ကျောက်မဲတွင် မူးယစ်သတင်းအရဝင်ဖမ်းသည့်ပူးပေါင်းအဖွဲ့အား သေနတ်ဖြင့်ပစ်ခတ်ထွက်ပြေးသူ လွတ်မြောက်နေဆဲ
*******
ရှမ်းပြည်နယ်(မြောက်ပိုင်း ) ကျောက်မဲမြို့ နမ့်ဟူးတောင်းကျေးရွာအုပ်စု ပန်ပေါင်းကျေးရွာတွင် စက်တင်ဘာလ(၇)ရက်နေ့ နေ့လယ်(၁၂)နာရီ ကျော်က ရဲတပ်ဖွဲ့နှင့် တပ်မတော်ပူးပေါင်းအဖွဲ့ဖြင့် ဝင်ရောက်ရှာဖွေစဉ် ပစ်ခတ်ထွက်ပြေးသွားသူမှာ မူးယစ်ဆေးဝါး သုံးစွဲ၊ရောင်းချရန် ရောက်ရှိနေသူဖြစ်ပြီး ယခုအချိန်ထိ လွတ်မြောက်နေဆဲဖြစ်ကြောင်း သိရသည်။

“အဲဒီမှာ အိမ်ရှင်ဖြစ်သူအမျိုးသားက သေနတ်နဲ့စတင်ပစ်ခတ်ပြီး နေအိမ်အနောက်ဖက်ကို ထွက်ပြေးတယ်။ စစ်တပ်အဖွဲ့က လိုက်လံဖမ်းဆီးပေမဲ့ အဲဒီအမျိုးသားက ပစ်ခတ်ထွက်ပြေးသွားတယ်”ဟု ကျောက်မဲမြို့ မြို့မရဲစခန်းမှ စခန်းမှူး ဒုတိယရဲမှူးဟန်ဝင်းလှိုင်က တာချီလိတ်သတင်းအေဂျင်စီသို့ ပြောသည်။

ကျောက်မဲမြို့ ပြည်ထောင်စုလမ်းမကြီးဘေးရှိ  နမ့်ဟူးတောင်း ကျေးရွာအုပ်စု၊ ပန်ပေါင်းကျေးရွာ  မအေးနော်၏ နေအိမ်တွင် လက်နက်ကိုင်ဆောင်၍ မူးယစ်ဆေးဝါးရောင်းချမှုများ ပြုလုပ်နေကြောင်း သတင်းအရ အမှတ်(၅၀၆)ခြေမြန်တပ်မှ အရာရှိစစ်သည်များ၊ ကျောက်မဲမြို့မရဲစခန်းမှ စခန်းမှူးနှင့် နယ်ထိန်းတပ်ဖွဲ့များ၊ အမှတ်(၄၄၆) သတင်းတပ်ဖွဲ့စုနှင့် နမ့်ဟူးတောင်းကျေးရွာအုပ်ချုပ်ရေးမှူးတို့ ပါဝင်သည့် ပူးပေါင်းအဖွဲ့ဖြင့်  ဝင်ရောက်ရှာဖွေရာ နေအိမ်တွင်းမှ အမျိုးသားတစ်ဦးက သေနတ်ဖြင့်ပစ်ခတ်၍ ခုခံထွက်ပြေးသွားခဲ့ခြင်းဖြစ်ကြောင်း သိရသည်။

အဆိုပါနေအိမ်တွင်ရှာဖွေရာ WY စိတ်ကြွရူးသွပ်ဆေးပြား (၁၇၇)ပြား၊ မူးယစ်ဆေးဝါးသုံးစွဲရာတွင် အသုံးပြုသည့် ဆက်စပ်ပစ္စည်းများ၊ လေသေနတ်တစ်လက်၊ မှန်ပြောင်းပါ တရုတ်နိုင်ငံလုပ် ဒူးလေး (၁)လက်၊ ဒူးလေး ကိုယ်ထည်တစ်ခု၊ ဒူးလေးတွင်ထည့်သွင်းပစ်ခတ်ရသည့် ခဲဖူးတပ်မြှား(၁၇)ချောင်း၊ MG-1 ပလပ်စတစ်လက်ပစ်ဗုံး(၁)လုံးနှင့် ဗုံးတွင်တပ်ဆင် အသုံးပြုရသည့် ဖြူး(၁)ချောင်း၊ 9-mm ပစ္စတိုကျည်(၅)တောင့်၊ ပလပ်စတစ်ကျည်အိမ်(၁)ခု၊ စကားပြောစက်(၁)လုံး၊ အရိုးအသွား (၂)ပေ(၅)လက်မခန့် ဓါး (၁)ချောင်း၊ အရိုးအသွား(၃)ပေ(၁)လက်မခန့်ရှိ ဓါး (၁)ချောင်း၊ အရိုး အသွား (၄)ပေ(၉)လက်မခန့်ရှိ လှံ(၁)ချောင်းတို့နှင့်အတူ YGN 1H/ 6896 နံပါတ်တပ်ဆင်ထားသည့် HONDA CRV အမျိုးအစား ခဲရောင်ကား(၁)စီး တို့ကို သိမ်းဆည်းရမိခဲ့ပြီး နေအိမ်ဝန်းကျင်တွင် စီစီတီဗီများ တပ်ဆင်ထားကြောင်း သိရသည်။

ထွက်ပြေးနေသည့် အသက်(၃၅)နှစ်အရွယ် ထွန်းဦးဆိုသူသည် ကျောက်မဲမြို့နယ် လွယ်ခေါ်ကျေးရွာမှဖြစ်ပြီး မူးယစ်ဆေးသုံးစွဲရန်နှင့် ရောငး်ဝယ်ရန်ရောက်ရှိနေသူဖြစ်ကြောင်း သိရသည်ဟု ရဲမှတ်တမ်းတွင် ဖေါ်ပြထားသည်။

ထွက်ပြေးတိမ်းရှောင်နေသည့် ထွန်းဦးနှင့် နေအိမ်ပိုင်ရှင် မအေးနော်တို့အား ကျောက်မဲမြို့မရဲစခန်းတွင် မယ(ပ) ၂၆/၂၀၁၇ အရ ပြစ်မှုဆိုင်ရာ ဥပဒေပုဒ်မ ၁၅/ ၁၉(က )/၂၂ (ခ)/၂၁ ဖြင့် အမှုဖွင့်ဆောင်ရွက်ထားကြောင်းသိရသည်။

သတင်း #နေဖြိုးမြင့်
ဓါတ်ပုံ #ကျောက်မဲမြို့မရဲစခန်း