~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း)၊ တာချီလိတ်မြို့တွင် ယနေ့အထိ ရှင်းလင်းစွာ အကောင်အထည် မဖော်နိုင်သေးသည့် (ဈ)ကွက်သစ်နှင့် ပတ်သက်၍ မြေလွတ်၊ မြေလပ် နှင့် မြေရိုင်းများကို (၁၉၉၈)ခုနှစ်မှ (၂၀၂၈)ခုနှစ် အထိ နှစ်(၃၀) နှစ်ရှည်သီးပင်/ဥယျာဉ်ခြံမြေသီးနှံစိုက်ပျိုးမှုအတွက် လုပ်ပိုင်ခွင့်ရရှိထားသည့် ဒေါ်နန်းခမ်းတစ်၏ တာဝန်ခံမှ အဆိုပါ မြေယာနှင့် ပတ်သက်၍ ဇွန်လ(၁၄)ရက်နေ့က တာချီလိတ်မြို့ရှိ ဂိုလ်ဒင်းချယ်ရီ ဟိုတယ်တွင် သတင်းစာရှင်းလင်းပွဲ ပြုလုပ်သည်။

(၁၉၉၈)ခုနှစ်မှ (၂၀၂၈)ခုနှစ်အထိ နှစ်(၃၀) နှစ်ရှည်သီးပင်/ဥယျာဉ်ခြံမြေသီးနှံစိုက်ပျိုးမှုအတွက် လုပ်ပိုင်ခွင့် ရရှိထားသည့် ဒေါ်နန်းခမ်းတစ် ကိုယ်စား (၉၃.၁၉)ဧကအား ကာကွယ်စောင့်ရှောက်ခွင့် ရရှိထားသူ ခြံစောင့် တာဝန်ခံ ဦးယောရှုမှ အဆိုပါ သတင်းစာရှင်းလင်းပွဲအား ကျင်းပပြုလုပ်ခြင်းဖြစ်ရာ မြန်မာနိုင်ငံ သတင်းစာဆရာအသင်း(ရှမ်း/အရှေ့)၊ မြန်မာ့အလင်း၊ ကြေးမုံ၊ မြဝတီ၊ Tachileik News Agency၊ The Voice၊ DVB၊ ရွှတြေိဂံဒေသသတင်းလွှာ၊ အမြဲစိမ်း သဘာဝဝန်းကျင်ရေးရာ သတင်းဂျာနယ်၊ မြစ်မခ၊ ဒီမိုကရေစီတူဒေး စသည်တို့မှ သတင်းမီဒီယာသမားများ တက်ရောက်ခဲ့ကြသည်။

ရှင်းလင်းပွဲတွင် ခြံစောင့်တာဝန်ခံ ဦးယောရှုက"ကျွန်တော်တို့ ဒီမြေကို ၁၉၉၈ခုနှစ် ကနေ နှစ်(၃၀) လုပ်ကိုင်ခွင့်ရထားတယ်။ အစိုးရကိုလည်း မြေခွန်တရားဝင် ဆောင်ထားတာလည်း ရှိပါတယ်။ နှစ်(၃၀)စာအတွက် ဆောင်ထားပေးပါတယ်။ အခုက မြေလွတ်၊ မြေရိုင်းကို လန(၃၉)ချပေးလိုက်ကြတယ်၊ ကျွန်တော်တို့နားက မြေယာကို အစိုးရက ပြန်လည်ရုပ်သိမ်း လိုက်တယ်ဆိုတဲ့ တရားဝင်စာလည်း မကျလာဘဲ၊ အခုလို ဖြစ်နေတယ်၊"ဟု ရှင်းလင်းပြောကြားသည်။

