင် ဆောင်ရွက်ချက်များနှင့်ပတ်သက်၍ ကော်မတီကို ဆွေးနွေးတိုင်ပင်မှုနည်းပါးသဖြင့် ကော်မတီနှင့်ဌာန ပူးပေါင်းလုပ်ဆောင်နိုင်မှု အားနည်းသည်ဟု ကော်မတီက ဆိုသည်။

“ကျွန်တော်တို့က လိုအပ်တယ်ထင်လို့ ပြောတာတွေကို စည်ပင်ဥက္ကဌကိုယ်တိုင်ပြောတာတောင် ဌာနက လုပ်တဲ့နေရာကနည်းပြီး မလုပ်တာက များနေတာပေါ့နော်။ ကျွန်တော်တို့က ကိုယ့်မြို့ကိုယ် တိုးတက်အောင် လုပ်ချင်လို့ စည်ပင်ကော်မတီထဲ ဝင်လုပ်တာပဲလေ။ ဘယ်သူမဆို ကိုယ့်မြို့ကိုယ် စေတနာရှိပါတယ်။ ကျွန်တော်တို့က ဘတ်ဂျက်ဘယ်လို အတည်ပြုလဲဆိုတာ မသိဘူးပေါ့။ ဟုတ်တယ်လေ။ ကျွန်တော်တို့ကို မချပြတော့ ဘယ်လိုသွားသိမလဲ။ ဝန်ကြီးလာမေးတော့ မသိတာကိုလည်း သိတယ်လို့ ကျွန်တော်တို့ ဘယ်လိုပြောမလဲ”ဟု ကျိုင်းတုံမြို့နယ် စည်ပင်သာယာရေးကော်မတီဝင် ဦးစိုင်းလုံခမ်းက ပြောသည်။

စည်ပင်ကော်မတီက သိရှိရခြင်းမရှိကြောင်း သမ္မတထံလိပ်မူသည့်စာတွင် တင်ပြထားသည့် ကိစ္စရပ်များကို ဌာနအနေဖြင့် အလျဉ်းသင့်သလို ရှင်းလင်းပြီးဖြစ်သည့်အပြင် စည်ပင်သာယာရေးဌာန၏ လုပ်ထုံးလုပ်နည်း၊ နည်းဥပဒေများနှင့်ပတ်သက်၍ ကော်မတီဝင်များကိုယ်တိုင် လေ့လာနိုင်ပြီး လိုအပ်ပါက ဌာနအနေဖြင့် ရှင်းလင်းဆွေးနွေးခြင်းဖြင့် ပူးပေါင်းဆောင်ရွက်နေသည်ဟု ကျိုင်းတုံမြို့နယ် စည်ပင်သာယာရေးဌာန အမှုဆောင်အရာရှိက ဆိုသည်။

