ရှမ်းပြည်နယ်(အရှေ့ပိုင်း) ကျိုင်းတုံမြို့မှ ကျောင်းဆရာမတစ်ဦး၏ မှတ်ပုံတင်ဓာတ်ပုံကို အွန်လိုင်းမှ ဈေးဝယ်ယူသူများအား သက်သေအထောက်အထားအဖြစ်ပြ၍ လိမ်လည်ရောင်းချမှုများ ပြုလုပ်နေသည့် ဟန်သီပါတိတ်ချည်ထည် ရောင်းဝယ်ရေးနှင့် ဟန်သီထွန်းအမည်ရှိ ဖေ့စ်ဘုတ်စာမျက်နှာများအား အရေးယူပေးရန် ကျိုင်းတုံမြို့မရဲစခန်းနှင့် စားသုံးသူအငြင်းပွားမှုဖြေရှင်းရေးစင်တာများသို့ တိုင်ကြားထားကြောင်း သိရသည်။

“ကျွန်မ မှတ်ပုံတင်ပါတဲ့ ပိုက်ဆံအိတ်ပျောက်သွားတုန်းက မှတ်ပုံတင်ကောက်ရထားတယ်ဆိုပြီး အွန်လိုင်းမှာ တင်လာပေးလို့ ဆက်သွယ်ပြီး ပြန်ယူခဲ့ပါတယ်။ ကောက်ရတဲ့သူက အွန်လိုင်းမှာ မှတ်ပုံတင်ကို ဓာတ်ပုံရိုက်ပြီး တင်ခဲ့တာပါ။ အဲဒီတုန်းကတော့ ဘာမှ ပြဿနာမရှိပါဘူး။ နောက် H1N1 တွဖြေစ်တဲ့ကာလမှာ H1N1 Mask တွေ အွန်လိုင်းကနေ ကျွန်မနာမည်နဲ့ရောင်းတယ်။ ဝယ်သူတွေကို သူ့မှတ်ပုံတင်ပါဆိုပြီး ကျွန်မ မှတ်ပုံတင်ကို ပြတယ်လို့ သိရတယ်။ ဒါပေမဲ့ ငွေလွှဲပြီး ပစ္စည်းမပို့တော့ ဝယ်တဲ့သူတွေက သူပြထားတဲ့ ကျွန်မမှတ်ပုံတင်ပုံနဲ့အတူ အွန်လိုင်းမှာ တင်လာကြတယ်။ အဲဒါပြီးတော့ ဒီတစ်ပတ်အတွင်းမှာပဲ နောက်ထပ် ပါတိတ်ရောင်းတဲ့ page ကနေ ကျွန်မ မှတ်ပုံတင်သုံးတယ်လို့ ထပ်သိရတယ်။ ဝယ်တဲ့သူတွေက ငွေလွှဲရင်တော့ အဲဒီမှတ်ပုံတင်မဟုတ်ဘဲ တခြားမှတ်ပုံတင်တို့၊ wave money တို့နဲ့ လွှဲခိုင်းတယ်လို့ သိရတယ်။ ပိုက်ဆံလွှဲပြီးရင် ပစ္စည်းပို့မပေးတော့ လူလိမ်မပါဆိုပြီး ကျွန်မ မှတ်ပုံတင်ပုံနဲ့ အွန်လိုင်းတင်လာကြမှ ကျွန်မက သိရတာပါ။ ဒါနဲ့ ကြိုးစား ဆက်သွယ်ကြည့်တော့ အဲဒီက ဈေးဝယ်ခဲ့တဲ့ အစ်မတစ်ယောက်နဲ့ ဆက်သွယ်မိပါတယ်။ သူက ပြောတာတော့ ဈေးရောင်းတဲ့သူက တောင်ကြီးမှာနေတယ်လို့ ပြောတယ်။ ဒါပေမဲ့ ငွေထုတ်သွားတာက အင်းစိန်ဘက်ကနေ ထုတ်သွားတယ်လို့ ပြောပါတယ်။ အဲဒီလိုဖြစ်နေတာကို ကျိုင်းတုံ ရဲစခန်းကိုတော့ ကျွန်မတိုင်ကြားထားပါတယ်။ စားသုံးသူအငြင်းပွားမှုဖြေရှင်းရေးစင်တာကိုလည်း အကြောင်းကြားထားပါတယ်”ဟု မှတ်ပုံတင်အသုံးပြုခံနေရသည့် ဆရာမ ဒေါ်ဟန်သီထွန်းက တာချီလိတ်သတင်းအေဂျင်စီသို့ ပြောသည်။

