~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း) တာချီလိတ်မြို့တွင် ကျင်းပသည့် ခရီးကြမ်း (၅၀)ကီလို Mountain Bike စက်ဘီးပြိုင်ပွဲအား ဒီဇင်ဘာလ (၁၇)ရက်နေ့ နံနက် (၇)နာရီခွဲက ကျင်းပရာ မြန်မာနိုင်ငံနှင့် ထိုင်းနိုင်ငံမှ စက်ဘီးစီးသမား နှင့် စက်ဘီးဝါသနာရှင် စုစုပေါင်း (၇၀၀)ကျော် ပါဝင်ယှဉ်ပြိုင် စီးနင်းနေကြောင်း သိရသည်။

ပြိုင်ပွဲဝင် စက်ဘီးစီးသမားများနှင့် အပျော်စီးအဖွဲ့များသည် နံနက်(၇)နာရီခွဲတွင် ရှမ်းရိုးမကုန်တိုက်ရှေ့မှ စတင်တာထွက်၍ တာချီလိတ် - ကျိုင်းတုံ ကားလမ်းအတိုင်း မယ်ယန်းအထိစီးနင်းကာ မယ်ယန်းကျေးရွာ ဝမ်ပုံလမ်းခွဲမှတစ်ဆင့် ဆွတ်ဆိုင်ရွာ - ဝှေလေလန်ရွာသွားလမ်းအတိုင်း ဝမ်ပုံကျေးရွာ အ.ထ.က(ခွဲ)တွင် ပန်းဝင်ကြမည်ဖြစ်သည်။

ပြိုင်ပွဲသို့ ရှမ်းပြည်နယ်(အရှေ့ပိုင်း)မှ တာချီလိတ်ခရိုင်အတွင်းဖြစ်သည့် တာချီလိတ်၊ တာလေ နှင့် မိုင်းဖြတ် တို့မှ ပါဝင်ကြပြီး ကျိုင်းတုံ၊ မန္တလေး၊ မိထီ္ထလာ အပါအဝင် အခြားမြို့များမှလည်း လာရောက် ယှဉ်ပြိုင်ကြသည့်အပြင် ထိုင်းနိုင်ငံ၊ ချင်းရိုင်း နှင့် မယ်ဆို်င်မြို့တို့မှ စက်ဘီးစီး အားကစားသမားများလည်း ပါဝင်ကြောင်း သိရသည်။

ပြိုင်ပွဲ၏ ဖွင့်ပွဲသို့ ရှမ်းပြည်နယ်အစိုးရအဖွဲ့ဝင် လူမှုရေးဝန်ကြီး ဒေါက်တာမျိုးထွန်းမှ တက်ရောက် အားပေးခဲ့ပြီး တာချီလိတ်ခရိုင်စီမံခန့်ခွဲမှုကော်မတီ ဥက္ကဌ၊ တာချီလိတ်ခရိုင်အုပ်ချုပ်ရေးမှူး ဦးတင်ဝင်းရွှေနှင့် ဌာနဆိုင်ရာများမှလည်း ပါဝင်စီးနင်းကြကြောင်း သိရသည်။

ဆုပေးပွဲအခမ်းအနားကို ဝမ်ပုံကျေးရွာအထက်တန်းကျောင်းတွင် ကျင်းပမည်ဖြစ်ပြီး ပြိုင်ဘီး(၅)စီးကိုလည်း မဲဖောက်ပေးမည်ဖြစ်ကြောင်း သိရသည်။

အဆိုပါ စက်ဘီးစီးပြိုင်ပွဲအား အားကစားနှင့် ကျန်းမာရေးဝန်ကြီးဌာနက ကြီးမှူး၍ ရှမ်းပြည်နယ် အားကစားနှင့် ကာယပညာဦးစီးဌာန၊ မြန်မာနိုင်ငံစက်ဘီးစီးအဖွဲ့ချုပ်၊ ရှမ်းပြည်နယ် စက်ဘီးဆပ်ကော်မတီ၊ Tachileik Mountain Bike Group တို့မှ ပူးပေါင်း ကျင်းပခြင်းဖြစ်ကြောင်း သိရသည်။

တာချီလိတ်အခြေစိုက် Tachileik Mountain Bike Group သည် အဖွဲ့ဝင်ပေါင်း (၇၀) နီးပါးရှိသည့် တာချီလိတ်မြို့ အခြေစိုက် စက်ဘီးစီးအဖွဲ့ဖြစ်ပြီး ယခုပြိုင်ပွဲသည်၎င်းတို့အဖွဲ့အနဖြေင့် ပထမဆုံး ကျင်းပသည့်ပွဲဖြစ်ကြောင်း သိရသည်။

ဓာတ်ပုံ - ဇောင်းညီ