တာချီလိတ်မြို့တွင် Covid-19 အတည်ပြုလူနာအား နိုဝင်ဘာလ(၂၂)ရက်နေ့က စ၍ တွေ့ရှိပြီးနောက် နိုဝင်ဘာလ (၂၇)ရက်နေ့ ည(၈)နာရီအထိ စုစုပေါင်း (၉)ဦးအထိ ရှိနေပြီဖြစ်သည်။
နိုဝင်ဘာလ (၂၅)ရက်နေ့ ညနေပိုင်းက အနံ့ပျောက်နေသည့် အမျိုးသမီးအား RDT ဖြင့် စစ်ဆေးရာတွင် Covid-19 ပိုးတွေ့ရှိခြင်းဖြစ်ပြီး ဆက်လက်၍ ၎င်းနှင့်ထိတွေ့မှုရှိသည့် ကျိုင်းတုံမြို့မှ အသက်(၈)နှစ်အရွယ် ကလေးငယ်တစ်ဦးတွင်လည်း နိုဝင်ဘာလ(၂၆)ရက်နေ့ နံနက်ပိုင်းက ပိုးတွေ့ရှိရသည်။
ရှမ်းပြည်နယ်(အရှေ့ပိုင်း)အတွင်းဖြစ်သည့် မိုင်းဆတ်ခရိုင်၊ မိုင်းတုံမြို့နယ်တွင်လည်း နိုဝင်ဘာလ(၂၇)ရက်နေ့၏ နေ့လည်ပိုင်းက လမ်းလုပ်သားအဖွဲ့ထဲက တစ်ဦးတွင် လည်းကောင်း ညနေပိုင်းတွင် ရန်ကုန်မှလာသည့် အမျိုးသားတစ်ဦးထံက လည်းကောင်း Covid-19 ပိုးစစ်ဆေးတွေ့ရှိရခြင်း ဖြစ်သည်။
လက်ရှိတွင် တာချီလိတ်မြို့၌ အတည်ပြုလူနာများနှင့် ထိတွေ့သူများထဲက စုံစမ်းဖော်ထုတ်ရရှိသမျှကို Quarantine ထားရှိပြီး စုံစမ်းဖော်ထုတ်၍ မရသေးသည့် ထိတွေ့သူများကိုလည်း သက်ဆိုင်ရာက Covid-19 စစ်ဆေးပေးနိုင်ရန်အတွက် ကြိုးပမ်းဆောင်ရွက်နေလျက်ရှိကြောင်း သိရှိရသည်။