ယင်းကဲ့သို့ အွန်လိုင်းမှ လိမ်လည်ရောင်းချခြင်းများကြောင့် ဝယ်ယူသူများက မှတ်ပုံတင်ဓာတ်ပုံဖြင့် အွန်လို်င်းတွင် ရေးသားခံရခြင်းများကြောင့် ပတ်ဝန်းကျင်အသိုင်းအဝိုင်းများက အထင်လွဲမှုများအား ဖြေရှင်းနေရသဖြင့် ယင်းကဲ့သို့ တိုင်ကြားခြင်းဖြစ်ကြောင်း သိရသည်။

“စားသုံးသူရေးရာနဲ့ပတ်သက်ရင် ကုန်ပစ္စည်းရောင်းချတာ၊ ထုတ်လုပ်တာ၊ ဝယ်ယူတာနဲ့ပတ်သက်တာဖြစ်ဖြစ် ဝန်ဆောင်မှုနဲ့ပတ်သက်တာဖြစ်ဖြစ် အဆင်မပြေမှုတွေ ဖြစ်လာရင် စားသုံးသူအငြင်းပွားမှု လက်ခံဖြေရှင်းပေးရေး စင်တာတွေမှာ သွားရောက်တိုင်ကြားနိုင်ပါတယ်။ နောက် ဒီလို အွန်လိုင်းကနေ လိမ်လည်ရောင်းချမှုက သက်ဆိုင်ရာ နယ်မြေရဲစခန်းတွေမှာလည်း အမှုဖွင့် တိုင်ကြားလို့ရပါတယ်။ ကျွန်တော်တို့က ပထမ ညှိနှိုင်းဆောင်ရွက်ပေးပါတယ်။ မရရင်တော့ ဥပဒေကြောင်းအရ သွားတာပေါ့။ အွန်လိုင်းကနေ ဘယ်သူမှန်းမသိဘူးဆိုရင်လည်း ကွင်းဆက်လိုက် ဖောထုတ်ပေးနိုင်အောင် ကြိုးစားပါတယ်”ဟု ရှမ်းပြည်နယ်စားသုံးသူရေးရာဦးစီးဌာန လက်ထောက်ညွှန်ကြားရေးမှူး ဦးမင်းအောင်က ပြောသည်။

အွန်လိုင်းမှ ဈေးဝယ်ယူသူများအနဖြေင့် ငွကြေိုတင်လွှဲပြီး ပစ္စည်းရောက်မလာခြင်း၊ မှာယူသည်နှင့် ပို့ပေးသည့်ပစ္စည်းမျက်မြင်အခြေအနေ ကွဲပြားခြင်းစသည့် ပြဿနာများကို အများဆုံးတွေ့နေရသဖြင့် အွန်လိုင်းမှ ဝယ်ယူရာတွင်လည်း စိစစ်ရွေးချယ်သင့်ကြောင်း၎င်းက အကြံပြုသည်။

ဟန်သီပါတိတ်ချည်ထည် ရောင်းဝယ်ရေးသို့ ဆက်သွယ်ရန် ဖုန်းနံပါတ်ဖော်ပြထားခြင်းမရှိဘဲ မက်ဆေ့မှ ပစ္စည်းများ မှာယူရခြင်းဖြစ်ကြောင်း အဆိုပါအွန်လိုင်းအရောင်းမှ မှာယူခဲ့သည့်အမျိုးသမီးထံမှ သိရပြီး တာချီလိတ်သတင်းအေဂျင်စီမှ ဟန်သီပါတိတ်ချည်ထည် ရောင်းဝယ်ရေးစာမျက်နှာသို့ ဆက်သွယ်ထားခြင်း အား ပြန်လည်ဖြကြေားခြင်းမရှိသည်ကို တွေ့ရသည်။

သတင်း #နန်းဟွမ်ခမ်း