~~~~~~~~⊰❂ unicode ❂⊱~~~~~~~~

ဆိုင်ကယ်ချန်ထားပြီး  ဧရာဝတီတံတား(မကွေး)ပေါ်မှ ခုန်ချသွားသည်ဟုယူဆရသူ နှစ်ရက်ကြာ ရှာဖွေသည်အထိ မတွေ့သေး
***********a
ဧရာဝတီတံတား(မကွေး) မင်းဘူးဘက်ခြမ်းမှ အောက်တိုဘာ(၂၈)ရက် နံနက်ပိုင်းတွင် လူတစ်ဦး ခုန်ချသွားသည်ဟု ယူဆသဖြင့် ရှာဖွေနေသော်လည်း အောက်တိုဘာလ (၂၉)ရက်နေ့ ညနေပိုင်းထိ အလောင်းရှာမတွေ့သေး ကြောင်း မင်းဘူးမြို့မရဲစခန်းမှ သိရသည်။

အောက်တိုဘာ(၂၈)ရက် နံနက်(၁၀)နာရီအချိန်တွင် ဧရာဝတီတံတား(မကွေး) မင်းဘူးဘက်ခြမ််းတွင် ဆိုင်ကယ်တစ်စီး ရပ်တန့်ထားပြီး လူတစ်ဦးမြစ်အတွင်းသို့ ခုန်ချရန်ပြုလုပ်နေကြောင်း လမ်းသွားလမ်းလာတစ်ဦးမှ တံတားရဲကင်းမှူး ဒုရဲအုပ်ကျော်ကျော်ထံ သတင်းပေးချက်အရ ချက်ချင်းသွားရောက်စစ်ဆေးခဲ့သော်လည်း ရပ်တန့်ထားသော ဆိုင်ကယ်တစ်စီးနှင့်အတူ ဆိုင်ကယ်စီးဦးထုပ်တစ်လုံး၊ ဖိနပ်တစ်ရံကိုသာ တွေ့ခဲ့ရကြောင်း သိရသည်။

" တံတားပေါ်က ခုန်ချတဲ့ဖြစ်စဉ် ရှိခဲ့သလားဆိုတာကတော့ တွေ့ရှိရတဲ့အထောက်အထားတွေအရ ရှိခဲ့တယ်လို့ ပြောရမှာဖြစ်ပေမဲ့ အလောင်းကိုတော့ ရှာမတွေ့သေးပါဘူး။ မြစ်အောက်ဘက်မှာရှိတဲ့ မင်းလှရဲစခန်းကိုတော့ လှမ်းပြီးချိတ်ဆက်ထားပါတယ်။ အလောင်းလည်းမတွေ့၊ လူပျောက်လည်းတိုင်ထားတာမရှိတော့ စခန်းမှာ အမှုဖွင့်ထားတာမျိုး မရှိသေးပါဘူး" ဟု မင်းဘူးမြို့မရဲစခန်းမှ ဒုရဲအုပ်လှိုင်မျိုးဝင်းက တာချီလိတ်အေဂျင်စီသို့ ပြောသည်။

ဆိုင်ကယ်အတွင်းမှတွေ့ရှိရသော ပိုက်ဆံအိတ်ထဲမှ တွေ့ရသည့် ဖုန်းနံပါတ်တစ်ခုကို ဆက်သွယ်ကြည့်ရာ မြို့သစ်မြို့နယ် ရွှေဘိုကျေးရွာနေ ဦးပန်းညွန့်၏သား မြတ်မင်းထိုက် စီးနင်းသွားသည့် ဆိုင်ကယ်ဖြစ်ကြောင်း အတည်ပြုနိုင်ခဲ့ကြောင်း သိရသည်။

 အောက်တိုဘာလ (၂၈)ရက်နေ့ နံနက် (၆) နာရီခွဲအချိန်ခန့်က ဦးပန်းညွန့်သည် သားဖြစ်သူ မြတ်မင်းထိုက်အား မကွေးဆေးရုံတွင်ပြသရန် သားအဖနှစ်ဦး ဆိုင်ကယ်ဖြင့်ထွက်လာခဲ့ရာ နံနက်(၉)နာရီခန့်တွင် မြတ်မင်းထိုက်က ကွမ်းသွားဝယ်မည်ဟုဆိုကာ ဆိုင်ကယ်ဖြင့် တစ်ဦးတည်း ထွက်သွားခဲ့ခြင်းဖြစ်ကြောင်း သိရသည်။
ဧရာဝတီမြစ်အတွင်း ခုန်ချခဲ့သည်ဟု ယူဆရသည့် မြတ်မင်းထိုက်အား ရှာဖွေတွေ့ရှိနိုင်ရေးအတွက် ဧရာဝတီတံတားရဲကင်းမှုး ဒုရဲအုပ်ကျော်ကျော်နှင့် ၎င်း၏မိသားစုများက စက်လှေတစ်စီးဖြင့် မြစ်ကြောင်းတစ်လျှောက်တွင် ရှာဖွေမှုများပြုလုပ်နေခြင်းဖြစ်ကြောင်း သိရသည်။

မင်းဘူးမြို့မရဲစခန်းက မင်းလှရဲစခန်းသို့လည်း ဆက်သွယ်အကြောင်းကြားထားပြီး ရှာဖွေနေကြောင်း သိရသည်။

သတင်း #ဖီးနစ်
ဓာတ်ပုံ #နွယ်နွယ်