~~~~~~~~⊰❂ unicode ❂⊱~~~~~~~~

တာချီလိတ်မြို့နယ်၊ ဖန်မင်ကျေးရွာအုပ်စု၊ မယ်ဟုတ်ချောင်းအတွင်း သြဂုတ်လ(၁၃)ရက်နေ့ နံနက်က အသက်(၇၁)နှစ်အရွယ် အဘိုးအို တစ်ဦး အမှိုက်ပစ်ရာမှ အရှိန်လွန်ကာ ရေထဲကျသွားရာ ရေနစ် သေဆုံးသည့် ရုပ်အလောင်းအား နှစ်ရက်အကြာတွင် ရှာဖွေတွေ့ရှိကြောင်း တာချီလိတ်နာရေး ကူညီမှုအသင်းထံက သိရသည်။

သြဂုတ်လ(၁၃)ရက်နေ့ နံနက်(၉)နာရီဝန်းကျင်အချိန်က တာချီလိတ်မြို့နယ်၊ ဖန်မင်ကျေးရွာအုပ်စု၊ ဟိုခိုရွာနေ အသက်(၇၁)နှစ်ရှိ ဦးအိုက်ရွက်သည် မယ်ဟုတ်ချောင်းအတွင်း အမှိုက်ပစ်ရာမှ အရှိန်လွန်ကာ ရေထဲကျသွားကြောင်း ကျေးရွာနေ တာဝန်ရှိသူများက ဟောင်လိတ်ရဲစခန်း နှင့် တာချီလိတ်မြို့မရဲစခန်းသို့ အကြောင်းကြားပြီးနောက် တာချီလိတ်နာရေးကူညီမှုအသင်းမှ ရှာဖွေရာ မတွေ့ရှိရဘဲ ဆက်လက် ရှာဖွေရာမှ သြဂုတ်လ(၁၅)ရက်နေ့ နံနက်ပိုင်းက အလောင်းအား ဝမ်းလုံးကျေးရွာဘက်အခြမ်း ချောင်းဘေးတွင် တင်ကျန်နေသည်ကို တွေ့ရှိရကြောင်း သိရသည်။

နှစ်ရက်အကြာတွင် တွေ့ရှိရသည့် အဆိုပါ အလောင်းအား ကနဦး တွေ့ရှိရသူမှာ သေဆုံးသူ၏သားဖြစ်သူ အိုက်ခေါင်ဖြစ်ပြီး၎င်းသည် သက်ဆိုင်ရာသို့ ဆက်သွယ်အကြောင်းရာမှ တဆင့် တာချီလိတ်မြို့မရဲစခန်းမှ ခေတ္တစခန်းမှူး ဒုရဲမှူးကြည့်စိုး နှင့် သက်ဆိုင်ရာ ရဲတပ်ဖွဲ့ဝင်များ၊ တာချီလိတ်နာရေးကူညီမှုအသင်း ဥက္ကဌ ဦးလှမိုး နှင့် အသင်းသားများရောက်ရှိလာပြီး ကျေးရွာတွင်း တာဝန်ရှိသူများနှင့် ဆယ်ယူမှုများ ပြုလုပ်ကာ တာချီလိတ်ခရိုင်ပြည်သူ့ဆေးရုံရှိ ရင်ခွဲရုံသို့ ပို့ဆောင်လိုက်ကြောင်း သိရသည်။

"အလောင်းကို ခဲရာခဲဆစ် ဟိုဖက်ကနေ ဒီဖက်ရောက်အောင် သယ်ဆောင်ပြီး ဆေးရုံက စစ်ဆေးနိုင်ရန်အတွက် တာချီလိတ်ပြည်သူ့ဆေးရုံက ရင်ခွဲရုံကို ပို့ဆောင်ကူညီပေးခဲ့ပါတယ်။ အခုတော့ ရွာမှာ သွားပြီး သင်္ဂြိုလ်ဖို့အတွက် ရင်ခွဲရုံကနေ ပြန်သယ်သွားဖို့ ဆရာဝန်ရဲ့ စစ်ဆေးပေးမှာကို စောင့်နေပါတယ်။"ဟု တာချီလိတ်နာရေးကူညီမှုအသင်း ဥက္ကဌ ဦးလှမိုးက တာချီလိတ်သတင်းအေဂျင်စီသို့ ပြောသည်။

ဓာတ်ပုံ - တာချီလိတ်နာရေးကူညီမှုအသင်း