ချင်းပြည်နယ် (တောင်ပိုင်း) မင်းတပ်မြို့ ပူကွန်း (ဘူးကွန်း) ကျေးရွာတွင် ၂၀၂၁ ခုနှစ် မေလ (၂၁) ရက်နေ့က တပ်စွဲရန်လာသည့် အာဏာသိမ်းအဖွဲ့၏ စစ်တပ်က အရပ်ဝတ်များဖြင့် စစ်ဘေးရှောင်အယောင်ဆောင်ပြီး ရောက်လာကြသည်ဟု မင်းတပ်မြို့ပြည်သူ့အုပ်ချုပ်ရေး သတင်းအဖွဲ့က ထုတ်ပြန်ချက်အရ သိရသည်။ 

တာလပတ်များခြုံ၍ အရပ်ဝတ်များဖြင့် စစ်ဘေးရှောင်အယောင်ဆောင်၍ တက်လာသည့် အာဏာသိမ်းအဖွဲ့၏ စစ်တပ်က CDF မင်းတပ်နှင့် နေ့လယ် ၂ နာရီဝန်းကျင်တွင် ထိတွေ့ပစ်ခတ်မှုဖြစ်ပွားရာ အနီးကပ်၍ မောင်းပြန်သေနတ်များဖြင့် ပစ်ခတ်ကြသည့်အပြင် လက်နက်ကြီးများပါ အသုံးပြုသည်ဟု သိရသည်။

ညနေ (၆) နာရီအထိ ဖြစ်ပွားသည့် ပစ်ခတ်မှုအတွင်း CDF-Mindat မှ (၁) ယောက်ကျဆုံး၍ ဒဏ်ရာရသူ (၉) ဦး ရှိပြီး အာဏာသိမ်းအဖွဲ့၏တပ်မှ (၁) ယောက်သေဆုံးသည်ဟု သိရသည်။

မင်းတပ်မြို့တွင်  ချီချောင်းဘက်မှ ပူကွန်းရွာသို့ တပ်စွဲရန်လာသည့် အာဏာသိမ်းစစ်ကောင်စီ၏ စစ်တပ်နှင့်  ပြည်သူ့ကာကွယ်ရေးတပ်ဖွဲ့ဖြစ်သည့် Chin National Defense Force (မင်းတပ်)တို့ကြား ပစ်ခတ်မှုဖြစ်ပွားခဲ့ခြင်းဖြစ်သည်။