~~~~~~~~⊰❂ unicode ❂⊱~~~~~~~~

ဖမ်းဆီးခံသတင်းသမားနှစ်ဦးဖြစ်စဉ်အား ရှင်းလင်းရန်နှင့် အမြန်ဆုံးပြန်လွှတ်ပေးရန် သတင်းသမားအဖွဲ့အစည်း ၁၂ ဖွဲ့က တောင်းဆိုချက် ထုတ်ပြန်
*************
ရန်ကုန်အခြေစိုက် ရိုက်တာ(Reuters)သတင်းဌာနမှ သတင်းထောက်နှစ်ဦးကို အရေးယူလိုက်ခြင်းနှင့် ပတ်သက်၍ ဖြစ်စဉ်အား ပွင့်လင်းမြင်သာစွာ ရှင်းပြရန်နှင့် သတင်းစာဆရာများအား အမြန်ဆုံး ပြန်လွှတ်ပေးရန် မြန်မာနိုင်ငံ သတင်းသမား အဖွဲ့အစည်း(၁၂)ခုက ဒီဇင်ဘာလ (၁၃)ရက်နေ့တွင် တောင်းဆိုချက်တစ်စောင် ထုတ်ပြန် တိုက်တွန်းလိုက်သည်။

 “ကျွန်တော်တို့ သတင်းသမားတွေအနေနဲ့က မမြင်သင့်တာ၊ မကြားအပ်တာ၊ မမြင်သင့်တာ မရှိဘူးပေါ့လေ။ ဒါကို ပြန်ရေးတဲ့အခါ၊ ထုတ်ဖေါ်တဲ့အခါမှာတော့ သတင်းစာကျင့်ဝတ်နဲ့အညီ၊ ကိုယ့်ရဲ့ လူ့အဖွဲ့အစည်း အကျိုးစီးပွားနဲ့အညီ ထုတ်ပြန်သင့်တာ၊ မထုတ်ပြန်သင့်တာကို ဆုံးဖြတ်ရပါတယ်။ ကျွန်တော်တို့လက်ထဲမှာ ဘယ်အချက်အလက်မရှိရဘူးဆိုတဲ့ အကန့်အသတ်မရှိပါဘူး။ အခု စွဲထားတဲ့ဥပဒေကလည်း ကိုလိုနီ ဗြိတိသျှအစိုးရက မြန်မာပြည်သူတွေကို နှိပ်ကွပ်ဖို့ ပြဌာန်းခဲ့တဲ့ ကိုလိုနီဥပဒေကို လက်ရှိအစိုးရက ပြန်သုံးနေတာတော့ သိပ်ပြီးရုပ်ပျက်ဆင်းပျက်နိုင်လွန်းတယ်”ဟု မြန်မာဂျာနယ်လစ်ကွန်ယက် အထွေထွေ အတွင်းရေးမှူး ဦးဇေယျာလှိုင်က တာချီလိတ်သတင်းအေဂျင်စီသို့ ပြောသည်။

ရိုက်တာသတင်းဌာန၏ သတင်းထောက်နှစ်ဦးဖြစ်သည့် ကိုဝလုံး (ခ) သက်ဦးမောင်မောင်နှင့် ကိုကျော်စိုးဦး (ခ) မိုးအောင်တို့အား ရခိုင်ပြည်နယ်၊ မောင်တောခရိုင်တွင်ဖြစ်ပွားခဲ့သည့် တိုက်ပွဲဖြစ်စဉ် အစီရင်ခံစာများ လက်ဝယ်တွေ့ရှိမှုဖြင့် ဒီဇင်ဘာလ (၁၂) ရက်နေ့ညက ရန်ကုန်မြို့၊ ထောက်ကြန့်နယ်မြေရဲစခန်းတွင်  (ပ) ၁၂၉၈/၂၀၁၇၊ ၁၉၂၃ ခုနှစ်၊ မြန်မာနိုင်ငံအစိုးရ လျှို့ဝှက်ချက်အက်ဥပဒေပုဒ်မ-၃ ဖြင့် အမှုဖွင့်လိုက်ခြင်းဖြစ်ပြီး ဒုတိယရဲမှူး မိုးရန်နိုင်နှင့် ရဲတပ်ကြပ်ကြီး ခင်မောင်လင်းတို့ကိုလည်း လျှို့ဝှက်အက်ဥပဒေနှင့် ရဲစည်းကမ်း ထိန်းသိမ်းရေးဥပဒေများဖြင့် အရေးယူသွားမည်ဖြစ်ကြောင်း ပြန်ကြားရေးဝန်ကြီးဌာနက ဒီဇင်ဘာလ (၁၃)ရက်နေ့တွင် သတင်းဖေါ်ပြထားခြင်းဖြစ်သည်။

