ရှမ်းပြည်နယ်(မြောက်ပိုင်း) လားရှိုးမြို့တွင် ဌာနဆိုင်ရာများနှင့် မြို့လူထု ပထမဦးဆုံးအကြိမ် ပူးပေါင်း ကျင်းပမည့် တန်ဆောင်တိုင်မီးပုံးပျံပွဲကို လားရှိုး - နမ္မတူလမ်းနံဘေး နားကွမ်းကျေးရွာအုပ်စုရှိ တိုင်းရင်းသား ယဉ်ကျေးမှုကွင်းအတွင်း နိုဝင်ဘာလ(၂)ရက်နေ့နှင့် (၃) ရက်နေ့တို့တွင် ပြုလုပ် သွားမည်ဖြစ်ကြောင်း သိရသည်။

“လားရှိုးမြို့က ဌာနဆိုင်ရာတွေနဲ့ မြို့နေလူထုပူးပေါင်းပြီး ပထမဦးဆုံးအကြိမ်ကျင်းပပြုလုပ်မှာဖြစ်ပါတယ်။ မီးပုံးပျံပွဲရဲ့ ကုန်ကျစရိတ်ကတော့ ခန့်မှန်းခြေ ကျပ်သိန်း(၅၀၀)ခန့်မှန်းထားပါတယ်။ တိုင်းရင်းသား ယဉ်ကျေးမှုကွင်းကလည်း အခုမှစတင်ပြီး ပြုလုပ်ထားတဲ့ကွင်းဖြစ်ပါတယ်။ လားရှိုးမြို့နယ်အတွင်းမှာရှိတဲ့ တိုင်းရင်းသားတွေရဲ့ အထိမ်းအမှတ်ပွဲတွေကျင်းပဖို့ရာ ပြုလုပ်ပေးတာဖြစ်ပြီး တိုင်းရင်းသား ယဉ်ကျေးမှုကွင်းမှာ မီးပုံးပျံပွဲကို နှစ်စဉ် နှစ်တိုင်း ဆက်ပြီး ကျင်းပပြုလုပ်သွားမှာဖြစ်ပါတယ်” ဟု မီးပုံးပျံပွဲဖြစ်မြောက်ရေး ပြန်ကြားရေးကော်မတီမှ အတွင်းရေးမှူးဒေါ်မမက တာချီလိတ်သတင်းအေဂျင်စီသို့ ပြောသည်။

လားရှိုး - နမ္မတူ အဝေးပြေးလမ်းနံဘေး(လားရှိုးမြို့ရှောင်လမ်းအနီး) နားကွမ်းကျေးရွာအုပ်စု နယ်နိမိတ် အတွင်း (၄)ဧကကျော် ကျယ်ဝန်းသည့်မြေနေရာတွင် ရှမ်းပြည်နယ်အစိုးရအဖွဲ့၏ ခွင့်ပြုချက်ဖြင့် တိုင်းရင်းသား ယဉ်ကျေးမှု ကွင်းတစ်ခု တည်ဆောက်ပေးနေခြင်းဖြစ်ပြီး ဒေသတွင်းရှိ တိုင်းရင်းသားများ၏ စည်းလုံးညီညွတ်မှု၊ ချစ်ကြည်ရင်းနီးမှုအား မြှင့်တင်ပေးရန်၊ တိုင်းရင်းသားများ၏ ဓလေ့ထုံးစံ၊ အစဉ်အလာရိုးရာ အထိမ်းအမှတ် ပွဲတော်များကို ကျင်းပရန်၊ ဒေသတွင်း ခရီးသွားလုပ်ငန်းများအား အထောက်အကူပြုနိုင်ရန် ရည်ရွယ်၍ တိုင်းရင်းသားယဉ်ကျေးမှုကွင်းအဖြစ် ပထမဦးဆုံးအကြိမ် နေရာသတ်မှတ်ပေးထားခြင်းဖြစ်ကြောင်း သိရသည်။

တန်ဆောင်တိုင်မီးပုံးပျံပွဲ နှင့် မီးရှူးမီးပန်း လွှတ်တင်ပွဲတွင် လွှတ်တင်ရန်အတွက် စိန်နားပန် မီးပုံးပျံ (၄) လုံး၊ ညမီးကြီး မီးပုံးပျံ (၇)လုံး စီစဉ်ထားပြီး မီးပုံးပျံတစ်လုံးလွှတ်တင်တိုင်းတွင် အရန် မီးပုံးပျံ အလုံး(၂၀၀)ကို လွှတ်တင် မည်ဖြစ်ပြီး စုစုပေါင်းအရန် မီးပုံးပျံ အလုံးရေ (၂၂၀၀) အသုံးပြုသွားမည်ဖြစ်ကြောင်း သိရသည်။

အဆိုပါ မီးပုံးပျံလွှတ်တင်ပွဲအတွက် ကုန်ကျစရိတ် ကျပ်သိန်း(၅၀၀)ခန့်ရှိမည်ဟု ခန့်မှန်းထားပြီး လက်ရှိအချိန်ထိ မီးပုံးပျံတန်ဖိုးများအပါအဝင် လှူဒါန်းမှုငွေ (၂၅၇) သိန်း ရရှိထားပြီဖြစ်ကြောင်း ပွဲဖြစ်မြောက်ရေးကော်မတီထံမှ သိရသည်။

လားရှိုးတွင် ၂၀၁၆ ခုနှစ် တန်ဆောင်တိုင်ပွဲတော်ကို ပုဂ္ဂလိက ကုမ္ပဏီတစ်ခုမှ ပထမဦးဆုံးအကြိမ် စတင်ကျင်းပခဲ့ခြင်းဖြစ်သည်။

သတင်း #နေဖြိုးမြင့်

~~~~~~~~⊰❂ unicode ❂⊱~~~~~~~~

⊰❂ #TachileikNewsAgency #TachileikOnlineNews  #တာချီလိတ်သတင်းအေဂျင်စီ www.tachileik.net  ❂⊱

~~~~~~ ကြော်ငြာ ~~~~~~