ရှမ်းပြည်နယ်၊ တာချီလိတ်မြို့တွင် ဗိုလ်ချုပ်အောင်ဆန်းရာပြည့်ပွဲတော် ဖြစ်မြောက်ရေးကော်မတီမှ ရာပြည့်ပွဲတော် စည်ကားသိုက်မြိုက်စွာ ကျင်းပနိုင်ရန် လိုအပ်သော ရန်ပုံငွေများ အတွက် ရပ်ကွက်များ အတွင်း အလှူငွေ လိုက်လံကောက်ခံလျက်ရှိရာ အလှူငွေများပြားစွာရရှိကြောင်း သိရှိရသည်။
“တက်နိုင်သလောက်ထည့်ကြပါတယ် တစ်ချို့ဆို လှမ်းခေါ်ပြီးမှကိုထည့်တာ၊ အများဆုံး ဘတ်(၁၀၀၀)ကနေ အနည်းဆုံး ဘတ်(၁၀)ထိထည့် ကြတယ်၊ ၀န်ထမ်းတွေ၊ ဈေးသူဈေးသားတွေ၊ ဆိုင်ကယ် ကယ်ရီသမားတွေနဲ့ တွေ့တဲ့သူ အကုန်ထည့်တာ၊ တစ်သက်မှာ တစ်ခါဘဲ ကျင်းပခွင့်ရတဲ့ ပွဲတော်ကို စည်စည်ကားကား ဖြစ်စေချင်လို့ထည့် ၀င်ကြတာပါ”ဟု ရန်ပုံငွေလိုက်၍ အလှူခံ နေသူ ကိုနေမျိုးမှ ပြောသည်။
တာချီလိတ်မြို့တွင် ဗိုလ်ချုပ်ရာပြည့်ပွဲတော် ကျင်းပနိုင်ရန် ရန်ပုံငွေ ဘတ်(၇)သိန်းခန့် ကုန်ကျမည်ဖြစ်ရာ ရန်ပုံငွေများ လိုအပ်နေမှုကြောင့် လှုံ့ဆော်ရေးကားဖြင့် မဇ္ဈိမလူမှုကူညီရေးအသင်းမှ လူငယ်များနှင့် ရွှေမဟာကိုယ်ပိုင်အထက်တန်းကျောင်းမှ ဆရာ၊ ဆရာမများ ပါဝင်၍ ရန်ပုံငွေ လိုက်လံ ကောက်ခံပေးလျှက်ရှိကြောင်း သိရသည်။
“လှုံ့ဆော်ရေးကားမှာ ဗိုလ်ချုပ်ပုံကို ကပ်ထားတော့ ထူးထူးဆန်းဆန်း ထိုင်းနိုင်ငံသားတစ်ယောက်က ဗိုလ်ချုပ် အမှတ်တရ အင်္ကျီဝယ်ပြီး ဓါတ်ပုံတွေရိုက်နေတာ နောက်ပြီး ရပ်ကွက်ထဲက တစ်ချို့တွေဆိုရင် မတ်တပ်ရပ်ပြီး အလေးပြုကြတယ်၊ ရန်ပုံငွေ အတွက်ရောင်းတဲ့ အင်္ကျီတွေလဲ ရောင်းမလောက်အောင် ၀ယ်ကြတယ်” ဟု မဇ္ဈိမလူမှုကူညီရေးအသင်းမှ အသင်းသား တစ်ဦးမှပြောသည်။
“ကျွန်တော်တို့ကို ဗယ်လင်တိုင်း လက်ဖက်ရည်ဆိုင်က ပွဲတော်အတွင်း ရန်ပုံငွေလိုက်ခံချိန်တိုင်း နေ့လယ်စာအဖြင့် ထမင်းအလကားကျွေးတာ၊ နောက်နေ့စားချင်တဲ့ဟာကို တစ်နာရီလောက်ကြိုမှာ ပေးပါတဲ့ ဗိုလ်ချုပ်အောင်ဆန်း ရာပြည့်ပွဲရန်ပုံငွေ အလှူခံတဲ့သူတွေကို ဒါနပြုတာပါတဲ့”ဟု ရန်ပုံငွေလိုက်၍ အလှူခံနေသူ ကိုနေမျိုးမှပြောသည်။
ဗိုလ်ချုပ်အောင်ဆန်းရာပြည့်ပွဲတော်ဖြစ်မြောက်ရေး ရန်ပုံငွေ လိုအပ်ချက်ကြောင့် လှည့်လည် အလှူခံမှုအပေါ်တွင် နေ့လယ်စာအဖြင့် ဗယ်လင်တိုင်း ကဖေးနှင့် အအေးဆိုင်မှ ကျွေးမွေးခဲ့ပြီး အအေးများလည်း မြို့သူမြို့သားများမှ တိုက်ကျွေးခဲ့ကြကြောင်း သိရသည်။
ရှမ်းပြည်နယ် အရှေ့ပိုင်းတွင် ဗိုလ်ချုပ်အောင်ဆန်းရာပြည့် ပွဲတော်အား တာချီလိတ်မြို့တွင်သာ ကျင်းပနိုင်မည်ဖြစ်ပြီး ပွဲတော်ဖြစ်မြောက်ရေးတွင် နိုင်ငံရေးပါတီများ၊ လူမှုရေးအသင်းအဖွဲ့များနှင့် မြို့မိမြို့ဖများ ပါဝင်ကြောင်း ရန်ပုံငွေကောက်ခံမှုတွင် ဖေဖော်ဝါရီ (၁)ရက်နေ့တွင် ဘတ်(၁၇၀၀၀)နှင့် ကျပ်(၂၈၀၀၀)ရရှိပြီး ဖေဖော်ဝါရီ(၂)ရက်နေ့တွင် ဘတ်(၂၂၀၀၀) နှင့် ကျပ် (၁၇၅၀၀)ရရှိကြောင်းနှင့် ရန်ပုံငွေလိုအပ်မှု ပေါ်မူတည်၍ ဆက်လက် အလှူခံမည်ဖြစ်ကြောင်း ရာပြည့်ပွဲတော်ဖြစ်မြောက်ရေး ကော်မတီမှ သိရှိရသည်။
“ကျွန်တော်တို့ ကားမှာပါတဲ့ ဗိုလ်ချုပ်ပုံကြီးတွေ့တာနဲ့ အသံကြားတာနဲ့ အလှူငွေလာ ထည့်ကြတာပါ ကျွန်တော့်လိုဘဲ သူများတွေလဲ လှူကြတာတွေ့တယ် တကယ်မထင်မှတ်လောက်အောင် လှူကြပါတယ်၊ဗိုလ်ချုပ်ကို ဘယ်လောက်ချစ်မြတ်နိုးတယ်ဆိုတာ မပြောပြတတ်အောင်ပါဘဲ”ဟု ရန်ပုံငွေထည့်ဝင်သူ တစ်ဦးမှပြောသည်။
ဖေဖော်ဝါရီ(၁)ရက်နေ့တွင် ပုန်းထွန်ရပ်ကွက်အတွင်း လှည့်လည်အလှူခံကြောင်းနှင့် ဖေဖော်ဝါရီ(၂)ရက်နေ့တွင် မကာဟိုခမ်းရပ်ကွက်နှင့် မြို့မ(ယာယီ)ဈေးအတွင်း လှည့်လည် အလှူခံခဲ့ပြီး လာမည့်နေ့များတွင် ရပ်ကွက်အလိုက် လှည့်လည်၍ အလှူခံမည်ဖြစ်ကြောင်း သိရှိရသည်။
ပုံများကိုကြည့်ရန်
