ရှမ်းပြည်နယ် (အရှေ့ပိုင်း) တာချီလိတ်မြို့နယ်တွင် ကလေးငယ် (၆၀)ကျော် ဝက်သက်ရောဂါ ဖြစ်ပွားခဲ့သည့်အတွက် ၂၀၁၉ ခုနှစ်၊ အောက်တိုဘာ (၂၅) ရက်နေ့မှ (၂၉) ရက်နေ့အထိ ပိုလီယိုဆေး တိုက်ကျွေးချိန်တွင် ဝက်သက်နှင့် ဂျိုက်သိုးကာကွယ်ဆေးကိုပါ ထိုးနှံပေးမည်ဟု သိရသည်။

တာချီလိတ်မြို့နယ်အတွင်း ပန်စလိကျေးရွာအနီးတွင် နမ့်ဆန်ဘက်မှ ပြောင်းလာသူများ နေထိုင်ရာနေရာတွင် ၂၀၁၉ ခုနှစ်၊ ဖေဖော်ဝါရီလအတွင်းက ကလေးငယ်ပေါင်း (၆၀)ခန့် ဝက်သက်ရောဂါဖြစ်ပွားခဲ့ခြင်းဖြစ်ကြောင်း သိရသည်။

"ပန်စလိနားလေးက ရွာပေါ့။ ပလောင်တွေ နေကြတာ။ နမ့်ဆန်ဘက်က ပြောင်းလာတာ။ အားလုံးပေါင်း (၆၀) လောက်ပေါ့။ သူတို့ဆေးရုံလာတက်တယ်။ အယောက် (၂၀) လောက်ပေါ့။ လာတက်တော့ သူတို့ရွာစုံစမ်းပြီး ကွင်းဆင်းကြည့်တာပေါ့။ လာတက်တဲ့ကလေးတွေတင်မကဘူး အခြားကလေးတွေပါ ဖျားနေကြတာ။ ရှိတဲ့ကလေးတွေ အကုန်နီးပါးလောက် ကူးနေတာ။ ကျန်းမာရေးဌာနကသွားပြီး မဖျားတဲ့ကလေးတွေရော အကုန်လုံးကာကွယ်ဆေးထိုးပေးရတယ်။ ဝက်သက်ပျောက်ဆေးမရှိတော့ ဖျားပြီးချောင်းဆိုးတဲ့ကလေးတွေကို သူ့ရောဂါအလိုက် ကုပေးရတာပေါ့"ဟု တာချီလိတ်ခရိုင်ဆေးရုံအုပ်ကြီး ဒေါက်တာရွှေဝင်းက တာချီလိတ်သတင်းအေဂျင်စီသို့ ပြောသည်။

ပိုလီယိုကာကွယ်ဆေးကို အသက် (၅)နှစ်အောက် ကလေးများအား တိုက်ကျွေးခြင်းဖြစ်ပြီး ဝက်သက်နှင့် ဂျိုက်သိုးရောဂါကာကွယ်ဆေးကို အသက် (၉) လအရွယ်မှ အသက်(၅) နှစ် (၆) လအရွယ်ထိ ကလေးငယ်များကို ထိုးနှံပေးမည်ဖြစ်သည်။

တာချီလိတ်မြို့နယ်အတွင်း အခြေချနေထိုင်သူများအပြင် ရွှေ့ပြောင်းနေထိုင်သူများအနေဖြင့် မိမိတို့၏ ကလေးငယ်များ ပိုလီယိုကာကွယ်ဆေးနှင့် ဝက်သက်၊ ဂျိုက်သိုးကာကွယ်ဆေး မထိုးနှံရသေးပါက နီးစပ်ရာကျန်းမာရေးဌာနများသို့ ဆက်သွယ်နိုင်မည်ဖြစ်သည့်အပြင် ရပ်ကွက်၊ ကျေးရွာများအလိုက် ကာကွယ်ဆေးထိုးနှံပေးသည့်နေ့များ လိုက်လံကြေညာပေးမည်ဖြစ်ရာ မိမိတို့နှင့် နီးစပ်ရာ ကာကွယ်ဆေးထိုးပေးသည့်နေရာ၌ သွားရောက်ထိုးနှံနိုင်ကြမည်ဖြစ်သည်။

သတင်း #ဟန်စိုးထိုက်