အဆိုပါ ရှင်းလင်းပွဲတွင် ၂၀၁၅ခုနှစ် ဒီဇင်ဘာလ(၇)ရက်နေ့ ရက်စွဲဖြင့် ပြည်ထောင်စုသမ္မတမြန်မာနိုင်ငံ၊ ပြည်ထဲရေးဝန်ကြီးဌာနရုံး၏ စာတွင် ဖော်ပြထားသည့် စာပိုဒ်များထဲမှ"ဒေါ်နန်းခမ်းတစ်အား မြေလွတ်၊ မြေလပ်နှင့်မြေရိုင်း စီမံခန့်ခွဲရေးဗဟိုအဖွဲ့၏ ၁၉၉၈ခုနှစ် ဧပြီလ(၂၄)ရက်နေ့ ရက်စွဲပါ စာအမှတ် ၅၀၈/မယ(ဖ)၉၈ဖြင့် ခွင့်ပြုခဲ့ခြင်းမှာ မှန်ကန်မှုရှိကြောင်း၊ နောက်ဆက်တွဲ ပုံစံ(၅)ပါ မြေလွတ်၊ မြေလပ်နှင့် မြေရိုင်းများကို နှစ်ရှည်သီးပင်/ဥယျာဉ်ခြံစိုက်ပျိုးမှုအတွက် လုပ်ပိုင်ခွင့်ပြုသော အမိန့်စာမှာ မှန်ကန်မှုရှိကြောင်းနှင့် အဆိုပါ မြေလွတ်၊ မြေလပ်နှင့်မြေရိုင်းများအား ယခုအချိန်အထိ ပယ်ဖျက်ထားမှု မရှိသေးကြောင်း ပြန်ကြားလာပါသည်"ဆိုသည့် ဖော်ပြချက် အား ဦးယောရှုမှ ရှင်းလင်းသည်။

ထို့အတူ ၂၀၁၇ခုနှစ် ဖေဖော်ဝါရီလ(၁၃)ရက်နေ့က လယ်ယာမြေနှင့် အခြားမြေများသိမ်းဆည်းခြင်း ခံရမှုများပြန်လည်စိစစ်ရေးဗဟိုကော်မတီက " (၉၃.၁၉)ဧကအား အောက်ခြေရှိ အထွေထွေအုပ်ချုပ်ရေး ဝန်ထမ်းများနှင့် မြေစာရင်းဦးစီးဌာနမှ ဝန်ထမ်းများက ဥပဒေနှင့်မညီ အဂတိလိုက်စား၍ မြေကွက်များ ရောင်းချထားပါကြောင်း တင်ပြလာမှုနှင့် စပ်လျဉ်း၍ စိစစ်ပေါ်ပေါက်ချက်များအရ ဦးဇော်ဇော်ထွန်းဆိုသူမှ ဒေါ်နန်းခမ်းတစ်၏ မြေလွတ်မြေရိုင်း လုပ်ပိုင်ခွင့် နှစ်(၃၀) ရရှိထားသော မြေအား ဌာနဆိုင်ရာ ဝန်ထမ်းများနှင့် ပူးပေါင်း၍ ဥပဒေနှင့်မညီဘဲ လန/၃၉ ရယူပြီး မြေကွက်များရိုက်၍ ရောင်းစားထားကြောင်း စိစစ်တွေ့ရှိရသဖြင့် ဒေါ်နန်းခမ်းတစ်မှ လုပ်ပိုင်ခွင့်ရရှိသော မြေလွတ်မြေရိုင်း ဧရိယာ(၉၃.၁၉) ဧကအတွက် မြေပိုင်ရှင်၏ ဆုံးရှုံးနစ်နာမှုများအား ဥပဒေလုပ်ထုံးလုပ်နည်းနှင့်အညီ စိစစ် ဖြေရှင်းဆောင်ရွက်ပေးနိုင်ပါရန် အကြောင်းကြား အပ်ပါသည်"ဟု ရှမ်းပြည်နယ် လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေးကော်မတီသို့ အကြောင်းကြားထားသည့် စာအား ဖတ်ကြားရှင်းလင်းသည်။

