~~~~~~~~⊰❂ unicode ❂⊱~~~~~~~~

ကယားပြည်နယ် စက်မှုဇုန်ရှိ သိုလှောင်ရုံတွင် ပေါက်ကွဲစေသည့်ပစ္စည်းများ၊ သစ်နှင့်သတ္တုလုပ်ငန်း ဆက်စပ်ပစ္စည်းများ တရားမဝင်သိုလှောင်မှုကို ပူးပေါင်းအဖွဲ့ဖြင့် စစ်ဆေးမည်
*********************
ကယားပြည်နယ်၊ နွားလဝိုးကျေးရွာအုပ်စု၊ စက်မှုဇုန်ရှိ သိုလှောင်ရုံအတွင်း သစ်၊ ယမ်းနှင့် ဆက်စပ်ပစ္စည်းများ၊ သတ္ထုထုတ်လုပ်ရာတွင် အသုံးပြုသည့်ပစ္စည်းများ တရားမဝင်သိုလှောင်ထားမှုများနှင့်ပတ်သက်၍ စစ်ဆေးမည့် ပူးပေါင်းအဖွဲ့ကို ဖွဲ့စည်းပေးထားပြီး ၂၀၁၈ ခုနှစ် ဇွန်လ (၁၁) ရက်နေ့ နောက်ဆုံးထားကာ တွေ့ရှိချက်များအား ပြည်နယ်ဝန်ကြီးချုပ်ထံ တင်ပြရမည်ဖြစ်ကြောင်း သိရသည်။

နွားလဝိုးစက်မှုဇုန်တွင် ဒေါ်မြမြစိမ်း(ခ)အားတုံ ငှားရမ်းထားသော သိုလှောင်ရုံအား၂၀၁၈ ခုနှစ်၊ ဇွန်လ (၃) ရက်နေ့ နံနက် (၁၁)နာရီ (၄၅) မိနစ်ဝန်းကျင်တွင် ကယားပြည်နယ် သတ္တုတွင်းဦးစီးဌာန ပြည်နယ်ဦးစီးမှူး ဦးဆောင်သည့်အဖွဲ့က ကယားပြည်နယ်အစိုးရအဖွဲ့၏ညွှန်ကြားမှုဖြင့် ရှောင်တခင်ဝင်ရောက်စစ်ဆေးခဲ့ရာ သစ်၊ ယမ်းနှင့် ဆက်စပ်ပစ္စည်းများ၊ သတ္ထုထုတ်လုပ်ရာတွင် အသုံးပြုသည့်ပစ္စည်းများအား ရှာဖွေတွေ့ရှိထားသဖြင့် ဂိုဒေါင်ပိုင်ရှင် ဒေါ်မြမြစိမ်း(ခ)အားတုံအား ဖမ်းဆီးထားပြီး လွိုင်ကော်မြို့မရဲစခန်းတွင် (ပ)၉၄/၂၀၁၈၊ လက်နက်ဥပဒေပုဒ်မ ၁၉(စ)ဖြင့် အမှုဖွင့်စစ်ဆေးနေခြင်းဖြစ်သည်။

အဆိုပါကိစ္စနှင့်ပတ်သက်၍ ပြည်နယ်ဝန်ကြီးချုပ်က ၂၀၁၈ ခုနှစ် ဇွန်လ (၃)ရက်နေ့တွင်လည်း တာဝန်ရှိသူများနှင့် တွေ့ဆုံဆွေးနွေးခဲ့ကာ အဆိုပါကိစ္စနှင့်ပတ်သက်ပြီး စစ်ဆေးဆောင်ရွက်မှု အခြေအနေများ၊ လိုအပ်သည်များ ညှိနှိုင်းပေါင်းစပ် ဆောင်ရွက်နိုင်ရေးအတွက် လုပ်ငန်းညှိနှိုင်းအစည်းအဝေးကိုလည်း ဇွန်လ(၄)ရက်နေ့က  ကယား ပြည်နယ်အစိုးရအဖွဲ့ရုံးတွင် လုံခြုံရေးနှင့် နယ်စပ်ရေးရာဝန်ကြီး၊ လမ်းပန်းဆက်သွယ်ရေးနှင့် လျှပ်စစ်ဝန်ကြီး၊ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီး၊ စီမံကိန်းနှင့် ဘဏ္ဍာရေးဝန်ကြီး၊ ပြည်နယ်ဥပဒေချုပ်၊ ပြည်နယ်အစိုးရအဖွဲ့ အတွင်းရေးမှူးနှင့် သက်ဆိုင်ရာဌာနတာဝန်ရှိသူများနှင့် ဆွေးနွေးကာ စစ်ဆေးမည့် ပူးပေါင်းအဖွဲ့အား ဖွဲ့စည်းပေးခဲ့ခြင်းဖြစ်ကြောင်း သိရသည်။

အဆိုပါ ဖမ်းဆီးရမိမှုနှင့်ပတ်သက်၍ ပစ္စည်းများ စိစစ်တွေ့ရှိရမှုအပေါ် သက်ဆိုင်ရာဝန်ကြီးများနှင့် ဌာနများမှ အားနည်းချက်များအပေါ် အစီအမံတင်ပြဆောင်ရွက်ခြင်းအား တစ်လအတွင်း ပြီးပြတ်အောင် လုပ်ဆောင်ရန်နှင့် ပြည်နယ်ဥပဒေချုပ်အနေဖြင့် အဆိုပါ ဖြစ်စဉ်နှင့် ပတ်သက်ပြီး မှန်မှန်ကန်ကန်၊ လျင်မြန်ချောမွေ့စွာဖြင့် ထိထိရောက်ရောက် ဆောင်ရွက်နိုင်ရေးအတွက် သက်ဆိုင်ရာဌာနများသို့ ဥပဒေအကြံပေး ဆောင်ရွက်သွားရန် ကယားပြည်နယ်အစိုးရအဖွဲ့၊ ဝန်ကြီးချုပ် ဦးအယ်လ်ဖောင်းရှိုက ညွန်ကြားထားကြောင်း သိရသည်။

ခွင့်ပြုချက်မရှိဘဲ ပေါက်ကွဲစေတတ်သည့်ပစ္စည်းများ အဆိုပါနေရာသို့ ရောက်ရှိနေခြင်းသည် လုံခြုံရေးနှင့် တရားဥပဒေစိုးမိုးရေးကိုပါ ထိခိုက်နိုင်သဖြင့် ဖြစ်စဉ်နှင့်ပတ်သက်၍ အဖြေထုတ်နိုင်ရန် အစည်းအဝေး ခေါ်ယူခြင်းဖြစ်ပြီး ဝန်ထမ်းများအနေဖြင့် တက်ညီလက်ညီဖြင့် နိုင်ငံတော်မှ ချမှတ်ထားသော စည်းမျဉ်းစည်းကမ်း၊ မူဘောင်များနှင့်အညီ ဖော်ဆောင်သွားရန် လိုအပ်ကာ ဝန်ထမ်းများအနေဖြင့်လည်း အလုပ်ကို အလုပ်နှင့်တူအောင် လုပ်ဆောင်ရန် လိုအပ်သည်ဟု ပြည်နယ်ဝန်ကြီးချုပ်က အဆိုပါအစည်းအဝေးတွင် ပြောကြားခဲ့ကြောင်း သိရသည်။

ဂိုထောင်အား ရှောင်တခင်စစ်ဆေးရာတွင် သိုလှောင်ရုံ အခန်းအမှတ် (၉/၁၀) တွင် အရှည် (၉)လက်မခန့်၊ လုံးပတ် (၃)လက်မခန့်ရှိ တရုတ်စာတမ်းပါ ယမ်းချောင်း (၄၈၀၀) ချောင်းနှင့် အရှည် (၁၂) ပေခန့်ရှိ အဖြူရောင် စနက်တံကြိုးနှင့် တွဲလျက် အရှည် (၂) လက်မခန့် ဒီတိုနေတာ စုစုပေါင်း (၄၀၀၀) ချောင်းအား တွေ့ရှိမှုကို