ရှမ်းပြည်နယ်(မြောက်ပိုင်း) သီပေါမြို့တွင် မန္တလေးမှပြန်လာပြီး အသွားအလာကန့်သတ်ခံထားရသည့် ကိုရင်တစ်ပါး နှင့် လူငယ် အမျိုးသားတစ်ဦးတို့တွင် Covid-19 ပိုးတွေ့ရှိသည့်အတွက် သီပေါပြည်သူ့ဆေးရုံ၏ သီးသန့်ဆောင်သို့ ပြောင်းရွှေ့ကုသထားကြောင်း သိရသည်။
မန္တလေးမြို့မှပြန်လာ၍ သီပေါမြို့ ပန်းတိမ်(တောင်)ရပ်ကွက်ရှိ ရေဟော်( ဘ/က)ကျောင်းနှင့် အထက (၂) Quarantine Center တို့တွင် အသီးသီး အသွားအလာ ကန့်သတ်ထားသူများအား ဇန်နဝါရီလ (၂)ရက်က နှာခေါင်း/အာခေါင် တို့ဖတ် ဓါတ်ခွဲနမူနာများကို ရယူပြီး မူဆယ်မြို့သို့ ပို့ဆောင် စစ်ဆေးရာမှ ဇန်နဝါရီလ (၄)ရက်နေ့တွင် အဖြေသိရခြင်း ဖြစ်သည်။
ဇန်နဝါရီလ( ၄)ရက်နေ့တွင် ရရှိသောအဖြေအရ အဆိုပါ စင်တာ (၂)ခုမှ ကိုရင်တစ်ပါး နှင့် လူငယ် အမျိုးသားတစ်ဦးတို့တွင် Covid-19 ပိုးတွေ့သဖြင့် သီပေါပြည်သူ့ဆေးရုံ သီးသန့်ဆောင်သို့ နယ်စည်းမခြားပရဟိတအသင်း နှင့် ကောင်းမှုရှင်ပရဟိတအသင်းတို့က စနစ်တကျ ပို့ဆောင်ပေးခဲ့ကြောင်း သိရသည်။
Tachileik News Agency
သတင်း - နေဖြိုးမြင့်
