မကွေးတိုင်း ပခုက္ကူခရိုင် ပေါက်မြို့နယ် မြို့မရဲစခန်းတွင် တာဝန်ကျနေသည့် ရဲတပ်သားတစ်ဦး လက်နက်နှင့်အတူ အလင်းဝင်ရောက်လာကြောင်း ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ (ပကဖ) ထံမှ သိရသည်။

ပေါက်မြို့နယ် မြို့မရဲစခန်းတွင် တာဝန်ကျနေသည့် အသက် (၂၇)နှစ်အရွယ် ရဲတပ်သား အေးချမ်းအောင်သည် ၂၀၂၅ ခုနှစ် ဇန်နဝါရီလ (၁၀) ရက်နေ့တွင် ပြည်သူ့ကာကွယ်ရေးတပ်ဖွဲ့ထံ G-3 သေနတ်တစ်လက် ၊ G-3 ကျည် (၉၀) တောင့်ဖြင့် အလင်းဝင်ရောက်ခဲ့ခြင်းဖြစ်ကြောင်း သိရသည်။

လက်ရှိအချိန်တွင် လက်နက်နှင့်အတူ ပြည်သူ့ရင်ခွင်ခိုလှုံလာသည့် ရဲတပ်သား အေးချမ်းအောင်အား ဆုကြေးငွေ သိန်း (၃၀)ကျပ် ချီးမြှင့်ထားပြီး လုံခြုံသည့်နေရာတွင် ကျန်းမာစွာနေထိုင်နေကြောင်း ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ (ပကဖ) က ဆိုသည်။

အလင်းဝင်ရောက်လိုသည့် စစ်ကောင်စီတပ်ဖွဲ့ဝင်များအနေဖြင့် ယုံကြည်စိတ်ချစွာ ဆက်သွယ်နိုင်ကြောင်းကိုလည်း ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ က အသိပေးထားသည်။

စစ်တပ်အာဏာသိမ်းပြီး (၃)နှစ်ကျော် ကာလအတွင်း စစ်သား (၃၇၀၀)ကျော်နှင့် ရဲတပ်ဖွဲ့ဝင် (၁၁,၀၀၀)ကျော် စုစုပေါင်း တစ်သောင်းခွဲ (၁၄,၇၀၀)ဦးခန့် CDM ပြုလုပ် အလင်းဝင်ရောက်ခဲ့ကြောင်း NUG ကာကွယ်ရေးဝန်ကြီးဌာန၏ အချက်အလက်များအရ သိရသည်။

#TachileikNewsAgency

#TNA_LE

Photo:ရေစကြိုမြို့နယ် ပြည်သူ့ကာကွယ်ရေးတပ်ဖွဲ့