အမှုဖွင့်စစ်ဆေးနေကြောင်း ပြည်နယ်ရဲတပ်ဖွဲ့မှူး ရဲမှူးကြီး ဝင်းကြည်က တင်ပြခဲ့ပြီး ဂိုထောင်အခန်း အမှတ် (၇)၊ (၈)၊ (၉)၊ (၁၀) တို့တွင် တွေ့ရှိရသော ကျွန်းတံရွက်ဘောင်၊ ကျွန်းတံခါး ကျည်းဘောင်၊ အဆောက်အဦများ တည်ဆောက်ရာတွင် အသုံးပြုထားပြီးဖြစ်သည့် ပုံရိုက်သားအစောင်းများ၊ ဒေါက်တိုင်၊ ပကာများနှင့် ထောက်ကြန့်သစ်ခွဲသားများသည် မြန်မာ့ သစ်လုပ်ငန်း၊ ပြည်တွင်း ရောင်းဝယ်ရေးနှင့် သစ်စက် ဌာနမှ လေလံတင်ရောင်းချခဲ့သည့် သစ်များဖြစ်ကြောင်း နှင့် တံဆိပ်အမှတ်အသားပါရှိပြီး လေလံအောင်မြင်သည့် သစ်အရောင်း ပြေစာများပါ သစ်များနှင့် ကိုက်ညီကြောင်း ပြည်နယ်သစ်တောဦးစီးဌာနက တင်ပြကြောင်း သိရသည်။

ကားကွင်းဝင်းအတွင်း စုပုံထားသော သတ္ထုရိုင်းများ အဆင့်မြှင့်တင်သန့်စင်ရာတွင် အသုံးပြုသည်ဟု ယူဆရသော စက်ပစ္စည်းများနှင့် ပတ်သက်ပြီး သတ္တုတွင်း ဦးစီးဌာန တာဝန်ခံက တင်ပြရာတွင် H beam (၅) လုံးမှအပ ကျန်ပစ္စည်းများသည် သတ္ထုရိုင်းများ အဆင့်မြှင့်တင်သန့်စင်ရာတွင် အသုံးပြုသည်ဟု ယူဆရသော ပစ္စည်းများဖြစ်ပြီး မူလကုမ္ပဏီ၊ ပိုင်ရှင်အမည်၊ သယ်ယူခဲ့သည့် လမ်းကြောင်း၊ မည်သည့်နေရာ၊ မည်သည့်လုပ်ငန်းတွင် အသုံးပြုမည်၊ သက်ဆိုင်ရာ ကုမ္ပဏီမှ တရားဝင် သယ်ဆောင်လာသည့် တရားဝင် ပစ္စည်းများ ဟုတ်/ မဟုတ် စစ်ဆေးဆောင်ရွက် လျှက်ရှိကြောင်း တင်ပြထားသည်ဟု သိရသည်။
အဆိုပါ စက်မှုဇုန်သို့ ကားကြီးကွင်း ဖော်ဆောင်မည့် မြေနေရာ ကွင်းဆင်းစစ်ဆေးရန် ပြည်နယ်ဝန်ကြီးချုပ် သွားရောက်စဉ်က စက်မှုဇုန်အတွင်း ဆောင်ရွက်နေမှုများနှင့်ပတ်သက်ပြီး ပြည်သူများမှ တင်ပြလာမှုများ ရှိခဲ့သဖြင့် အဆိုပါ မြေအတွင်း ဆောက်လုပ်ထားသည့် ဂိုထောင်အား စစ်ဆေးစေခဲ့ရာ သစ်၊ သတ္ထုထုတ်လုပ်ရာတွင် အသုံးပြုသည့် စက်ယန္တရားပစ္စည်းများ၊ ယမ်း နှင့် ဆက်စပ်ပစ္စည်းများ စစ်ဆေး တွေ့ရှိရခြင်းဖြစ်ကြောင်း သိရသည်။

ဓါတ်ပုံ #ပြည်နယ်အစိုးရရုံး