ရှမ်းပြည်နယ်အရှေ့ပိုင်းဒေသ၊ ထိုင်း - မြန်မာ နယ်စပ်မြို့ဖြစ်သည့် တာချီလိတ်မြို့၌ ဆိုင်ကယ် အရောင်းအ၀ယ် လုပ်ငန်းများမှာ ကျပ်တည်းမှုနှင့် ရင်ဆိုင်နေရကြောင်း ဆိုင်ကယ် ၀ယ်/ရောင်းသူများ၏ ပြောကြားချက်အရ သိရသည်။
တာချီလိတ်မြို့သည် မော်တော်ဆိုင်ကယ်များအား ထိုင်းနိုင်ငံမှ ၀ယ်ယူ၍ ရှမ်းပြည်နယ်နှင့် မြန်မာနိုင်ငံ အတွင်းသို့ တဆင့် တင်သွင်းသော အဓိက နယ်စပ်မြို့ဖြစ်ပြီး နှစ်ပေါင်းများစွာ ဆိုင်ကယ်ဝယ်ရောင်း လုပ်ငန်းအား လုပ်ကိုင်လာသော သူများသည် ယခုနှစ်ပိုင်းတွင် ဆိုင်ကယ်ဝယ်လိုအားများ ကျဆင်းလာမှုကြောင့် ရောင်းဝယ်ပါးနေကြောင်း သိရသည်။
“အခု ပြည်မထဲက ထိုင်းနိုင်ငံထုတ် ဆိုင်ကယ်တွေကို မြ၀တီ - မဲဆောက်ဘက်ကနေ တင်သွင်းတာ များတယ်၊ အဲ့ဒီဘက်က ဈေးသက်သာတယ်လို့ ကြားတာဘဲ၊ ဒါကြောင့် ဒီမှာ အရောင်းအ၀ယ် အေးနေတာ တစ်ပတ်လုံးမှ တစ်စီး၊ နှစ်စီးလောက် ရောင်းရတော့တယ်”ဟု ဆိုင်ကယ် ၀ယ်ရောင်းလုပ်သူ တစ်ဦးက ပြောသည်။
ထိုင်းနိုင်ငံမှ တင်သွင်းရာ မော်တော်ဆိုင်ကယ်များအား ထိုင်းနိုင်ငံတွင် အခွန်ငွေအပြည့်အ၀ ပေးဆောင်ပြီးမှ သယ်ဆောင်ရကြောင်း၊ ယခု နှစ်ဆန်းပိုင်းတွင် ထိုင်းနိုင်ငံ မယ်ဆိုင်မြို့မှ တင်သွင်းခွင့်အား ပိတ်ပင်ထားခြင်းကြောင့် ဆိုင်ကယ်အ၀င်နည်းသွားကြောင်း ဆိုင်ကယ်အရောင်း/အ၀ယ် အသိုင်းအ၀ိုင်းမှ သိရသည်။
၂၀၁၅ ခုနှစ် ထိုင်းနိုင်ငံထုတ် Wave (110) တစ်စီးလျှင် ဘတ်(၄၆၀၀၀)ဖြစ်ပြီး ဈေးကွက်အတွင်း အနည်းငယ် အရောင်းအ၀ယ်ဖြစ်သော ဆိုင်ကယ်များမှာ မော်ဒယ်နိုမ်သော ဆိုင်ကယ်အဟောင်းများသာ များပြီး ပုံမှန်မှာ အိမ်စီးရန် ၀ယ်ယူခြင်းဖြစ်ကြောင်း သိရသည်။
တာချီလိတ်မှ မော်တော်ဆိုင်ကယ်များအား တောင်ပေါ်ဒေသများမှ တိုင်းရင်းသားများလည်း ၀ယ်ယူမှုရှိကြောင်း တောင်ပေါ်တွင် တောင်ယာ၊ လယ်ကွင်းနှင့် ကျေးရွာများသို့ ဆက်သွယ်သွားလာရန် အတွက် လာဝယ်ခြင်းဖြစ်ကြောင်းနှင့် ယခုအချိန်ကာလသည် သီးနှံထွက်သည့် ကာလမဟုတ်သည့် အတွက် တောင်ပေါ်တိုင်းရင်းသားများ လာရောက်ဝယ်ယူမှု မရှိကြောင်းနှင့် တိုင်းရင်းသား ရာသီ ပွဲတော် ကုန်ဆုံးချိန်ဖြစ်သည့် အတွက် မြို့သို့ လာရောက်ခြင်း နည်းပါးသွားခြင်းကြောင့် မော်တော်ဆိုင်ကယ် ၀ယ်လိုအားများ ကျဆင်းသွားခြင်းဖြစ်ကြောင်း သိရသည်။
“လိုင်စင်ချပေးတဲ့ အချိန်ဆို အရောင်းအ၀ယ်ကောင်းတယ်၊ အခုတော့ လိုင်စင်လဲမချပေးတော့ တော်တော်ပါးသွားတာ တစ်ရက်(၃)စီးလောက် ရောင်းထွက်တဲ့သူ အခုတစ်ပတ်လုံးမှ (၁)စီးတောင် မထွက်တော့ဘူး၊ လိုင်စင်ချဖို့ အသံတော့မကြားဖူး”ဟု ဆိုင်ကယ်ဝယ်ရောင်းတစ်ဦးမှပြောသည်။
မြန်မာနိုင်ငံအတွင်း နေပြည်တော် အပါအ၀င် တိုင်းဒေသကြီး နှင့် ပြည်နယ်အသီးသီးတို့တွင် လိုင်စင်မဲ့ မော်တော်ဆိုင်ကယ်များအား One Stop Service စနစ်ဖြင့် ၂၀၁၄ ခုနှစ်တွင် ယာဉ်မှတ်ပုံတင်များ ပြုလုပ်ခဲ့ပြီး စီမံချက်ကာလကျော်လွန်သွားပြီးနောက် ဆက်လက်ရှိနေဆဲဖြစ်သော လိုင်စင်မဲ့ မော်တော် ဆိုင်ကယ်များအား ဒေသပေါက်ဈေး၏ ၅၀%ကို ဒဏ်ငွေအဖြစ် သတ်မှတ်၍ သက်ဆိုင်ရာ တိုင်းဒေသကြီး နှင့် ပြည်နယ်များအတွင်းသာ မောင်းနှင်နိုင်မည့် မော်တော်ဆိုင်ကယ် မှတ်ပုံတင်ပေးမှုကို မြန်မာတစ်နိုင်ငံလုံး အတိုင်းအတာအရ ကန့်သတ်ရက်မရှိ ဆောင်ရွက်ပေးရန် ကိစ္စကို သက်ဆိုင်ရာမှ ညွှန်ကြားထားကြောင်းကို ကြားသိရသော်လည်း အဆိုပါ ညွှန်ကြားချက်ကို မည်သည့် တိုင်းဒေသနှင့်ပြည်နယ်များတွင်မှ ကျင့်သုံး ဆောင်ရွက်ခြင်း မရှိသေးကြောင်း သိရှိရသည်။
