~~~~~~~~⊰❂ unicode ❂⊱~~~~~~~~

ရှမ်းပြည်နယ် (အရှေ့ပိုင်း) ကျိုင်းတုံမြို့ရှိ ကျောင်းမုန့်ဈေးတန်းများ၌ သိမ်းဆည်းရမိခဲ့သည့် စားသုံးရန် မသင့် မုန့်များအား တစ်ဆင့်ယူဖြန့်ဖြူးရောင်းချပေးသည့် မြို့မဈေးကြီးအတွင်းမှ ဈေးဆိုင်များက အဆိုပါ မုန့်များအား အဓိက ဖြန့်ဖြူးနေသည့် ပင်ရင်းဆိုင်ကို ထုတ်ဖော်ပြောကြားရန် ငြင်းဆိုလိုက်ကြောင်း သိရသည်။

ခရိုင်စားသုံးသူ အငြင်းပွားမှုဖြေရှင်းရေး အဖွဲ့က ၂၀၁၈ ခုနှစ်၊ ဇွန်လ (၂၂)ရက်နေ့တွင် ဈေးအတွင်းမှ မုနု့်ဆိုင် (၄)ဆိုင်အား ရှောင်တခင် ဝင်ရောက်စစ်ဆေးရာ ဆိုင်အတွင်း ဝှက်ထားသည့် စားသုံးရန်မသင့်မုန့် စုစုပေါင်း ကာလတန်ဖိုး ကျပ်(၁၀)သိန်းဖိုးခန့် သိမ်းဆည်းရမိခဲ့ကာ ဆေးဆိုင်အချို့က မိမိတို့ဆန္ဒဖြင့် လာရောက် အပ်နှံသည့် သက်တမ်းလွန်ဆေးဝါး စုစုပေါင်းတန်ဖိုး ကျပ်(၂၈)ဖိုးခန့်အား သိမ်းဆည်း ရမိခဲ့ကြောင်း သိရသည်။

"ကျောင်းတွေက မုန့်ဈေးတန်းတွေကို ကျွန်တော်တို့ ဝင်စစ်တုန်းက သူတို့ရောင်းနေတဲ့ စားသုံးရန်မသင့်တဲ့ မုန့်တွေကို မြို့မဈေးကြီးထဲက ဘယ်ဆိုင်တွေမှာ ဝယ်ပါတယ်ဆိုတဲ့ အချက်အလက်တွေရထားတဲ့အတွက် ဒီနေ့မှာ ဈေးထဲက မုန့်ရောင်းတဲ့ ဆိုင် (၄) ဆိုင်ကို ရှောင်တခင် ဝင်စစ်ခဲ့တာဖြစ်ပါတယ်။ ဒီမုန့်တွေကို အပြင်မှာ တင်ရောင်းနေတာ မဟုတ်ဘဲနဲ့ အထဲမှာ ဖွက်ထားကြတာပါ။ နောက်ပြီးတော့ ဒီမုန့်တွေကို ဖြန့်နေတဲ့ ပင်ရင်းကို ပြောပါလို့ မေးတော့လည်း ဘယ်သူကမှ မဖြေပေးကြဘူး။ ဒီနေ့ သူတို့ဆီက သိမ်းလို့ ရထားတဲ့ မုန့်တွေရဲ့ တန်ဖိုးကို ပင်ရင်းတွေဆီကနေ ပြန်ရအောင် လုပ်ပေးပါမယ်လို့ ပြောတာတောင် လုံးဝမပြောကြဘူး။ ကျွန်တော်တို့ကလည်း ပင်ရင်းတွေကို အရေးယူချင်ပေမဲ့ ပူးပေါင်း ဆောင်ရွက်တာ မရှိတော့ ဘာမှ လုပ်မရဘူး ဖြစ်နေပါတယ်"ဟု ကျိုင်းတုံခရိုင် စားသုံးသူအငြင်းပွားမှု ဖြေရှင်းရေးအဖွဲ့မှ အတွင်းရေးမှူးဦးသန်းစိုးက တာချီလိတ်သတင်းအေဂျင်စီသို့ ပြောသည်။

သိမ်းဆည်းရမိသော မုန့်အများစုမှ တရုတ်နိုင်ငံမှ ထုတ်လုပ်သော မုန့်များဖြစ်ပြီး ထောက်ခံချက်မရှိဘဲ တင်သွင်းလာသည့် မုန့်များနှင့် သက်တမ်းလွန် မုန့်များဖြစ်ကြောင်း သိရသည်။