“ဒီအချက်အလက်အကြောင်းအရာတွေကို ကော်မတီကို ရှင်းပြပြီးဖြစ်ပါတယ်။ ကျွန်တော့်အနေနဲ့ အစည်းအဝေးမှ မဟုတ်ပါဘူး။ ကြုံရင်ကြုံတဲ့နေရာမှာ ဒါတွေကို ရှင်းပြပါတယ်ခင်ဗျ။ ကော်မတီဆိုတာ ကျွန်တော်တို့ဌာနအတွက်က မိဘရောက်လာတာပဲဗျ။ ကျွန်တော်တို့အတွက် မိဘသဖွယ်သဘောထားပြီး ဆောင်ရွက်ပါတယ်။ အခက်အခဲဆိုတာ တတ်နိုင်သမျှ မရှိအောင် ဆောင်ရွက်ပါတယ်။ အဲဒီတော့ ကျွန်တော်တု့ိဌာနရဲ့ လုပ်ထုံးလုပ်နည်းတွေ ညွှန်ကြားချက်တွေကို မသိဘူးဆိုရင် သိအောင်ဖြေကြားပေးဖို့ ရှင်းလင်းပေးဖို့က ကျွန်တော်တို့တာဝန်လေ။ ပြီးရင်ကျွန်တော်တို့ရဲ့ ဥပဒေတွေ၊ စာအုပ်တွေကို ပေးထားပြီးသားလေ။ လေ့လာရမယ်၊ ဖတ်ရှုရမယ်၊ မသိရင်မေးရမယ်ဆိုတာ ကော်မတီရဲ့ လုပ်ငန်းတာဝန်ပဲလေ။ ကျွန်တော်တို့ဌာနတွေဆိုတာ လမ်းကြောင်းအတိုင်းပဲ သွားရတယ်။ တစ်ခါတစ်လေကျရင်တော့ ဌာနရဲ့ လုပ်ထုံးလုပ်နည်းမသိတဲ့သူတွေကျတော့ တစ်မျိုးထင်တာပေါ့။ စနစ်တွေက မပြောင်းသေးဘူးလား။ အလုပ်လုပ်တာက ကြာတယ်ဆိုတာတွေတော့ ပြောတာပေါ့”ဟု ကျိုင်းတုံမြို့နယ် စည်ပင်သာယာရေးဌာန အမှုဆောင်အရာရှိ ဦးမျိုးမြင့်အောင်က တာချီလိတ်သတင်းအေဂျင်စီသို့ ပြောသည်။

ကော်မတီကတင်ထားသည့် ကန့်ကွက်စာတွင် ကျိုင်းတုံမြို့နယ် ဝက်သားလိုင်စင် ကျပ်သိန်းထောင်ချီ ကွာဟနေမှုကို စည်ပင်သာယာရေးကော်မတီက  ၂၀၁၇ ခုနှစ်၊ မေလ (၂၈)ရက်နေ့တွင် နိုင်ငံတော်သမ္မတ ဦးထင်ကျော်ထံ လိပ်မူတင်ပြခဲ့သည့်အတွက် အဆိုပါကိစ္စအား ခုံရုံးဖွဲ့စစ်ဆေးပြီးနောက် ငွေကွာဟမှု ပေါ်ပေါက်ခဲ့သော်လည်း နောက်ဆက်တွဲ မသိရသေးသည့်အခြေအနေ၊ ကျိုင်းတုံမြို့ ရေပေးဝေရေးအတွက် ပြည်နယ်အစိုးရက ချထားပေးသည့် ကျပ်သိန်း (၂၅၀၀)ကို တင်ဒါခေါ်ယူခြင်းမရှိဘဲ ဌာနက ဆောင်ရွက်နေသည့်အခြေအနေနှင့် ဘတ်ဂျက် ကျပ်သိန်း (၃၀၀၀)ကျော်သည့် မြို့ရေစီးရေလာ ကောင်းမွန်ရေးလုပ်ငန်းတင်ဒါကို ယှဉ်ပြိုင်သည့် ကုမ္ပဏီ(၂)ခု တင်ဒါမအောင်ဟုဆိုကာ ဌာနက လုပ်ဆောင်နေမှုအခြေအနေများကို ကော်မတီအနေဖြင့် သိရှိရခြင်းမရှိသဖြင့် ဌာနအနေဖြင့် ကော်မတီဖြင့် အလေးထားမှု မရှိကြောင်း တင်ပြပါသည်ဟု ဖေါ်ပြထားသည်ကို တွေ့ရပြီး ဌာနအနေဖြင့် အဆိုပါကိစ္စများအား ဌာနလုပ်ထုံးလုပ်နည်းများအတိုင်း ဆောင်ရွက်ထားပြီးဖြစ်သည်ဟု ကျိုင်းတုံမြို့နယ် စည်ပင်သာယာရေးဌာန အမှုဆောင်အရာရှိ ဦးမျိုးမြင့်အောင်ကဆိုသည်။

သတင်း #ဇွဲမြတ်