~~~~~~~~⊰❂ unicode ❂⊱~~~~~~~~

မကွေးတိုင်း ဒေသကြီး၊ မကွေးမြို့၊ ကားကြီးကွင်းနှင့် မင်းလှမြို့တို့တွင် စိတ်ကြွရူးသွပ်ဆေးပြား ရောင်းချ သူများအား သြဂုတ်လ (၁၃)ရက်နေ့က ဖော်ထုတ်ဖမ်းဆီးနိုင်ခဲ့ကြောင်း မူးယစ်တပ်ဖွဲ့စု(၁၅)မကွေးမှ သိရသည်။

“သြဂုတ် (၁၃) ရက် ညနေ သုံးနာရီအချိန်လောက်မှာ ကားကြီးကွင်းထဲမှာရှိတဲ့ စားသောက်ဆိုင်တစ်ဆိုင်မှာ ပူးပေါင်းအဖွဲ့ဟာ သတင်းအရ စောင့်ဆိုင်းပြီး ဘိုဘိုလတ် ဆိုသူကို စိတ်ကြွရူးသွပ်ဆေးပြား (၃၇) ပြားနဲ့အတူ တွေ့ရှိဖမ်းဆီးနိုင်ခဲ့တာပါ”ဟု မူးယစ်တပ်ဖွဲ့စု(၁၅)မကွေးမှ ခေတ္တ မူးယစ်တပ်ဖွဲ့စုမှူး ဒုရဲမှူးလှဌေးက တာချီလိတ်သတင်းအေဂျင်စီသို့ ပြောသည်။

 မူးယစ်တပ်ဖွဲ့စု(၁၅)မကွေးနှင့် မကွေးနယ်မြေရဲစခန်းမှ တပ်ဖွဲ့ဝင်များ ပါဝင်သည့် ပူးပေါင်းအဖွဲ့သည် သြဂုတ်လ (၁၃)ရက်နေ့တွင် ဘိုဘိုလတ် အား ဖမ်းဆီးရမိပြီးနောက် ကွင်းဆက် တရားခံများအား ဆက်လက် ဖော်ထုတ်ဖမ်းဆီးရာ မင်းလှမြို့မှ ဇော်ကြီး၊ မင်းလှမြို့နယ် ရွာတော်ကျေးရွာ၊ မင်းဘူး-မင်းလှ ကားလမ်းမဘေးတွင် နေအိမ်ဈေးဆိုင်ဖွင့်ထားသည့် မသီတာအေး၊ မင်းလှမြို့ ရုံးရပ်မြောက်ပိုင်း (၃)လမ်းနေ သိန်းလွင်၊ မကွေးမြို့၊ ရန်မျိုးနိုင်ရပ်ကွက်(၈)လမ်းနေ တင်မောင်ဆန်းနှင့်၎င်း၏နေအိမ်တွင် ရောက်ရှိနေသည့် သန်းနိုင်ဦး၊ အောင်ဝင်း၊ တင်မောင်လှနှင့် ကျော်ကျော်ဖြိုးတို့အား ဖမ်းဆီးရမိကြောင်း သိရသည်။

ကားကြီးကွင်းတွင် ဖမ်းဆီးရမိသည့် ဘိုဘိုလတ်ထံမှ စိတ်ကြွရူးသွပ်ဆေးပြား (၃၇)ပြား၊ အဆိုပါ ဆေးပြားများ ရောင်းချလိုက်သည်ဟုဆိုသော မင်းလှမြို့မှ ဇော်ကြီး၏ နေအိမ်တွင် စိတ်ကြွဆေးပြား ရှာဖွေတွေ့ရခြင်း မရှိ၊ ရွာတော်ကျေးရွာမှ မသီတာအေး၏ဈေးဆိုင်မှ စိတ်ကြွဆေးပြား (၄၅)ပြား၊ ရုံးရပ်မြောက်ပိုင်းရပ်ကွက်၊ သိန်းလွင်ထံမှ စိတ်ကြွဆေးပြား (၅၀)ပြား၊ မကွေးမြို့ ရန်မျိုးနိုင်ရပ်ကွက်(၈)လမ်းနေ တင်မောင်ဆန်း ထံမှ စိတ်ကြွရူးသွပ်ဆေးပြား(၇၆၄)ပြား နှင့် မူးယစ်ဆေးအသုံးပြုသည့် ဆက်စပ်ပစ္စည်းများနှင့် နေအိမ်တွင်ရောက်ရှိနေသူ လေးဦးတို့အား ရှာဖွေတွေ့ရှိရခြင်းဖြစ်ကြောင်း သိရသည်။

ဖမ်းဆီးရမိမှုများနှင့် ပတ်သက်၍ ဘိုဘိုလတ် အား မကွေးမြို့ နယ်မြေရဲစခန်းတွင် မယ(ပ)၁/၂၀၁၇၊မူး/စိတ်ပုဒ်မ ၁၅/၁၉(က)/၂၀(က)အရ လည်းကောင်း၊ သီတာအေးနှင့် သိန်းလွင်တို့အား မင်းလှမြို့မရဲစခန်းတွင် မယ(ပ)၂/၂၀၁၇၊ မူး/စိတ်ပုဒ်မ ၁၅/၁၉(က)/၂၁ တို့အရလည်းကောင်း၊ သိန်းလွင်နှင့် တင်မောင်ဆန်းတို့အား မင်းလှမြို့မရဲစခန်းမှ မယ(ပ)၃/၂၀၁၇၊မူး/စိတ်ပုဒ်မ ၁၅/၁၉(က)/၂၁ တို့အရ လည်းကောင်း၊ တင်မောင်ဆန်း၊ သန်းနိုင်ဦး၊အောင်ဝင်း၊ တင်မောင်လှ၊ ကျော်ကျော်ဖြိုးတို့အား မကွေးမြို့ နယ်မြေရဲစခန်းမှ မယ(ပ)၂/၂၀၁၇၊ မူး/စိတ်ပုဒ်မ ၁၅/၁၉(က)/၂၀(က)/၂၁တို့အရ လည်းကောင်း အမှုဖွင့်အရေးယူ ဆောင်ရွက်ထားကြောင်း ရဲစခန်းမှတ်တမ်းအရ သိရသည်။

သတင်း - ဖီးနစ်