ရှမ်းပြည်နယ် (မြောက်ပိုင်း) ကျောက်မဲမြို့၊ ပန်ပေါင်းကျေးရွာတွင် မူးယစ်သတင်းရနေအိမ်အား ရှာဖွေရာ အမျိုးသား (၃)ဦးနှင့် သံဃာတစ်ပါးကို မူးယစ်ဆေးအချို့နှင့်အတူ ဖမ်းမိကြောင်း သိရသည်။
ရဲတပ်ဖွဲ့ဝင်များသည် သက်သေများပါဝင်သည့် အဖွဲ့နှင့်အတူ မတ်လ (၁၅) ရက်နေ့ ညနေ (၅)နာရီခွဲ ဝန်းကျင်က ကျောက်မဲမြို့အနီး ပြည်ထောင်စုလမ်းမကြီး၌ စစ်ဆေးနေစဉ် သီပေါဘက်မှ နောင်ချိုဘက်သို့ ဆိုင်ကယ်မောင်းလာသည့် အမျိုးသားတစ်ဦးကို မူးယစ်ဆေးအနည်းငယ်နှင့် ဖမ်းမိခဲ့ကြောင်း သိရသည်။
ယင်းနောက် ကွင်းဆက်ဖေါ်ထုတ်ချက်ရ ပန်ပေါင်းကျေးရွာရှိ ဦးစိုင်းအောင်မြတ်၏ နေအိမ်အား ရှာဖွေရာ ဘိန်းဖြူ (၁.၈) ဂရမ်၊ wy စာတန်းပါ စိတ်ကြွ ရူးသွပ်ဆေးပြား စုစုပေါင်း (၂၃၇) ပြားနှင့် မူးယစ်ဆေးသုံးသည့် ဆက်စပ်ပစ္စည်းများကို ဖမ်းမိကြောင်း သိရသည်။
အဆိုပါနေအိမ်တွင် အိမ်ရှင်ဖြစ်သူ စိုင်းအောင်မြတ်၊ ဦးဇင်း ဦးသူရိယ၊ အားတီ(ခ) စိုင်းစောနိုင်နှင့် ရွှေဘတို့အား မူးယစ်ဆေးသုံးရာတွင် အသုံးပြုသည့် ဆက်စပ်ပစ္စည်းများနှင့်အတူ ဖမ်းမိကြောင်း သိရသည်။
ဆိုင်ကယ်ဖြင့် မူးယစ်ဆေးသယ်လာသည့် အမျိုးသားအပါအဝင် မူးယစ်ဆေးများနှင့်အတူ ဖမ်းမိသည့် စိုင်းအောင်မြတ်၊ ရွှေဘ၊ ဦးဇင်း ဦးသူရိယနှင့် အားတီ(ခ) စိုင်းစောနိုင်တို့အား ကျောက်မဲမြို့မရဲစခန်းတွင် မယ( ပ) ၁၈/ ၂၀၂၀၊ မူး/စိတ် ပုဒ်မ ၁၉( က)/ ၂၁ ဖြင့် အမှုဖွင့် အရေးယူထားကြော်ငး သိရသည်
Tachileik News Agency
သတင်း - နေဖြိုးမြင့်
