တာချီလိတ်ရှိ မြို့မီးလင်းရေးကော်မတီမှ မီတာခများ ကောက်ခံရရှိသော ပိုလျှံငွေများထဲက မြို့သာယာ ဖွံ့ဖြိုးရေး အတွက် ထိုင်းဘတ်ငွေ (၇)သိန်းခွဲ၊ (ကျပ် သိန်း ၂၂၅ သိန်းခန့်)တန်ဖိုးရှိ ဓာတ်မီးတိုင်ကြီးအား မြန်မာ - ထိုင်း ချစ်ကြည်ရေးတံတားအမှတ်(၁)အနီးရှိ အဝိုင်းပတ်ပေါ်တွင် စိုက်ထူလိုက်သည်။
အဆိုပါ Hight Mast အမျိုးအစား ဓာတ်မီးတိုင်ကို ဇူလိုင်လ (၂၅)ရက်နေ့က မြို့နယ်မီးလင်းရေး ကော်မတီမှ ကော်မတီဝင်များနှင့် ဌာနဆိုင်ရာ တာဝန်ရှိသူများ ၊ မြို့မိမြို့ဖများဖြင့် ချစ်ကြည်ရေးတံတား အမှတ်(၁)အနီးရှိ အဝိုင်းပတ်တွင် စိုက်ထူခဲ့ကြခြင်း ဖြစ်သည်။
"အဓိက ကတော့ မြို့မီးလင်းရေးကနေ ကောက်ခံရရှိတဲ့ မီးတာခ ပိုလျှံငွေထဲကနေပြီး မြို့နယ် ဖွံ့ဖြိုးသာယာ လှပရေး အတွက်ရယ်၊ မြို့ဖွံ့ဖြိုးတိုးတက်ရေး နဲ့ တစ်ဖက်နိုင်ငံနဲ့လည်း နီးစပ်နေတဲ့အတွက် သင့်တင့်လျောက်ပတ်တဲ့ ဖွံ့ဖြိုးမှုတွေ ဆောင်ရွက်ခြင်းဖြစ်ပါတယ်။ ဒီမီးတိုင်ကို တစ်ဖက်ထိုင်းနိုင်ငံက မှာယူတဲ့ အခါမှာလည်း အဲ့ဒီဘက်က အစိုးရတွေနဲ့ ညှိနှိုင်းပြီး ဝယ်ယူပြီး စိုက်ထူတာပါ။ ဆိုင်တိုင်းမှာလဲ မရောင်းဘူး။"ဟု တာချီလိတ်မြို့နယ်မီးလင်းရေးကော်မတီ ဥက္ကဌ၊ ခရိုင်အုပ်ချုပ်ရေးမှူး ဦးတင်ဝင်းရွှေက ပြောသည်။
ယင်း စိုက်ထူသည့် ဓာတ်မီးတိုင်သည် အမြင့် (၁၆)မီတာ ရှည်လျားကာ နီယွန်မီးသီး (၈)လုံးပါရှိမှာဖြစ်ပြီး၊ အဆိုပါ မီးတိုင်သည် တစ်လလျှင် မီတာခ ဘတ်(၃၀၀၀)ကျော်ခန့် ကုန်ကျမှာဖြစ်ကြောင်း သိရသည်။
"ဒီမီးတိုင်ကြီး စိုက်ထူလိုက်တဲ့ အတွက် ဒီအဝိုင်းပတ်ဘေးနားမှာထားရှိထားတဲ့ ဆိုလာ မီးတိုင်တွေကို လူများသွားလာတဲ့ လမ်းတွေ၊ ပွဲလမ်းသဘင်အမြဲကျင်းပတဲ့ နေရာတွေဖြစ်တဲ့ ဘုရားပေါ်တို့ ၊ ရှမ်းရိုးမကွင်း တို့မှာ ပြန်လည် စိုက်ထူသွားမှာပါ။"ဟု မြို့မိမြို့ဖ ဦးကြည်မြင့်က ပြောသည်။
အဆိုပါ Hight Mast အမျိုးအစား ဓာတ်မီးတိုင်သည် ဘတ်(၇)သိန်းခွဲ (ကျပ် ၂၂၅ သိန်းခန့်) ကုန်ကျပြီး၊ ယင်းကဲ့သို့ တာချီလိတ်မြို့အဝင် အနီးအနားတွင်လည်း စိုက်ထူရန်ရှိသည်ဟု တာချီလိတ်ခရိုင် အုပ်ချုပ်ရေးမှူး ထံမှ သိရသည်။
မြို့မီးလင်းရေးကော်မတီမှ ယခုလို တပ်ဆင်အသုံးပြုသည့် ကုန်ကျငွေသည် ဒေသခံပြည်သူများထံမှ ကောက်ခံရရှိသော မီတာခများထဲက ထုတ်နုတ်ကာ အသုံးပြုခြင်း ဖြစ်ကြောင်း သိရှိရသည်။
