~~~~~~~~⊰❂ Unicode Version ❂⊱~~~~~~~~

“ကုန်အညွှန်းအမှတ်အသားမှာ ပါဝင်ရမယ့်အချက်တွေကို ၂၀၂၀ မတ်လ (၁၅) ရက်နေ့ နောက်ပိုင်းဆိုရင် အရေးယူရတော့မှာဖြစ်လို့ ဒီအကြောင်းကို အသိပညာပေးနေတာ။ အခုလက်ရှိတော့ ကုန်အညွှန်း အမှတ်အသား မပြည့်စုံတာတွေကို တွေ့နေရတုန်း။ အဓိက ကတော့ ဘယ်နိုင်ငံကပဲ ထုတ်ထုတ် ထားသိုပုံ၊ သုံးစွဲပုံအညွှန်း၊ ဘေးထွက်ဆိုးကျိုးတွေ ပါရမယ်။ ဘေးထွက်ဆိုးကျိုးဆိုတာ ဥပမာအားဖြင့် ဒါက ဆီးချိုသမား စားလို့မရဘူး စသဖြင့်ပေါ့။ လိုအပ်တဲ့ပစ္စည်းတိုင်းမှာ ပါရမယ်။ သုံးစွဲပုံအညွှန်းတွေကို မြန်မာလိုပါရတော့မယ်။ နိုင်ငံခြားက သွင်းလာတာတွေ မြန်မာစာနဲ့ဖော်ပြရတော့မယ်။ အနည်းဆုံး ဟောပြောပွဲလုပ်ရင်း ကလေးတွေက အစ ဒါတွေကို နားလည်အောင် ရှင်းပြတာဖြစ်တယ်။ ကျောင်းသားကျောင်းသူ ကလေးတွေကအစ ကုန်ပစ္စည်းတွေ ရွေးချယ်ဝယ်ယူတတ်စေဖို့ သေချာရှင်းလင်းနေတာဖြစ်ပါတယ်”ဟု လားရှိုးခရိုင် စားသုံးသူရေးရာဦးစီးဌာနမှူး ဦးသန်းစိုးက တာချီလိတ်သတင်းအေဂျင်စီသို့ ပြောသည်။

၂၀၂၀ မတ်လ (၁၅) ရက်နေ့မှစ၍ ဥပဒေသက်ဝင်မည့် စားသုံးသူအကာအကွယ်ပေးရေးဥပဒေအရ မည်သည့်ကုန်စည် အမျိုးအစားမဆို ပြည်ပမှတင်သွင်းသည်ဖြစ်စေ၊ ပြည်တွင်းထုတ်ဖြစ်စေ ကုန်ပစ္စည်းများ၏ ကုန်အမှတ်တံဆိပ်၊ ထုတ်လုပ်သူ၏လိပ်စာ၊ သက်ဆိုင်ရာဌာနအဖွဲ့အစည်း၏ ထောက်ခံစာ၊ ထုတ်လုပ်နှင့် သက်တမ်းကုန်ဆုံးရက်စွဲများ မဖြစ်မနေပါဝင်ရမည်ဖြစ်ကာ မြန်မာဘာသာဖြင့် ဖော်ပြထားရမည်ဖြစ်ကြောင်း သိရသည်။

အဆိုပါ ဟောပြောပွဲသို့ ကျောင်းသား၊ ကျောင်းသူများ၊ ကျောင်းကျန်းမာရေးအဖွဲ့များ၊ ကျောင်းမုန့်ဈေး ဆိုင်ရှင်များအား စားသုံးသူရေးရာဦးစီးဌာန လားရှိုးခရိုင်ဦးစီးမှူး ဦးသန်းစိုးနှင့် ဝန်ထမ်းများက စားသုံးသူ ကာကွယ်ရေးအသိပညာပေးခြင်းနှင့် ထုတ်ကုန်များလုံခြုံစိတ်ချရမှူရှိစေရေး ကွင်းဆင်းစစ်ဆေး အသိပညာပေးခြင်းများကို နံနက် (၁၀)နာရီခွဲမှ နေ့လယ် (၁၂)နာရီအထိ ဆောင်ရွက်ခဲ့ခြင်းဖြစ်သည်။

ပြစ်မှုပြစ်ဒဏ်များပါဝင်လာသည့် စားသုံးသူအကာအကွယ်ပေးရေးဥပဒေနှင့်ပတ်သက်၍ အသိပညာပေးခြင်းများကို စားသုံးသူရေးရာဦးစီးဌာနက ၂၀၁၉ ခုနှစ်၊ မတ်လ (၁၅) ရက်နေ့အထိ ဆောင်ရွက်သွားမည်ဖြစ်ကြောင်း သိရသည်။

Tachileik News Agency
ဓာတ်ပုံ - Than Soe