ချောင်းရေတိုက်စားမှုကြောင့် မိုင်းဖြတ်မြို့နယ် နမ့်ကုန်းကျေးရွာအုပ်စုရှိ ကိုယ်ထူကိုယ်ထ ကွန်ကရစ် သစ်သားတံတား တစ်စင်း ပြိုကျပျက်စီး
http://www.tachileik.net/2017/09/MP.html
*******
တာချီလိတ်ခရိုင်၊ မိုင်းဖြတ်မြို့နယ် နမ့်ကုန်းကျေးရွာအုပ်စု အတွင်းရှိ ကိုယ်ထူကိုယ်ထ ကွန်ကရစ် သစ်သားတံတား တစ်စင်းသည် ချောင်းရေတိုက်စားမှုကြောင့် ၂၀၁၇ခုနှစ် စက်တင်ဘာလ(၂၆)ရက်နေ့ နေ့လယ်(၁၂)နာရီအချိန်က ပြိုကျပျက်စီးမှုဖြစ်ပွားခဲ့ကြောင်း သိရသည်။

မိုင်းဖြတ်မြို့နယ်၊ နမ့်ကုန်းကျေးရွာအုပ်စု၊ ပါဆန်း - ခတ်တန်ကျေးရွာရှိ ကျေးရွာချင်းဆက် ကိုယ်ထူကိုယ်ထ အရှည်ပေ (၁၀၀)ဝန်းကျင်ရှိ ကွန်ကရစ်သစ်သား တံတားတစ်စင်းသည် မိုးသည်းထန်စွာ ရွာသွန်းမှုကြောင့် ချောင်းရေ တိုက်စားခဲ့ရာမှ ခက်တန်ကျေးရွာဘက်ခြမ်းတွင် လမ်းအရှည်(၃၀)ပေဝန်းကျင်၊ အကျယ်(၁၂)ပေဝန်းကျင် နှင့် အမြင့်(၆)ပေဝန်းကျင် ပြိုကျပျက်စီးခဲ့ရာ ပျက်စီးမှုတန်ဖိုးမှာ ခန့်မှန်းကျပ်သိန်း(၂၀)ခန့် ရှိကြောင်း သိရသည်။

ပျက်စီးသွားသည့် ချဉ်းကပ်လမ်းနေရာသို့ ပြင်ဆင်ဆောင်ရွက်မှုများ ပြုလုပ်နိုင်ရန် ပြည်နယ်လွှတ်တော်ကိုယ်စားလှယ် ဦးအားကို နှင့် ဦးစိုင်းကျောက် အပါအဝင် မိုင်းဖြတ်မြို့နယ် အုပ်ချုပ်ရေးမှူး ဦးစိုးလှိုင် နှင့် တာဝန်ရှိသူများက သွားရောက် ကြည့်ရှုပြီးနောက် ကျေးရွာနေ ရွာမိ၊ ရွာဖများနှင့် ဆွေးနွေးမှုများပြုလုပ်ရာတွင် ချောင်းရေကျချိန်၌ ရွာသူ၊ ရွာသားများ၏ စုပေါင်းအင်အားဖြင့် ကိုယ်ထူကိုယ်ထ ပြင်ဆင်ဆောင်ရွက်သွားမည်ဖြစ်ကြောင်း သိရသည်။

သတင်း - #စိုင်းဇေယျာ
ဓာတ်ပုံ - မိုင်းဖြတ် ထွေ/အုပ်