~~~~~~~~⊰❂ unicode ❂⊱~~~~~~~~

ကျောက်မဲခရိုင် မန်ခေါက်ရွာမှ ပညာရေးဝန်ထမ်းအမျိုးသမီး၏နေအိမ်သို့ လက်နက်ကိုင်နှစ်ဦးဝင်ရောက် အဓမ္မပြုကျင့်
**********
ရှမ်းပြည်နယ်(မြောက်ပိုင်း) ကျောက်မဲခရိုင် မိုင်းငေ့ါမြို့နယ် မန်ခေါက်ကျေးရွာမှ ပညာရေးဝန်ထမ်း အမျိုးသမီး၏နေအိမ်သို့ အောက်တိုဘာလ (၂၅)ရက်နေ့ နံနက် (၁)နာရီခန့်တွင် TNLA အဖွဲ့တံဆိပ်ပါသည့် ဝတ်စုံဝတ်ထားသည့် လက်နက်ကိုင်(၂)ဦးရောက်လာပြီး အဓမ္မပြုကျင့်ကာ နေအိမ်တွင်း ရှာဖွေမှုများ လုပ်ဆောင်ခဲ့ကြောင်း သိရသည်။

“ဖြစ်စဉ်နဲ့ပတ်သက်လို့ ကျွန်တော်တို့အနေနဲ့ စုံစမ်းသိရှိရသလောက် ပြည်နယ်အစိုးရအဖွဲ့ကို တင်ပြထားပြီး ဖြစ်ပါတယ်။ ဒါက လုံခြုံရေးကိစ္စဖြစ်နေပြီး တစ်ဖက်ကလည်း ငြိမ်းချမ်းရေးအဖွဲဲ့တွေနဲ့ ပတ်သက်လာအုံးမယ်ဆိုတော့ အဲဒီကိစ္စကိုတော့ ပြည်နယ်အစိုးရကပဲ ညွှန်ကြားပါလိမ့်မယ်”ဟု ကျောက်မဲခရိုင်အုပ်ချုပ်ရေးမှူး ဦးအောင်ချိုဦးက တာချီလိတ်သတင်းအေဂျင်စီသို့ ပြောသည်။

အဆိုပါ လက်နက်ကိုင်နှစ်ဦးသည် လက်ကိုင်ဖုန်း(၂)လုံးကို ယူဆောင်သွားပြီး နံနက်(၃)နာရီခန့်တွင် ပြန်လည် ထွက်ခွာသွားခဲ့ကြောင်းသိရပြီး အဆိုပါကိစ္စနှင့်ပတ်သက်၍ ကျောက်မဲမြို့နယ်အထွေထွေအုပ်ချုပ်ရေးဌာနနှင့် ပြည်နယ် ပညာရေးဌာနများသို့ ကျောက်မဲမြို့နယ် ပညာရေးမှူးရုံးမှ တင်ပြထားခြင်းဖြစ်ကြောင်း သိရသည်။

“မနက်(၁)နာရီလောက်မှာပေါ့။ အဲဒီ ဆရာမကြီးရဲ့နေအိမ်ကို TNLA တံဆိပ်နဲ့ ဝတ်စုံဝတ်ဆင်ထားတဲ့ လက်နက်ကိုင်(၂)ဦးက ရောက်လာတယ်။ အိမ်ထဲဝင်ပြီးတော့ ပစ္စည်းတွေ မွှေနှောက်ရှာဖွေတယ်။ ပြီးတော့ ဆရာမကြီးကို အိမ်ပြင်ဆွဲထုတ်ပြီး မတော်မတရားပြုကျင့်တယ်။ လက်ကိုင်ဖုန်းနှစ်လုံးကို ယူဆောင်ပြီး ထွက်သွားတယ်လို့ သိရပါတယ်။ မတရားကျင့်ခံရတဲ့ဆရာမကြီး အပါအဝင် အဲဒီကျောင်းက ဆရာ၊ ဆရာမ(၁၃)ဦးကို ကျောက်မဲကိုပြန်ခေါ်လာနေပါတယ်”ဟု ကျောက်မဲမြို့နယ်ပညာရေးမှူးရုံးမှ တာဝန်ရှိသူက တာချီလိတ်သတင်းအေဂျင်စီသို့ ပြောသည်။

ကျောက်မဲမြို့နယ်ပညာရေးမှူးရုံးမှ လက်ထောက် ပညာရေးမှူးနှင့် ဝန်ထမ်းများပါဝင်သည့်အဖွဲ့က အောက်တိုဘာလ(၂၅)ရက်နေ့ နံနက်(၁၀)နာရီခန့်တွင် အဆိုပါကျေးရွာသို့သွားရောက်ကာ ဖြစ်စဉ်အသေးစိတ်အား စုံစမ်းခြင်းနှင့် မန်ခေါက်ကျေးရွာမှ ကျေးရွာအုပ်ချုပ်ရေးမှူးများ၊ မိဘဆရာအသင်း၊ ကျောင်းအကျိုး တော်ဆောင် အဖွဲ့များနှင့် ညှိနှိုင်းကာ အဆိုပါရွာရှိ ပညာရေးဝန်ထမ်းများ၏ လုံခြံုရေးအတွက် မိုင်းငေါ့မြို့မှတစ်ဆင့် ကျောက်မဲမြို့သို့ ခေါ်ဆောင်လာရန်စီစဉ်နေကြောင်း သိရသည်။

အဆိုပါကိစ္စနှင့်ပတ်သက်၍ ကျောက်မဲခရိုင်ရဲတပ်ဖွဲ့မှူးရုံးနှင့် ကျောက်မဲမြို့နယ်ရဲတပ်ဖွဲ့မှူးရုံးသို့ ဆက်သွယ် စုံစမ်းရာတွင် ၄င်းဖြစ်စဉ်နှင့်ပတ်သက်သည့် အကြောင်းတစ်စုံတစ်ရာအတည်ပြု ပြောကြားမှုမရှိခဲ့ပါ။

သတင်း #နေဖြိုးမြင့်