~~~~~~~~⊰❂ unicode ❂⊱~~~~~~~~

မြေလွတ်၊ မြေလပ်နှင့် မြေရိုင်း လုပ်ကိုင်သူများအား အခွန်စတင်ကောက်ခံတော့မည်
*************
အခွန်ကင်းလွတ်ခွင့်ကာလကုန်ဆုံးပြီးသည့် မြေလွတ်၊ မြေလပ်နှင့် မြေရိုင်း လုပ်ကိုင်သူများအား ၂၀၁၇-၂၀၁၈ ဘဏ္ဍာရေးနှစ်မကုန်မီ အခွန်စတင်ကောက်ခံသွားတော့မည်ဖြစ်ကြောင်း သိရသည်။

“၂၀၁၂ ခုနှစ်၊ မြေလွတ်၊ မြေလပ်နှင့်မြေရိုင်းများ စီမံခန့်ခွဲရေးနည်းဥပဒေ အပိုဒ် ၃၉ ပါ ကင်းလွတ်ခွင့် ကာလကုန်ဆုံးပြီးသည့် မြေလွတ်၊ မြေလပ်နှင့် မြေရိုင်း လုပ်ကိုင်သူများအား နည်းဥပဒေ အပိုဒ် ၄၀ ပါ ပြဋ္ဌာန်းချက်နှင့်အညီ ၂၀၁၇-၂၀၁၈ ဘဏ္ဍာရေးနှစ်မကုန်မီ အခွန်စတင်ကောက်ခံနိုင်ရန် ဆောင်ရွက်လျက်ရှိပါကြောင်း”ဟု စိုက်ပျိုးရေး၊ မွေးမြူရေးနှင့် ဆည်မြောင်း ဒု-ဝန်ကြီး ဦးလှကျော်က ပြည်သူ့လွှတ်တော်တွင် ဖြေကြားခဲ့ခြင်းဖြစ်သည်။

လက်ရှိတွင် မြေခွန်ကောက်ခံရာတွင် ကောက်ခံသူအရာရှိများ လိုက်နာဆောင်ရွက်ရမည့်နည်းလမ်းကို ညွှန်ကြားချက် ထုတ်ပြန်နိုင်ရေးအတွက် ညွှန်ကြားချက်မူကြမ်းကို တာဝန်ရှိသူများထံသို့ ဖြန့်ဝေပြီး အကြံပြုချက်များ စုစည်းရရှိမှုအပေါ် အနီးဆုံး မြေလွတ်၊ မြေလပ်နှင့်မြေရိုင်းများ စီမံခန့်ခွဲရေးဗဟိုကော်မတီ အစည်းအဝေးတွင် တင်ပြဆွေးနွေးပြီး မြေခွန်ကောက်ခံရေးဆိုင်ရာ ညွှန်ကြားချက်ကို ထုတ်ပြန်ဆောင်ရွက်သွား မည်ဖြစ်ကြောင်း သိရသည်။

မြေလွတ်၊ မြေလပ်နှင့် မြေရိုင်းများအား မြေခွန်တော် စည်းကြပ်ကောက်ခံနိုင်ရေးကိစ္စနှင့်ပတ်သက်၍ ပြည်ထောင်စုရှေ့နေချုပ်ရုံးနှင့် စီမံကိန်းနှင့်ဘဏ္ဍာရေးဝန်ကြီးဌာနတို့၏ အကြံပြုချက်၊ သဘောထား မှတ်ချက်များကို တင်ပြတောင်းခံပြီး ပြည်ထောင်စုအစိုးရအဖွဲ့ စီးပွားရေးရာကော်မတီသို့ တင်ပြခဲ့ပြီး ကော်မတီ၏ဆုံးဖြတ်ချက်အရ ၂၀၁၇ ခုနှစ် သြဂုတ်လ (၁၀)ရက်နေ့တွင် ကျင်းပသည့် ပြည်ထောင်စုအ စိုးရအဖွဲ့အစည်းအဝေး အမှတ်စဉ် (၁၅/၂၀၁၇)သို့ တင်ပြအတည်ပြုချက်ရယူခဲ့ပြီးဖြစ်ကြောင်း သိရသည်။

အောက်တိုဘာလ (၂၇) ရက်နေ့တွင် ကျင်းပသော ပြည်သူ့လွှတ်တော်အစည်းအဝေးတွင် လောင်းလုံး မဲဆန္ဒနယ်မှ ဒေါ်ခင်စန္ဒီက တနင်္သာရီတိုင်းဒေသကြီးအတွင်းရှိ အသုံးပြုခွင့်ပေးထားသည့် မြေလွတ်၊ မြေလပ်နှင့် မြေရိုင်းများအား မည်သည့်အချိန်တွင် မြေခွန်ကောက်ခံမည်နှင့် ကောက်ခံမည့် အစီအစဉ်များ မည်သို့ ဆောင်ရွက်ထားသည်ကို သိလိုခြင်း နှင့် စပ်လျဉ်း၍ မေးမြန်းခဲ့ခြင်းအား စိုက်ပျိုးရေး၊ မွေးမြူရေးနှင့် ဆည်မြောင်း ဒု-ဝန်ကြီး ဦးလှကျော်က ယင်းကဲ့သို့ ပြန်လည်ဖြေကြားခဲ့ခြင်းဖြစ်သည်။

မြေလွတ်မြေလပ်နှင့် မြေရိုင်းများ စီမံခန့်ခွဲရေး ဗဟိုကော်မတီက ၂၀၁၂ မြေလွတ်မြေလပ်နှင့် မြေရိုင်းများ စီမံခန့်ခွဲရေး ဥပဒေအရ မြေယာလုပ်ပိုင်ခွင့်၊ အသုံးပြုခွင့်များကို လုပ်ပိုင်ခွင့်ပေးအပ်ခြင်းဖြစ်ပြီး အသုံးပြုခွင့် ရရှိထားသူများအနေဖြင့် မူလခွင့်ပြုကာလအတွင်း သတ်မှတ်ထားသည့် စည်းကမ်းချက်များနှင့်အညီ လုပ်ငန်းဆောင်ရွက်ရန် ပျက်ကွက်လျှင် သို့မဟုတ် စည်းကမ်းချက်ချိုးဖောက်လျှင် တင်သွင်းထားသည့် အာမခံကြေးအား နိုင်ငံတော်ဘဏ္ဍာငွေအဖြစ် သိမ်းဆည်းခြင်းအပြင် လုပ်ပိုင်ခွင့်၊ အသုံးပြုခွင့်ကို ပြန်လည် ရုပ်သိမ်းခြင်းခံရမည်ဟုလည်း ပြဋ္ဌာန်းထားခြင်းဖြစ်သည်။

သတင်း #နန်းဟွမ်ခမ်း
ဓါတ်ပုံ #ပြည်သူ့လွှတ်တော်