တာချီလိတ်၊ မေလ(၃၀)ရက်
ရှမ်းပြည်နယ်(အရှေ့ပိုင်း)တာချီလိတ်မြို့တွင် မိုဘိုင်းလ်ဖုန်းအပိုပစ္စည်းများကို တစ်ဖက် ထိုင်းနိုင်ငံမယ်ဆိုင်မြို့မှ တင်သွင်းသည်ထက် ဈေးနှုန်းပိုသက်သာသည့် မန္တလေးမြို့မှ တင်သွင်းနေကြောင်း ဖုန်းအပိုပစ္စည်းရောင်းသူများထံမှ သိရသည်။
“မယ်ဆိုင်မှာကျတော့ တရုတ်က ပစ္စည်းတိုက်ရိုက်ရောက်တယ်။ ဒါပေမဲ့ မန္တလေးတို့နှင့်ယှဉ်ကြည့်ရင် ဈေးကအရမ်းကြီးတယ်။ တာချီလိတ်ကို တရုတ်က ပစ္စည်း တိုက်ရိုက်မရောက်တော့ မန္တလေးကနေပဲ တင်သွင်းတယ်။ ပြန်ရောင်းတဲ့အခါမှာလည်း သယ်ယူစရိတ်၊ လမ်းစရိတ်ရှိသေးတော့ ထက်ဝက်လောက် တင်ရောင်းကြတယ်။”ဟု Harna Mobile Service မှ ကိုဝေယံက ပြောသည်။
မန္တလေးမှ ဖုန်းအပိုပစ္စည်းများကို တစ်လတစ်ကြိမ်တင်သွင်းပြီး သယ်ယူပို့ဆောင်စရိတ်ကြောင့် တာချီလိတ်မြို့တွင် ပြန်လည်ရောင်းချသည့်အခါ ဈေးနှုန်းထက်ဝက်ကျော် မြင့်ကြောင်း သိရသည်။
“ဟိုဘက်ကမ်းမှာလည်း ပစ္စည်းကစုံပါတယ်။ ဒါပေမဲ့ အဲဒီဘက်မှာက ဈေးက မသက်သာဘူး။ တချို့ဟာတွေဆို တာချီလိတ်မြို့ထက်တောင် ဈေးပိုကြီးနေတယ်။ ဒါကြောင့် မန္တလေးကပဲ တင်သွင်းတာများတယ်။ အရင်တုန်းကတော့ Mobile Team တွေရှိတော့ သိပ်အဆင်မပြင်ဘူး။ အခုနောက်ပိုင်းမှာမှ တင်သွင်းရတာလွယ်ကူပြီး ဈေးကွက်ထဲ တော်တော်ရောက်လာတာ။”ဟု ဒေသခံ ဖုန်းအပိုပစ္စည်း ရောင်းသူ ကိုစည်သူက ပြောသည်။
တာချီလိတ်မြို့သို့ ဖုန်းကာဗာများ ၊ နားကြပ်များ ၊ ဖုန်းမှန်များစသည့် အခြားဖုန်းအပိုပစ္စည်းများကို မန္တလေးမြို့မှ အများစုတင်သွင်းလျှက်ရှိပြီး မိုင်းလားမြို့ နှင့် ကျိုင်းတုံမြို့မှလည်း တင်သွင်းလျှက်ရှိကြောင်း သိရသည်။
တာချီလိတ်မြို့တွင် ၂၀၁၄ ခုနှစ် မိုဘိုင်းလ်တီးမ် ရှိစဉ်ကာလက ဖုန်းအပိုပစ္စည်းရောင်းသူများသည် ကျယ်ကျယ်ပြန့်ပြန့်မရှိဘဲ Mobile Teamဖျက်သိမ်းပြီးနောက်ပိုင်း ပြည်တွင်းမှ ပစ္စည်းများ တာချီလိတ်မြို့သို့ သယ်ယူပို့ဆောင်မှု အဆင်ပြေလာ၍ ဖုန်းအပိုပစ္စည်းအရောင်းဆိုင်များ ၂၀၁၆ ခုနှစ်ပိုင်းအတွင်း ပိုမိုများလာကြောင်း သိရသည်။
သတင်း။ ။ ဇောင်းညီ
.......................
