~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း) တာချီလိတ်မြို့ ဆန်ဆိုင်း(က)ရပ်ကွက်၊ ဆန်ဆိုင်းဈေးအနီးရှိ နေအိမ်တစ်လုံး၌ အောက်တိုဘာလ (၄)ရက်နေ့ ည (၈)နာရီ (၅၅)မိနစ်ခန့်တွင် တရုတ်ရိုးရာ လမုန့်ပွဲတော် ကျင်းပနေစဉ် မီးရှူးမီးပန်းဖောက်ရာမှ မီးလောင်ကျွမ်းမှုဖြစ်ပွားကြောင်း သိရသည်။

ဆန်ဆိုင်း(က)ရပ်ကွက်၊ ဆန်ဆိုင်းဈေးလမ်းရှိ အားယုံ(ခ)အားရှဲန်၏ နေအိမ်တွင် တရုတ်ရိုးရာ လမုန့်ပွဲတော် ပြုလုပ်နေစဉ် အားယုံ(ခ)အားရှဲန်၏ နေအိမ်မှ လုပ်သား တစ်ဦးဖြစ်သည့် အိုက်ကွမ်း(ခ) ဆိုင်းကွမ်းက နေအိမ်ဘေး မြေကွက်လပ်တွင် မီးရှူးမီးပန်း ဖောက်ရာမှ နေအိမ် အပေါ်ထပ်မှ ဖွင့်ထားသည့် ပြတင်းတံခါးမှ တစ်ဆင့် အခန်းတွင်းသို့ မီးပန်း လွင့်စင်ကာ အိပ်ခန်းရှိမွေ့ယာအား မီး စတင်လောင်ကျွမ်းခြင်းဖြစ်ကြောင်း သိရသည်။

မီးလောင်မှုဖြစ်ပွားရာသို့ တာချီလိတ်ခရိုင်ရဲတပ်ဖွဲ့မှူး ဒုရဲမှူးကြီးထိန်ဝင်း၊ မြို့နယ်အုပ်ချုပ်ရေးမှူး ဦးထွန်းဝင်းအောင်၊ မြို့နယ်ရဲတပ်ဖွဲ့မှူး ရဲမှူးသန်းနု၊ မြို့မရဲစခန်းမှူး ဒုရဲမှူးကြည်စိုးနှင့်အဖွဲ့၊ ခရိုင်မီးသတ်ဦးစီးဌာနမှ ဦးစီးမှူး ဦးထွန်းနိုင်ဦးနှင့်အဖွဲ့၊ ဆန်ဆိုင်း(က)နှင့်(ခ)တို့မှ ရပ်ကွက်အုပ်ချုပ်ရေးမှူးနှင့်အဖွဲ့ဝင်များ၊ ရပ်ကွက်ပြည်သူ့စစ်များ သွားရောက်၍ ဝိုင်းဝန်း ငြှိမ်းသတ်ခဲ့ကြောင်း သိရသည်။

အဆိုပါ မီးလောင်ကျွမ်းမှုနှင့်ပတ်သက်၍ အိုက်ကွမ်း(ခ) အိုက်ဆိုင်းအား တာချီလိတ်မြို့မရဲစခန်းတွင် (ပ) ၂၀၂/၁၇၊ ရာဇသတ်ကြီးပုဒ်မ ၂၈၅ဖြင့် အမှုဖွင့်ဆောင်ရွက်နေကြောင်း သိရသည်။

သတင်း - #စိုင်းဇေယျာ