နိုင်ငံအတွင်း စက်တင်ဘာလ(၉)ရက်နေ့အတွက် နှစ်ကြိမ်ပေါင်း စစ်ဆေးမှုတွင် Covid-19 အတည်ပြုလူနာ (၂၀၂)ဦး အသစ်ထပ်တိုး
ကျန်းမာရေးနှင့် အားကစားဝန်ကြီးဌာနမှ ၂၀၂၀ခုနှစ် စက်တင်ဘာလ(၉)ရက်နေ့၏ ဒုတိယအသုတ်အဖြစ် (၂,၁၈၉)ဦး၏ ဓါတ်ခွဲနမူနာများကို စစ်ဆေးရာ (၁၂၀)ဦးတွင် Covid-19 ပိုးတွေ့ရှိ၍ စက်တင်ဘာလ(၉)ရက်နေ့၏ နှစ်ကြိမ်ပေါင်း စစ်ဆေးမှုတွင် အတည်ပြုလူနာသစ် (၂၀၂)ဦး တိုးလာကြောင်း စက်တင်ဘာလ(၁၀)ရက်နေ့ နံနက်(၈)နာရီအချိန်က သတင်းထုတ်ပြန်ထားရှိသည်။
စက်တက်ဘာလ(၉)ရက်နေ့၏ ပထမအသုတ်တွင် စစ်ဆေးမှုတွင် (၁,၂၂၆)ဦးကို စစ်ဆေးရာ (၈၂)ဦးတွင် Covid-19 တွေ့ရှိထားပြီး ည(၈)နာရီက စ၍ နံနက်(၈)နာရီအချိန်အထိ ဒုတိယအသုတ်အဖြစ် (၂,၁၈၉)ဦးကို စစ်ဆေးရာ (၁၂၀)ဦးတွင် တွေ့ရှိ၍ (၂၀၂)ဦး အသစ် ထပ်တိုးလာခြင်း ဖြစ်သည်။
မြန်မာနိုင်ငံအတွင်း ၂၀၂၀ခုနှစ် မတ်လ(၂၃)ရက်နေ့မှ စက်တင်ဘာလ(၁၀)ရက်နေ့ နံနက်(၈)နာရီအထိ အတည်ပြုလူနာ စုစုပေါင်း (၂,၀၀၉)ဦးအထိရှိလာပြီး သေဆုံးသူမှာ (၁၄)ဦးနှင့် ဆေးရုံဆင်းခွင့်ရရှိသွားသူများမှာ (၅၅၃)ဦးအထိ ရှိကြောင်း ကျန်းမာရေးနှင့် အားကစားဝန်ကြီးဌာနက သတင်းထုတ်ပြန်ထားရှိသည်။
