~~~~~~~~⊰❂ unicode ❂⊱~~~~~~~~

ပြည်နယ်အစိုးရအဖွဲ့ဝင်များနှင့် လူထုတွေ့ဆုံပွဲများတွင် ဒေသခံများ တက်ရောက်ဆွေးနွေးရန် ပြည်နယ်ဝန်ကြီး တိုက်တွန်း
*********
ရှမ်းပြည်နယ် အစိုးရအဖွဲ့ဝင်များနှင့် ဒေသတွင်းလူထုတွေ့ဆုံပွဲများတွင် အလွှာအသီးသီးမှ တင်ပြဆွေးနွေးလိုသူများ တက်ရောက်ဆွေးနွေးကြရန် ဒီဇင်ဘာလ (၁၆)ရက်နေ့က  ရှမ်းပြည်နယ်(အရှေ့ပိုင်း) ကျိုင်းတုံမြို့တွင် ပြည်နယ်အစိုုးရအဖွဲ့ဝင်ဝန်ကြီးနှစ်ဦးနှင့် ဒေသခံလူထုတွေ့ဆုံပွဲတွင် ပြောကြားလိုက်သည်။

ရှမ်းပြည်နယ် (အရှေ့ပိုင်း) ကျိုင်းတုံမြို့တွင် ရှမ်းပြည်နယ်အစိုးရအဖွဲ့ဝင် စီမံကိန်းနှင့် စီးပွားရေးဝန်ကြီး ဦးစိုးညွန့်လွင်နှင့် ဘဏ္ဍာရေးဝန်ကြီး ဦးစိုင်းရှဲန်တစ်လုံတို့က ဒေသခံလူထုနှင့်တွေ့ဆုံပွဲ၌ အလွှာအသီးသီးမှ ဒေသခံများ ပါဝင်ခြင်းမရှိသဖြင့် ယင်းကဲ့သို့ တိုက်တွန်းလိုက်ခြင်းဖြစ်သည်။

“ဒီနေ့ပြုလုပ်တဲ့ လူထုတွေ့ဆုံပွဲက ပြီးပြည့်စုံတဲ့တွေ့ဆုံပွဲတော့ မဟုတ်ဘူး။ မြို့ပေါ်က ရပ်ကွက်သူ၊ ရပ်ကွက်သားတွေ မပါဘူး။ နောက်ပြီးတော့ အလွှာအသီးသီးက ဒေသခံလူထုတွေ မပါဘူး။ လူမှုရေးအဖွဲ့အစည်းတွေ အားနည်းတယ်။ ကျေးရွာတွေက ပါတယ်ဆိုပေမဲ့ ဘယ်ရွာက ရွာသားတွေ ခေါ်လာလည်း မသိဘူး။ နောက်နောင်ကို ဒီလိုကိစ္စမျိုးကို ရှောင်ရှားပေးပါ။ နောက်နောင်ဆိုရင် လူထုအားလုံးပါ၀င်လာပြီး လူထုအသံကို လိုချင်ပါတယ်”ဟု ရှမ်းပြည်နယ် စီမံကိန်းနှင့် စီးပွားရေးဝန်ကြီး ဦးစိုးညွှန့်လွင်က အခမ်းအနားတွင် ပြောကြားလိုက်သည်။

အစိုးရအဖွဲ့အနေဖြင့် လူထုတွေ့ဆုံပွဲများတွင် အစိုးရ၏ ဆောင်ရွက်နေမှုများ၊ မလုပ်ဆောင်နိုင်သေးသည့် လုပ်ငန်းအခြေအနေများကို လူထုအား အသိပေးလိုသဖြင့် လူထုတွေ့ဆုံပွဲများတွင် ဒေသခံလူထု တက်ရောက်စေလိုကြောင်း ဝန်ကြီးကဆိုသည်။

အဆိုပါ အခမ်းအနားသို့ ပြည်နယ်၊ ခရိုင်၊ မြို့နယ်အဆင့် ဌာနဆိုင်ရာတာဝန်ရှိသူများ၊ နိုင်ငံရေးပါတီများနှင့် ကျေးရွာ၊ရပ်ကွက်များမှ ဒေသခံများ တက်ရောက်ခဲ့ကြခြင်း ဖြစ်ပြီး အခမ်းအနားတွင် ကျိုင်းတုံတက္ကသိုလ်နှင့် ပညာရေးကောလိပ်တို့တွင် လိုအပ်လျှက်ရှိသော စာသင်ခန်းများ၊ လူနေအဆောင်များနှင့် အခြားလိုအပ်ချက်များအတွက် တင်ပြခဲ့ကြပြီး နောင်ခမ်းကန် သာယာလှပရေးအတွက် ပြုပြင်မွမ်းမံမှုများ ပြုလုပ်နိုင်ရန်၊ နိုင်ငံခြားသား ခရီးသွားဧည့်သည်များ ဒေသအတွင်းသို့ ပိုမိုဝင်ရောက်လာနိုင်ရန် ဆောင်ရွက်သင့်သည်များနှင့် ရေသန့်လုပ်ငန်းများအတွက် FDA ထောက်ခံချက် ရယူရန်အတွက် ကြုံတွေ့နေရသော အခက်အခဲများကို အသီးသီးတင်ပြကြကြောင်း သိရသည်။

အခမ်းအနားသို့ ပြည်နယ်ဝန်ကြီးများနှင့်အတူ ပြည်သူ့လွှတ်တော် ကို်ယ်စားလှယ် ဒေါက်တာ ဒေါ်သန်းငွေနှင့် ဦးနေဝင်း၊ ပြည်နယ်လွှတ်တော်ကိုယ်စားလှယ် ဦးခင်မောင်တင့်နှင့် ဒေါက်တာဝဏ္ဏစိုး၊ ပြည်နယ်ဒုတိယအုပ်ချုပ်ရေးမှူး ဦးရဲနို်င်နှင့် တကွ ပြည်နယ်၊ ခရိုင်၊ မြို့နယ်အဆင့် ဌာနဆိုင်ရာများ နိုင်ငံရေးပါတီများနှင့် ဒေသခံများ တက်ရောက်ခဲ့ကြသည်။

သတင်း၊ဓါတ်ပုံ #ဇွဲမြတ်