ရှမ်းပြည်နယ်(မြောက်ပိုင်း) လားရှိုးမြို့တွင် အလှူခံအဖွဲ့တစ်ခုက ရခိုင်ဒေသရှိ ဒုက္ခသည်များအား ကူညီထောက်ပံ့ရေးအတွက် အလှူခံရာတွင် အများအမြင်မသင့်တော်သည့်ပုံများ အသုံးပြုနေခြင်းနှင့် ခွင့်ပြုချက်မရသေးဘဲ အလှူခံခြင်းတို့ကြောင့် မြို့နယ်အထွေထွေအုပ်ချုပ်ရေးရုံးက စက်တင်ဘာလ (၈)ရက်နေ့တွင် ခေါ်ယူသတိပေးထားကြောင်း သိရသည်။
“မသင့်တော်တဲ့ပုံတွေ သုံးထားတဲ့အတွက် ဒါတွေက လူတစ်ဦးရဲ့ဂုဏ်သိက္ခာအနေနဲ့ မသင့်တော်ဘူး။ နောက်ပြီး တော့ သူတို့သုံးထားတဲ့ပုံတွေက တိုင်းရင်းသားတွေအချင်းချင်းကြားထဲမှာ စိတ်ဝမ်းကွဲစေနိုင်တဲ့ ပုံတွေပါတယ်။ လူမျိုးအချင်းချင်းကြားထဲမှာ မလိုလားအပ်တဲ့နောက်ဆက်တွဲပြသနာတွေ ဖြစ်စေလာနိုင်တယ်။ ဒါကြောင့် အဲဒီလို မသင့်လျော်တဲ့ပုံတွေကို အသုံးမပြုဖို့၊ မေတ္တာရပ်ခံလိုက်တာပါ။ နောက်တစ်ချက်က သူတို့အလှူခံအဖွဲ့က အလှူခံခွင့်ပြုမိန့်တင်ထားပေမဲ့ ခွင့်ပြုချက်မကျသေးဘဲ အလှူခံနေတာလည်းဖြစ်တယ်” ဟု လားရှိုးမြို့နယ်အုပ်ချုပ်ရေးမှူး ဦးနေလင်းထွန်းက တာချီလိတ်သတင်းအေဂျင်စီသို့ ပြောသည်။
အလှူခံသည့် ဗွီနိုင်းပိုစတာတွင် ရက်စက်စွာ အသတ်ခံထားရသည့်ပုံများနှင့် လူမျိုးဘာသာအရ ဂုဏ်သိက္ခာ ထိခိုက်စေသည့်ပုံများအား အသုံးမပြုရန် အလှူခံအဖွဲ့မှ တာဝန်ခံဖြစ်သူအား ခံဝန်ကတိရေးထိုးစေခဲ့ကြောင်း သိရသည်။
“ လားရှိုးမှာရှိတဲ့ တိုင်းရင်းသားတွေက ရခိုင်ဒေသမှာရှိတဲ့ ဒုက္ခသည်တွေအတွက် သဘောရိုးနဲ့ အလှူခံဖို့အတွက် လုပ်နေတာ တွေ့ရှိရတယ်။ တိုင်းရင်းသားအချင်းချင်း စာနာထောက်ထားတဲ့အနေနဲ့ လုပ်တာပေါ့။ သို့ပေမဲ့ မသင့်လျော်တဲ့ပုံတွေအသုံးပြုခြင်းနဲ့ လူမျိုးရေးကြားမှာ စိတ်သဘောထားကွဲစေနိုင်ပြီး လှုံ့ဆော်တဲ့ အသုံးအနှုန်းတွေ၊ ဓါတ်ပုံတွေကို အသုံးပြုထားတာဖြစ်တဲ့အတွက် အခုလို သတိပေးရတာ ဖြစ်ပါတယ်။ သူတို့ကလည်း ရိုးသားစွာ မှားယွင်းမှုဖြစ်ပါတယ်လို့ ဝန်ခံပါတယ်”ဟု လားရှိုးမြို့နယ်အုပ်ချုပ်ရေးမှူး ဦးနေလင်းထွန်းက ပြောသည်။
အလှူခံအဖွဲ့များအနေဖြင့် မြို့နယ်အထွေထွေအုပ်ချုပ်ရေးဌာနတွင် ခွင့်ပြုချက်ရယူရန်နှင့် အလှူခံရာတွင် သတ်မှတ်စည်းမျဉ်းစည်းကမ်းများ လိုက်နာရန်၊ လူ့ဂုဏ်သိက္ခာထိခိုက်စေသည့် အသုံးအနှုန်းများကို အသုံးပြုခြင်းမပြုရန်လိုအပ်ကြောင်း သိရသည်။
သတင်း #နေဖြိုးမြင့်
ဓါတ်ပုံ #ရွှေမင်းသား
