တာချီလိတ်မြို့တွင် ရွေးကောက်ပွဲ အနိုင်ရပါတီဖြစ်သည့် အမျိုးသားဒီမိုကရေစီအဖွဲ့ချုပ်ပါတီမှ ပြည်သူများနှင့် ပူးပေါင်းကာ အမှိုက်ကောက်ခြင်းကို ဒီဇင်ဘာလ (၁၃)ရက်နေ့မှ စ၍ အပတ်စဉ် တနင်္ဂနွေ နေ့တိုင်း ပြုလုပ်ရန်အတွက် ယနေ့ ဒီဇင်ဘာလ(၁၂)ရက်နေ့ နံနက်ပိုင်းက တာချီလိတ်မြို့နယ် NLD ရုံးတွင် အစည်းအဝေးပြုလုပ်ကြသည်။
"စုရပ်အနေနဲ့ အမျိုးသားဒီမိုကရေစီအဖွဲ့ချုပ်ရုံးမှာ မနက်(၆)နာရီခွဲစုပြီး ၊ မြန်မာ - ထိုင်း ချစ်ကြည်ရေး အမှတ် (၁) တံတား နှင့် ၀မ်ကောင်းဈေး ၀န်းကျင်ရှိ နမ့်ယွန်းချောင်းတို့မှာ မနက် (၇) နာရီကနေ (၁၀)နာရီအထိ ပြုလုပ်သွားမှာပါ.."ဟု တာချီလိတ် NLD မှ ဒေါ်ခင်သန်းမူက ပြောသည်။
"အဓိက က ပြည်သူတစ်ရပ်လုံး ပါဝင်စေချင်တာပါ၊ ဘယ်ပါတီစွဲ ၊ဘယ်ပုဂ္ဂိုလ်စွဲမှ မဟုတ်ဘဲ အားလုံးပါဝင်မှ တိုင်းပြည်တစ်ခုလုံး ပြောင်းလဲမှာပါ၊ ဒါကြောင့် ပထမဦးဆုံး ခြေလှမ်းဖြစ်တဲ့ အမှိုက်ကောက်ခြင်းမှာ ပြည်သူအားလုံး ပါဝင်ရန် တိုက်တွန်းလိုပါတယ်၊ ဖြစ်နိုင်ရင် မိမိတို့အိမ်က ပေါက်ပြား/ပေါက်တူး စတဲ့ သန့်ရှင်းရေး အထောက်အကူပြု ပစ္စည်းများယူလာပြီး လာရောက် ပါဝင်စေချင်ပါတယ်"ဟု NLDမှ ပြည်သူ့လွှတ်တော်ကိုယ်စားလှယ် ဦးဌေးဝင်းက ပြောသည်။
"နမ့်ယွန်းချောင်းက မြို့လယ်ခေါင်က ချောင်းဖြစ်ပြီး ၊ အခုထိ အမှိုက်တွေ စွန့်ပစ်နေတုန်း ၊ တချို့အိမ်ဆို အိမ်သာကျင်းမတူးဘဲ၊ အိမ်သာပိုက်ကို ချောင်းဘက်လှည့်ထားကြတာတွေ တွေ့ရတယ်၊ အဲဒါတွေကိုလည်း တာဝန်ရှိသူတွေအနေနဲ့ သတိပေးသင့်ပါတယ် " ဟု ၀မ်ကောင်းမြို့မဈေးမှ ကိုခင်မောင်ဦးက ပြောသည်။
ပြည်သူတစ်ရပ်လုံးပါဝင်နိုင်သည့် အမှိုက်ကောက်ခြင်းကို အမျိုးသားဒီမိုကရေစီအဖွဲ့က ဦးဆောင်၍ အပတ်စဉ် တနင်္ဂနွေနေ့တိုင်း ပြုလုပ်သွားမည်ဖြစ်ကြောင်း သိရသည်။
သတင်း/ဓါတ်ပုံ။ ။ ဇောင်းညီ
