ပြည်သူသတင်းပေးမှုကြောင့် ငွေကျပ်(၁၆၈)သိန်းခိုးယူသူအား အမှုဖွင့်ပြီး တစ်နာရီအတွင်း ဖမ်းဆီးရမိ
*************
မကွေးမြို့တွင် နေအိမ်ရှိသေတ္တာထဲထည့်ထားသော ငွေကျပ် (၁၆၈)သိန်းခိုးယူခံရမှုအား အမှုဖွင့်ပြီး တစ်နာရီအကြာတွင် ပြည်သူသတင်းပေးကူညီမှုကြောင့် ခိုးယူသူအား သက်သေခံငွေများနှင့်တကွ ဖော်ထုတ်ဖမ်းဆီးနိုင်လိုက်ကြောင်း မကွေးမြို့ နယ်မြေရဲစခန်းမှ သိရသည်။

“တာဝန်သိပြည်သူတစ်ဦးရဲ့ ဖုန်းနဲ့သတင်းပေးမှုကြောင့် ခုလိုအချိန်တိုအတွင်းမှာ ခိုးမှုကျူးလွန်တယ်လို့ သံသယရှိသူကို အချိန်မီဖော်ထုတ်ဖမ်းဆီးနိုင်ခဲ့တာပါ။ ငွေကိုအလုံးအရင်းနဲ့ ခိုးယူသွားတာဖြစ်လို့ အဲဒီဖုန်းသတင်းသာ မရရှိခဲ့ဘူးဆိုရင်  အမှုဖော်ထုတ်ဖို့က ကြန့်ကြာသွားနိုင်ပြီး ဖော်ထုတ်နိုင်ဖို့မှာလည်း အတော်ခက်ခဲသွားမှာပါ”ဟု မကွေးမြို့ နယ်မြေရဲစခန်းမှူး ရဲအုပ်ကျော်ထူးက တာချီလိတ်သတင်းအေဂျင်စီသို့ ပြောသည်။

မကွေးမြို့ ရန်ကင်းရပ်ကွက်(၃)လမ်း၊ အမှတ်(၈၅) နေ ကုန်သည် ဦးနေလင်းအောင်၏ နေအိမ်အခန်းတွင်းရှိ သံသေတ္တာထဲထည့်ထားသည့် ငွေကျပ် (၁၆၈)သိန်း ပျောက်ဆုံးနေကြောင်း ဇွန်လ(၃)နံနက်ပိုင်းက သိရှိရသဖြင့် နေအိမ်ရှိ မိသားစုနှင့် အလုပ်သမားများအား မေးမြန်းစုံစမ်းမှုများပြုလုပ်ခဲ့သော်လည်း ပေါ်ပေါက်ခြင်းမရှိ၍ မွန်းလွဲ (၂)နာရီခွဲအချိန်တွင် မကွေးမြို့နယ်မြေရဲစခန်းသို့ ဦးနေလင်းအောင်မှ တရားလိုပြုလုပ်တိုင်တန်း အမှုဖွင့်ခဲ့ခြင်း ဖြစ်ကြောင်း စခန်းမှူး၏ ပြောကြားချက်အရ သိရ သည်။

“အခင်းဖြစ်နေအိမ်ကို သွားရောက်စစ်ဆေးတဲ့အခါ အိမ်မှာ ခွေးကြီးနှစ်ကောင်ရှိပေမဲ့ ထူးထူးခြားခြား ဟောင်တာပြုတာမရှိဘူးလို့ သိရတယ်။ သေတ္တာကို ဓားနဲ့ကလန့်ဖွင့်တယ်။ အဲဒီဓားကို အိမ်နောက်ဖေးက ခွေးစာကျွေးတဲ့နေရာက တွေ့ရတယ်။ ဒီအချက်တွေကြောင့် အတွင်းလူဖြစ်နိုင်တယ်လို့ ယေဘုယျသုံးသပ်ပြီး နယ်ထိန်းအဖွဲ့နဲ့အတူ စုံစမ်းစစ်ဆေးမှုတွေလုပ်ခဲ့ပါတယ်”ဟု ၎င်းကပြောသည်။

ထိုသို့စုံစမ်းမှုများပြုလုပ်နေစဉ် အဝေးပြေးကားကွင်းအနီးမှ တည်းခိုခန်းတစ်ခုတွင် မသင်္ကာဖွယ်ရာ လူငယ်တစ်ဦးကို တွေ့ရှိရကြောင်းနှင့် ထိုသူမှာ အသုံးအဖြုန်းကြီးနေကြောင်း ပြည်သူတစ်ဦး၏ ဖုန်းသတင်းပေးပို့ချက်အရ သတင်းပေးနေရာသို့ မွန်းလွဲ (၃) နာရီခွဲအချိန်တွင် သွားရောက်စစ်ဆေးနိုင်ခဲ့သဖြင့် ခိုးယူသွားသော ငွေများနှင့်တကွ ချစ်နိုင်(ခ)ချစ်မင်းကိုအား ဖမ်းဆီးနိုင်ခဲ့ခြင်းဖြစ်ကြောင်း သိရသည်။

အသက် (၁၇)နှစ်အရွယ် ချစ်နိုင်မှာ ဦးနေလင်းအောင်၏ နေအိမ်၌ အလုပ်သမားအဖြစ် (၆) လခန့်အလုပ်လုပ်ခဲ့သူ ဖြစ်၍  ခွေးနှစ်ကောင်နှင့် ရင်းနှီးခဲ့သူဖြစ်ကြောင်း၊ ထိုအိမ်မှ အလုပ်ထွက်ခဲ့ကာ လမ်းဘေး၌ အီကြာကွေး၊ ပလာတာရောင်း၍ အသက်မွေးဝမ်းကြောင်းပြုပြီး နေအိမ်အခြေအနေကို စောင့်ကြည့်လေ့လာ၍ ဇွန်(၃)ရက် နံနက် (၂)နာရီ အချိန်ခန့်တွင် ဝင်ရောက်ခိုးယူခဲ့ခြင်းဖြစ်ကြောင်းနှင့် ရန်ကုန်သို့သွားရောက်ရန် ကားလက်မှတ်ဖြတ်ပြီးဖြစ်ကြောင်း ချစ်နိုင်၏ ထွက်ဆိုချက်အရ သိရသည်။

ချစ်နိုင်(ခ)ချစ်မင်းအား မကွေးမြို့ နယ်မြေရဲစခန်းတွင် (ပ)၃၇၅/၂၀၁၇၊ ရာဇသတ်ကြီးဥပဒေပုဒ်မ ၃၈၀ အရ အမှု ဖွင့် အရေးယူဆောင်ရွက်ထားကြောင်း ရဲစခန်းမှတ်တမ်းအရ သိရသည်။

သတင်း၊ ဓါတ်ပုံ #ဖီးနစ်