 ပြန်ကြားရေးဝန်ကြီးဌာန၏ သတင်းဖေါ်ပြချက်တွင် ရန်ကုန်အခြေစိုက် ရိုက်တာသတင်းဌာန၏ သတင်းထောက်များဖြစ်သည်ကို သိသော်လည်း ပြည်ပသတင်းဌာနများအား သတင်းရောင်းစားမည့်ပုံစံရေးသားထားခြင်းသည် ပြန်ကြားရေးဝန်ကြီးဌာနအနေဖြင့် သတင်းစာကျင့်ဝတ် ဖေါက်ဖျက်သည့်လုပ်ရပ်ဟုလည်း မြန်မာဂျာနယ်လစ်ကွန်ယက် အထွေထွေ အတွင်းရေးမှူး ဦးဇေယျာလှိုင်က ထောက်ပြ ဝေဖန်လိုက်သည်။

အဆိိုပါ သတင်းသမားနှစ်ဦးအား အရေးယူလိုက်ခြင်းနှင့်ပတ်သက်၍ သတင်းသမားများအနေဖြင့် သတင်းဖြစ်ပွားရာနေရာသို့ သွားရောက်သတင်းယူခွင့်ရှိသကဲ့သို့ သတင်းပြည့်စုံ မှန်ကန်စွာတင်ပြနိုင်ရန် သတင်းနှင့်ဆက်စပ်သည့် အချက်အလက်များကို မေးမြန်းစုဆောင်းခွင့်ရှိပြီး သတင်းနှင့်ပတ်သက်သည့် အချက်အလက်များ လက်ဝယ်တွေ့ရှိရုံမျှဖြင့် မြန်မာနိုင်ငံအစိုးရလျှို့ဝှက်ချက်များ အက်ဥပဒေကို ချိုးဖောက်သည်ဟု စွပ်စွဲခြင်းသည် သတင်းလွတ်လပ်ခွင့်ကို ခြိမ်းခြောက်ရာကျပါသည်ဟု သတင်းသမားအဖွဲ့အစည်းများ၏ ထုတ်ပြန်ချက်တွင် ဖေါ်ပြလိုက်သည်။

ဗြိတိသျှကိုလိုနီအစိုးရက အုပ်ချုပ်ခံမြန်မာပြည်သူများကို နှိပ်ကွပ်ရန်ရည်ရွယ်ချက်ဖြင့် ၁၉၂၃ ခုနှစ်ကတည်းက ရေးဆွဲပြဌာန်းခဲ့သည့် ဥပဒေဖြင့် ဖမ်းဆီးခြင်းသည် ဒီမိုကရေစီအစိုးရအတွွက် ဂုဏ်သိက္ခာကျဆင်းစေသည့် လုပ်ရပ်အဖြစ် ရှုမြင်ပြီး ရခိုင်အရေးနှင့်ပတ်သက်၍ နိုင်ငံတကာမီဒီယာအသိုင်းအဝိုင်းတွင် မြန်မာအစိုးရအပေါ် သံသယကြီးထွားနေချိန်၌ ယခုကဲ့သို့ ဖမ်းဆီးထိန်းသိမ်းလိုက်ခြင်းမှာ အစိုးရ၏ဂုဏ်သိက္ခာကို ပို၍ညစ်နွမ်းစေနိုင်ပါသည်ဟု ထုတ်ပြန်ချက်တွင် ဝေဖန်ထောက်ပြထားသည်။

အဆိိုပါ သတင်းသမားနှစ်ဦးအား ဖမ်းဆီးထိန်းသိမ်းပြီးနောက် မိသားစုဝင်များအား ဆက်သွယ်အသိပေးခြင်း မပြုခြင်းမှာလည်း နိုင်ငံသားအခွင့်အရေးချိုးဖောက်ခံရမည့်အရေး စိုးရိမ်ဖွယ်ဖြစ်သည်ဟု ထုတ်ပြန်ချက်တွင် ဖေါ်ပြထားသည်။

သတင်း #အင်မိုင်ခ