~~~~~~~~⊰❂ unicode ❂⊱~~~~~~~~

ရှမ်းပြည်နယ်(မြောက်ပိုင်း) ကျောက်မဲမြို့မှ ရွှေနှင့် လက်ဝတ်ရတနာပစ္စည်း အရောင်းဆိုင်များအား လုံခြုံရေးကင်မရာ တပ်ဆင်ရေးအပါအဝင် လုံခြုံရေးဆိုင်ရာအသိပညာပေး ဆွေးနွေးမှုအား ကျောက်မဲ မြို့မရဲတပ်ဖွဲ့က သြဂုတ်လ(၁၂) ရက်နေ့တွင် လုပ်ဆောင်ကြောင်း သိရသည်။

“အဓိက အချက်ကတော့ ရွှေဆိုင်တွေမှာ လုံခြုံရေး CCTV ကင်မရာတွေ တပ်ထားစေချင်ပါတယ်။ မိမိတို့ ရောင်းချနေတဲ့ ရွှေထည်ပစ္စည်းတွေကို ခိုးယူတာတွေ လုယက်တာတွေ မဖြစ်ပွားစေဖို့ ကြိုတင် ကာကွယ်တဲ့အနေနဲ့ လုပ်ဆောင်စေချင်တာဖြစ်သလို အကယ်၍ ဖြစ်ပွားခဲ့သည်ရှိသော် အမြန်ဆုံးဖော်ထုတ် အရေးယူနိုင်ဖို့အတွက် အခုလို ဆွေးနွေးရတာဖြစ်ပါတယ်” ဟု ကျောက်မဲမြို့မရဲစခန်းမှ စခန်းမှူး ဒုရဲမှူး ဟန်ဝင်းလှိုင်က ပြောသည်။

ကျောက်မဲမြို့မှ ရွှေဆိုင်တစ်ဆိုင်တွင် ရွှေထည်ပစ္စည်းများ ခိုးယူခံရမှု၌ အဆိုပါ ဆိုင်အတွင်း စီစီတီဗွီ(CCTV)မရှိသဖြင့် အနီးဝန်းကျင်ရှိ စီစီတီဗွီမှ မှတ်တမ်း အကူအညီဖြင့် ခိုးမှုအား ဖော်ထုတ် နိုင်ခဲ့ကြောင်း သိရသည်။

အဆိုပါ ပညာပေး ဆွေးနွေးပွဲသို့ ကျောက်မဲရှိ ရွှေဆိုင် (၁၇)ဆိုင်မှ လုပ်ငန်းရှင်များ တက်ရောက်ခဲ့ကြပြီး မှုခင်းအသိပညာပေးနှင့် ဥပဒေ၊ ပြစ်မှုပြစ်ဒဏ်များအကြောင်းကို ကျောက်မဲမြို့နယ်ရဲတပ်ဖွဲ့မှူး ရဲမှူးစန်းတင့် ဆွေးနွေး ရှင်းလင်းကြောင်း သိရသည်။

ကျောက်မဲမြို့မှ ရွှေဆိုင်တစ်ဆိုင်တွင် သြဂုတ်လ(၆)ရက်နေ့နှင့် (၁၀)ရက်နေ့များတွင် နှစ်ကြိမ်တိုင်တိုင် ရွှေထည် ပစ္စည်းများ ခိုးယူခံရခြင်းအား ရဲတပ်ဖွဲ့ထံတိုင်ကြားသည့်နေ့မှာပင် ခိုးယူမှုအား ဖော်ထုတ်နိုင်ခဲ့သည့် ကျောက်မဲမြို့မရဲစခန်းမှ စခန်းမှူးနှင့် နယ်ထိန်း တပ်ဖွဲ့ဝင်များအား ရွှေဆိုင်ပိုင်ရှင် မိသားစုက အဆိုပါ အခမ်းအနားတွင် ဂုဏ်ပြုငွေ ကျပ် (၃)သိန်း ပေးအပ်ခဲ့ကြောင်း သိရသည်။

“အမှုကိစ္စ တစ်စုံတစ်ခုဖြစ်ပွားတဲ့အခါ ကျွန်တော်တို့ကို အကြောင်းကြားပါ။ ကျောက်မဲမြို့အတွင်းမှာဆိုရင် (၅)မိနစ်ကနေ (၁၀)မိနစ်အတွင်း အရောက်လာခဲ့နိုင်အောင် ရဲတပ်ဖွဲ့က အဆင်သင့်ရှိနေပါတယ်”ဟု ကျောက်မဲမြို့မရဲစခန်းမှ နယ်ထိန်းခေါင်းဆောင် ဒုရဲအုပ် ကောင်းမြတ်ကျော်က တိုက်တွန်းပြောကြားသည်။

ရဲတပ်ဖွဲ့၏ အကူအညီလိုအပ်ပါက ကျောက်မဲမြို့မရဲစခန်းသို့ အချိန်မရွေးဆက်သွယ်အကြောင်းကြား၍ အကူအညီ ရယူကြရန်ကိုလည်း အဆိုပါ အခမ်းအနားတွင် တိုက်တွန်းပြောကြားလိုက်သည်။

သတင်း/ဓာတ်ပုံ - နဖြေိုးမြင့်