"ကျွန်တော့်အနေနဲ့ ဒါတွေကို ပြန်လည်လုပ်ပိုင်ခွင့်ရရင် ပြန်လုပ်ချင်တယ်၊ ကျွန်တော်တို့ အနေနဲ့ ပြောမယ်ဆိုရင် အစိုးရက ဆုံးဖြတ်ပေးတာကို လက်ခံသွားပါမယ်"ဟု အဆိုပါ ဦးယောရှုက ပြောသည်။
သတင်းစာရှင်းလင်းပွဲပြီးသည့်နောက်တွင် တက်ရောက်လာသည့် မီဒီယာများက တာချီလိတ်မြို့နယ် အုပ်ချုပ်ရေးမှူး ဦးထွန်းဝင်းအောင် နှင့်အတူ အဆိုပါ မြေကွက်များပေါ်တွင်ဝယ်ယူ ထားရှိသူများ နှင့် တာချီလိတ်မြို့နယ် အုပ်ချုပ်ရေးဦးစီးဌာနရုံးရှိ အစည်းအေဝးခန်းမတွင် ဆက်လက် တွေ့ဆုံခဲ့ကြသည်။

"ဒီမြေယာရဲ့ မြေရာဇဝင်ကို ကျွန်တော့်အနေနဲ့ ရှင်းပြရမယ်ဆိုရင်တော့ (၉၃.၁၉)ဧကဟာ ယခင်က မြေလွတ်မြေရိုင်းမြဖြေစ်ပြီးတော့မှ ဒေါ်နန်းခမ်းတစ်က သရက်ပင်တွေ စိုက်ပျိုးမယ်ဆိုပြီးတော့ မြေလွတ်မြေရိုင်း ကော်မတီကို လျှောက်ထားချက်အရ ဗဟို မြေလွတ်မြေရိုင်းများ စီမံခန့်ခွဲရေး အဖွဲ့ကနပြေီး မြေလွတ်မြေရိုင်း ဖော်ထုတ်လုပ်ကိုင်ခွင့် နှစ်(၃၀)ခွင့်ပြုပေးခဲ့တဲ့ မြေယာတွေ ဖြစ်ခဲ့ပါတယ်၊ တစ်ချိန်တုန်းက ပေါ့နော်၊ ကျွန်တော်တို့ စစ်ဆေးတွေ့ရှိချက်အရတော့ ဒေါ်နန်းခမ်းတစ်က သရက်ပင်တွေ စိုက်ပျိုးခဲ့တယ်၊ ဒါပေမယ့် နောက်ပိုင်းမှာ စွန့်ပစ်ခဲ့တယ်၊ အဲ့ဒီမှာ ဦးစိန်မောင် နဲ့ ဦးဇော်ဇော်ထွန်း တို့ကနပြေီး တောင်ယာစပါးတွေနဲ့ သီးနှံစိုက်ပျိုးခဲ့တယ်၊ ပြီးတော့မှ အဲ့ဒီ နှစ်ယောက်ကနပြေီးတော့ အမည်ပေါက် လုပ်ကိုင်ခွင့်ရရှိဖို့အတွက် လျှောက်ထားခဲ့တယ်၊ ဒေါ်နန်းခမ်းတစ် မြေယာကို ပြန်လည်လုပ်ကို်င်ခွင့် ရုပ်သိမ်းပေးဖို့ဆိုပြီးတော့ ခရိုင်မြေစာရင်းဦးစီးဌာနကနပြေီး ပြည်နယ်မြေစာရင်း ဦးစီးဌာနကို အမှုတွဲတင်ပြထားတာကို တွေ့ရှိရတယ်၊ အခုချိန်ထိတော့ မြေလွတ် မြေရိုင်း ပြန်လည်ရုပ်သိမ်းတဲ့ တရားဝင်အမိန့်စာတော့ ကျွန်တော်တို့ဆီကို ပြန်လည်ပြီး ကျလာတာ မရှိသေးဘူး၊ ဒါပေမယ့် လုပ်ကိုင်ခွင့် ရုပ်သိမ်းပေးဖို့ကိုတော့ ပြည်နယ်ကို တင်ပြထားတာကို တွေ့ရှိရပါတယ်၊ "ဟု တာချီလိတ်မြို့နယ်အုပ်ချုပ်ရေးမှူး ဦးထွန်းဝင်းအောင်က ရှင်းလင်းပြောကြားသည်။