"ဒီဆိုင်တွေက ဒီလိုစားသုံးရန် မသင့်များကို ရောင်းချခြင်း ပြုခွင့်မရှိသည်ကို သိရှိကြောင်း ဝန်ခံလက်မှတ်ထိုးထားတာ ငါးခါထက်မနည်းရှိနပြေီ။ အခုလည်း သူတို့လည်း ပစ္စည်းတန်ဖိုးမဆုံးရှုံးအောင် မူရင်းဖြန့်ဖြူးသူ ဆီကနေ ဌာနအနေနဲ့ ပြန်တောင်းခံပေးလို့ရပါတယ် ဆိုတာကို ထုတ်ဖော်ပြောဖို့ ငြင်းနကြေတယ်။ နောက်ဆုံး သူတို့ကို သတိပေးထားတယ်။ သူတို့က ပင်ရင်းဖြန့်ဖြူးသူကိုလည်း မထုတ်ဖော်ဘူးဆိုရင် သူတို့လည်း ကြံရာပါဖြစ်တဲ့အတွက် ပူးပေါင်းကြံစည်သူဖြစ်တဲ့အတွက် နောက်တစ်ခါဆိုရင်တော့ စားသုံးသူတွေကိုယ်စား ဌာနက တရားစွဲသွားတော့မှာပါ"ဟု ကျိုင်းတုံခရိုင် စားသုံးသူအငြင်းပွားမှု ဖြေရှင်းရေးအဖွဲ့မှ အတွင်းရေးမှူး ဦးသန်းစိုးက ပြောသည်။

ကွင်းဆင်း စစ်ဆေးရာတွင် ခရိုင်စားသုံးသူအငြင်းပွားမှု ဖြေရှင်းရေးအဖွဲ့မှ အတွင်းရေးမှူး ဦးသန်းစိုး၊ ခရိုင်အစား အသောက်နှင့် ဆေးဝါးကွပ်ကဲမှု ဦးစီးဌာန ခရိုင်ဦးစီးမှူး ဒေါက်တာတေဇာဝင်း၊ ခရိုင်ကျန်းမာရေး ဝန်ထမ်းများ၊ မြို့နယ်အထွေထွေအုပ်ချုပ်ရေးဦးစီးဌာန၊ ရဲတပ်ဖွဲ့နှင့် တာဝန်ရှိသူများ ပါဝင်သည့် ပူးပေါင်းအဖွဲ့ဖြင့် ဆောင်ရွက်ခြင်းဖြစ်ကြောင်း သိရသည်။

"ကျွန်တော်တို့ အဖွဲ့အနေနဲ့ ပညာပေးတာတွေကိုလည်း တောက်လျှောက်လုပ်ခဲ့တာဖြစ်တဲ့အတွက် အခုနောက်ပိုင်းမှာတော့ အခုလိုဘဲ ရှောင်တခင်ဝင်ရောက်စစ်ဆေးပြီး အရေးယူတာတွေကို လုပ်သွားမှာ ဖြစ်ပါတယ်။ ကျွန်တော်တို့ အဖွဲ့က ဒီလအတွင်းမှာ ရှောင်တခင်စစ်ဆေးတာ (၄)ကြိမ်ရှိပါပြီ။ အဲဒီ(၄)ကြိမ်ကနေ သိမ်းဆည်းထားတဲ့ ပစ္စည်းတွေနဲ့ FDA ကလည်း သူတို့ သိမ်းထားတဲ့ပစ္စည်းတွေကိုစုပြီး အများရှေ့မှာ မီးရှို့ဖျက်ဆီးသွားဖို့လည်း ရှိပါတယ်"ဟု ကျိုင်းတုံခရိုင် စားသုံးသူအငြင်းပွားမှု ဖြေရှင်းရေးအဖွဲ့မှ အတွင်းရေးမှူး ဦးသန်းစိုးက ပြောသည်။

ရှမ်းပြည်နယ်(အရှေ့ပိုင်း) ကျိုင်းတုံမြို့တွင် ခရိုင်စားသုံးသူအငြင်းပွားမှုဖြေရှင်းရေးအဖွဲ့က ရှောင်တခင် စစ်ဆေးမှုများ ဆောင်ရွက်နေရာ ၂၀၁၈ခုနှစ် ဇွန်လ (၁၃) ရက်နေ့က အထက(၇)နှင့် ဇွန်လ(၁၈)ရက်နေ့က အထက(၂) စာသင်ကျောင်းအတွင်းရှိ မုန့်ဈေးဆိုင်များအား စစ်ဆေးရာမှ စားသုံးရန် မသင့်မုန့်များ ရောင်းချနေသည့် ကျောင်းမုန့်ဈေးတန်းမှ ဈေးဆိုင်(၆)ဆိုင်စီကို နောက်ဆုံးအကြိမ်အဖြစ် သတိပေးထားကြောင်း သိရသည်။

သတင်း - ဇွဲမြတ်
ဓာတ်ပုံ - စားသုံးသူရေးရာ ကျိုင်းတုံ