အဆိုပါ မြေယာကိစ္စနှင့် ပတ်သက်၍ မြေလွတ်မြေရိုင်း လုပ်ကိုင်သည့် ပြန်လည်ရုပ်သိမ်းသော တရားဝင်အမိန့်စာမှာ တာချီလိတ်ရှိ သက်ဆိုင်ရာဌာနများသို့ ရောက်ရှိလာခြင်း မရှိသေးသော်လည်း ရှမ်းပြည်နယ် အေးချမ်းသာယာရေးနှင့်ဖွံ့ဖြိုးရေးကောင်စီ အရှေ့ပိုင်း(ကျိုင်းတုံ)မှ ၂၀၁၀ခုနှစ် သြဂုတ်လ(၂၈)ရက်နေ့တွင် မြို့ကွက်သစ်ဖြစ်သည့် (ဈ)အား မြို့ကွက်သစ်အကောင်အထည်ဖော်ရန်အတွက် ခွင့်ပြုပေးခဲ့ကြောင်း၎င်းထံမှ သိရသည်။

"မြို့ကွက်သစ် အပိုင်း(ဈ)မှာ တစ်ဖက်ကလည်း နိုင်ငံဝန်ထမ်းတွေ ဌာနဆိုင်ရာတွေ ပုဂ္ဂလိကတွေကို ရှေ့ဦးမြေပေးမိန့် ထုတ်ပေးထားပြီး ဖြစ်ပါတယ်၊ တစ်ဖက်ကလည်း ဒီမြေဟာ ဒေါ်နန်းခမ်းတစ် မြေလွတ်မြေရိုင်း လုပ်ပိုင်ခွင့်ရတဲ့ မြေဆိုပြီးတော့မှ နှစ်ဖက်က ပြဿနာလေးတွေ ဖြစ်ခဲ့ကြပါတယ်၊ ဒါပေမယ့်အားလုံး သိတဲ့အတိုင်းပဲ ကျွန်တော်တို့ကတော့ တာဝန်အရှိဆုံးပေါ့၊ ဒီကိစ္စတွေကို အမြန်ဆုံးကို ဖြေရှင်းပေးချင်နေတာပါ၊ သို့သော်လည်း အဲ့လို ဖြေရှင်းတဲ့အခါမှာ ကျွန်တော်တို့က ဥပဒေနှင့်အညီ ဆောင်ရွက်နေတာဖြစ်တဲ့အတွက် ဥပဒေနဲ့ညီအောင် လေ့လာရတယ်၊ သုံးသပ်ရတယ်၊ ဖြစ်စဉ် အမှန်ကို သိရပြီးတော့မှ လက်ရှိကျင့်သုံးနေတဲ့ လယ်ယာဥပဒေ၊ တည်ဆဲဥပဒေနဲ့ ကိုက်ညီသလားဆိုတာတွေ
ဆောင်ရွက်ရပါတယ်"ဟု တာချီလိတ်မြို့နယ်အုပ်ချုပ်ရေးမှူး ဦးထွန်းဝင်းအောင်က ပြောသည်။

ဆက်လက်၍လည်း"အဲ့လို ဆောင်ရွက်တဲ့နေရာမှာလည်း ကျွန်တော်တို့တွေက ဥပဒေအကြံဉာဏ်တွေ တောင်းရပါတယ်။ ကျွန်တော်တို့ သက်ဆိုင်ရာတွေဖက်က လက်ရှိ လယ်ယာမြေတည်ဆဲဥပဒေတွေနဲ့အညီ ဆောင်ရွက်နေပါတယ်"ဟု၎င်းက ပြောကြားသည်။

အဆိုပါ မြေယာကိစ္စနှင့် ရောင်းဝယ်မှုများနှင့် ဆောက်လုပ်မှုများအပြင် ခြံခတ်မှုများ တစ်စုံတစ်ရာ ဆက်လက်ပြုလုပ်ခြင်း မရှိစေရန်အတွက် ရက်ပိုင်းအတွင်း တားမြစ်ဆိုင်းဘုတ်များ စိုက်ထူ၍ အသိပေးသွားမည်ဖြစ်ကြောင်း သိရသည်။

သတင်း - ကိုဇောင်း
ဓာတ်ပုံ - ဇောင်းညီ